Выбрать язык
Книги Ветхого Завета
Книги Нового Завета
с русским текстом1Нош израиль пиос [туж бадӟым] йыруж лэсьтӥзы, Кузё-Инмарлы кыл сётыса сӥзем арбериос пӧлысь мае ке [басьтӥзы]. Иуда выжыысь Заралэн Завдий пиезлэн, Хармий пиезлэн Ахан пиез Кузё-Инмарлы кыл сётыса сӥзем арбериос пӧлысь мае ке аслыз басьтӥз, со понна Кузё-Инмарлэн вожпотонэз израиль пиос вылэ ӝуатӥськиз.
2Иерихонысен Иисус адямиосты Гай городэ ыстӥз, со интыяськемын вал Вефильлэн шундыӝужан палаз, Беф-Авенэн артэ, Иисус соослы шуиз: «Мынэлэ, учкелэ отысь музъемез». Соос мынӥзы но Гаез учкизы.3Берытскем беразы Иисуслы шуизы: «Вань калык медаз мыны, ог кык сюрс яке куинь сюрс адями гинэ мед мыноз но Гаез мед куашкатозы; вань калыкез уже эн куты, уго [отын] ӧжыт калыксы».
4Озьы, ог куинь сюрс адями мынӥз, но гай калыклэсь бызьыса чигнано луизы;5Гайын улӥсьёс таослэсь ог куамын куать адямизэс виизы но кар капка дорысен Севаримозь таос сьӧры уйиськыса мынӥзы, гурезь бамалын соосты пазьгизы; та понна калыклэн сюлмыз куалектӥз, ву кадь сылмиз.6Иисус дӥськутсэ кесиз но Кузё-Инмарлэн ковчегез азе ымныр вылаз сюй вылэ выдӥз, ӝыт вуытозь озьы кыллиз, со но, Израильлэн тӧроосыз но; соос йыр вылазы сюй пызьназы.
7Соку Иисус шуиз: «Э, Кузё-Инмаре, Кузё-Атае! Малы Тон та калыкез Иордан тупала выжытӥд, аморрейёслэн киулазы сётыны но милемыз быдтыны-а? Э, Иорданлэн сопалаз ик ми кыльысалмы но отын ик улысалмы ке!8Э, Кузё-Инмаре! Мон мар вералом на Израиль тушмонэзлы мышсэ возьматэм бере?9Хананейёс но та музъем вылын вань улӥсьёс кылозы со сярысь, котыртозы милемыз но музъем вылысь милесьтым ниммес быдтозы. Соку Тон мар карод на Аслад быдӟым нимыныд?»
10Кузё-Инмар Иисуслы шуиз: «Султы, малы тон ымныр вылад выдӥд?11Израиль сьӧлыказ, соослы сётэм сӥзён-косонэлэн сьӧраз потӥзы: Кузё-Инмарлы кыл сётыса сӥзем арбериос пӧлысь басьтӥзы, лушказы, ватӥзы, асьсэлэн тӥрлыкъёссы пӧлы понӥзы;12со понна ик израиль пиос тушмонъёссы азьын сылыны ӧз чидалэ, мышкынызы тушмонъёссы пала берытскизы, уго соос карган улэ сюризы; тӥледын валче уг ни луы, пӧлысьтыды каргамез ӧд ке быдтэ.13Султы, дун-чылкыт кар калыкез, солы шу: ”Ӵукнаозь дун-чылкытатӥське, уго тазьы шуэ Израильлэн Инмарез Кузё-Инмар: тон пушкын, Израиль, Кузё-Инмарлы кыл сётыса сӥзем арбериос вань; соин ик тон тушмонъёсыд азьын сылыны уд быгатӥськы, – Кузё-Инмарлы кыл сётыса сӥзем арбериосты ас бордысьтыд палэнтытозь”.14Ӵуказе ӵукна [ваньды] выжыен-выжыен татчы лыктэ, нош Кузё-Инмарлэн соку пӧлысьтыды возьматэм выжыез улы-бечеосыныз ӵош матэ мед лыктоз; Кузё-Инмарлэн соос пӧлысь возьматэм улы-бечеез семьяосыныз ӵош матэ мед лыктоз; нош Кузё-Инмарлэн возьматэм семьяысьтыз адямиос одӥген-одӥген мед лыктозы;15Кузё-Инмарлы кыл сётыса сӥзем макеосыз пӧлысь мае ке аслыз басьтэм мурт сюриз ке, тылын мед сутозы, сое но, солэн маиз вань, ваньзэ мед сутозы Кузё-Инмарлэсь сӥзён-косонзэ сӧрыса солэн сьӧраз потэмез понна, Израильын законлы пумит уж лэсьтэмез понна».
16Иисус ӵукна вазь ик султӥз но израиль калыкез выжыен-выжыен лыктыны косӥз, возьматэмын вал Иуда выжы шоры;17собере лыктыны косӥз Иуда выжыысь улы-бечеосты; Зара улы-бече шоры возьматэмын вал, Зара улы-бечеез матэ лыктыны косӥз, семьяосын-семьяосын люкиськыса; Завдий [семья] шоры возьматэмын вал;18солэн семьяезлы одӥген-одӥген лыктыны косэмын вал, Иуда выжыысь Заралэн Завдий пиезлэн, Хармий пиезлэн Ахан пиез шоры возьматэмын вал.19Иисус Аханлы шуиз: «Пие! Израильлэсь Инмарзэ Кузё-Инмарез данъя, Со азьын сьӧлыкъёстэ вера, вера мыным, мар тон лэсьтӥд; мынэсьтым эн ваты».
20Иисуслы ответ сётыса, Ахан шуиз: «Зэм ик, Израильлэн Инмарез Кузё-Инмар азьын мон сьӧлыкай, сое но, сое но лэсьтӥ:21ож бере бичам тӥрлыкъёс пӧлысь мон адӟи туж чебер Сеннаар дӥськутэз, кык сю сӥкль азвесь, витьтон сӥкль кыскись зарни комок; мон соослы синмаськи но аслым кари; тани, соос мынам балаган пушкам сюе ватэмын, азвесь улынгес [ватэмын]».22Иисус адямиосты ыстӥз, соос [станысь] балаган доры бызьыса мынӥзы; ваньмыз та солэн балаган пушказ ватэмын вал, азвесь улынгес ватэмын вал.23Балаган пушкысь соос ваньзэ тае басьтӥзы но Иисус доры, вань израиль пиос доры вайизы, Кузё-Инмар азе понӥзы.
24Иисус но, вань израиль пиос но кутӥзы Заралэсь Ахан пизэ, – азвесез но, дӥськутэз но, зарни комокез но, солэсь пиоссэ, солэсь нылъёссэ, ошъёссэ но, ишакъёссэ но, ыжъёссэ но, балаганзэ но, ваньзэ, маиз солэн вал, [ваньзэсты] таосты Ахор нёжалэ поттӥзы.
25Соку Иисус шуиз: «Ми вылэ шугадӟон ваемед понна та нуналэ Кузё-Инмар тон вылэ шугадӟон ыстэ». Вань израиль калык сое изъёсын тышкаса вииз, тылын соосты сутӥзы, соос вылэ изъёс куязы.26Со вылэ бадӟым люк изъёс куязы, со из люк та дырозь но возиське на. Та бере Кузё-Инмарлэн лек вожпотонэз кысӥз. Соин ик та интыез туннэ нуналозь но Ахор нёжал шуыса нимало.
Глава 7