Выбрать язык
Книги Ветхого Завета
Книги Нового Завета
с русским текстом1Иорданлэн зарезь пал люкетаз улӥсь вань аморрей эксэйёс, зарезь дурысь вань ханаан эксэйёс [Инмар] Кузё-Инмар израиль пиослэн азьысьтызы Иордан вуэз со вамен выжытозязы куасьтыса возиз шуыса кылӥзы но, сюлэмзы куалектӥз, [соос туж кышкатскизы], израиль пиослы пумит султыны соослэн кужымзы ӧз ни кыльы.
2Со виын Кузё-Инмар Иисуслы шуиз: «Аслыд [излэсь] лэчыт пуртъёс лэсьты но израиль пиослы кыкетӥ ползэ вандӥськон сямез ортчыты».3Иисус аслыз [излэсь] лэчытэсь пуртъёс лэсьтӥз но израиль пиослы вандӥськон сямез ортчытӥз «Вандӥськон вырйыл» [шуыса нимаськись интыын].
4Тани ма бордын вал Иисуслэн израиль пиослы вандӥськон сямез ортчытонэзлэн мугез [Египетысь потэм беразы сюрес вылын вордӥськемъёслы вандӥськон сям ортчытэмын ӧй вал, ваньмызлы соослы Иисус вандӥськон сямез ортчытӥз]: Египетысь потэм калык – пиосмуртъёс, ваньмыз ожмаськыны быгатоно муртъёс – Египетысь потэм беразы кыр дуннеетӥ мынон-ветлон сюрес вылэ кулыса кылизы;5вань потэм калыклы вандӥськон сям ортчытэмын вал, нош Египетысь потэм бере кыр дуннеетӥ ветлон сюрес вылын вордскем калыклы одӥгезлы но вандӥськон сям ортчытэмын ӧй вал;6уго израиль пиос ньыльдон [кык] ар ӵоже кыр дуннеетӥ ветлӥзы, [соин ик тросэзлы вандӥськон сям ортчытэмын ӧй вал], – ваньмыз Египетысь потэм, ожмаськыны ярамон муртъёс кулыса бырытозь, соос Кузё-Инмарлэсь верам кылъёссэ санэ ӧз понэ, соин ик Кузё-Инмар кыл сётыса вераз: Кузё-Инмарлэсь атайёссылы кыл сётыса асьмелы сётыны сӥзем музъемзэ, кытӥ бызе йӧлын чечы, соос уз адӟе,7соос интые соослэсь пиоссэс ӝутӥз. Соослы Иисус вандӥськон сямез ортчытӥз, уго соослы та дырозь вандӥськон сям ортчытэмын ӧй на вал; малы ке шуоно, сюрес вылын [вордӥськемын шуыса], вандӥськон сямез соос вылын ӧз ортчытэ.
8Вань калыклы вандӥськон сямез ортчытэм бере со бурмытозяз станын ас интыяз улӥз.9Кузё-Инмар Иисуслы шуиз: «Туннэ мон тӥ вылысь Египетлэсь сантэманзэ басьтӥ». Соин ик та инты туннэ нуналозь но «Галгал» шуыса нимаське.
10Израиль пиослэн станзы Галгалын сылӥз; толэзьлэн дас ньылетӥ нуналаз, ӝытазе, Иерихон ёросысь нёжалъёсын Пасхаез ортчытӥзы;11Пасхалэн ӵуказеяз, самой со нуналэ ик, та музъемын будэм емышез, юмал нянь, пырсатэм ю тысь сиизы;12нош манна кисьтӥськемысь дугдӥз музъемын будэм емышез сиыны кутскемзылэн ӵуказеяз, та бере израиль пиослэн манназы ӧй ни вал, таяз аре соос Ханаан музъемын будэм емышез сиыса улӥзы.
13Иисус, Иерихон вӧзын улыкуз, адӟиз: тани, солэн азяз адями сылэ, сепыс-пуртэсысь поттэм мечсэ кияз возе. Иисус, солэн матаз лыктыса, солы шуиз: «Тон милямъёс пӧлысь-а яке тушмонъёсмы радысь-а?»14Со шуиз: «Тӥ пӧлысь но, тушмонъёсты пӧлысь но мон ӧвӧл, мон Кузё-Инмарлэн ожгарчиосызлэн азьвалтӥсьсы, али [татчы] лыктӥ». Иисус музъем вылэ пыдесъяськыса йыбырттӥз но солы шуиз: «Аслаз ляльчиезлы мар шуоз кузёе?»15Кузё-Инмарлэн ожгарчиосызлэн азьвалтӥсьсы Иисуслы шуиз: «Пыдысьтыд пыдкутчандэ кушты, уго тынад сылон интыед – святой инты». Иисус озьы ик кариз.
16Иерихон ворсаськиз, израиль пиослэсь кышкаса ворсаськиз: нокин но [со пушкысь] ӧз поты, нокин но со пушкы ӧз пыра.
Глава 5