Выбрать язык
Книги Ветхого Завета
Книги Нового Завета
с русским текстом1Кузё-Инмар Иисуслы шуиз: «Эн кышка, эн куалекъя; ас бордад ожмаськыны быгатӥсь вань калыкез кут, султы но Гае мын; тани, Мон тынад кияд Гайлэсь эксэйзэ сётӥсько, солэсь калыксэ но, городзэ но, музъемзэ но;2Гайлы но, солэн эксэезлы но лэсьты озьы ик, кызьы, мар карид Иерихонлы но, солэн эксэезлы но, нош ож бере люкам ваньбурез, пудо-животэз но асьтэлы люкылэ; ожгарчиостэ город сьӧрысь лушкем интыосы ватӥськыты».
3Иисус но, ожмаськыны вань ярамон калык но султӥзы Гае мынон вылысь; Иисус куамын сюрс кышкасьтэм адямиосты бырйиз, уйин соосты ыстӥз но4соослы косон сётыса шуиз: «Учкелэ, тӥ город сьӧрын, город вӧзын ватӥськыса улӥсь ожгарчиос луоды; городлэн сьӧраз кыдёке эн кошке, ваньды дась улэ;5нош мон но, монэн ӵош ветлӥсь вань калык но город доры лыктомы; [Гайын улӥсьёс] милемлы пумит ожмаськыны потӥзы ке, азьло сямен ик, соку ми соос дорысь бызьыса кошкомы;6соос ми сьӧры мынозы, озьы ми соосты городлэсь палэнэ нуомы; уго соос шуозы: ”Асьмелэсь кышкаса пегӟо, азьвыл кадь ик”; соослэсь бызьыса кошкыны кутскимы ке,7соку тӥ ватӥськыса улон интыысьтыды султэ но городэз киулады басьтэ, Инмарды Кузё-Инмар сое тӥляд киулады сётоз;8городэз киултӥды ке, сое тылын сутэ, – Кузё-Инмарлэн верам кылызъя лэсьтэ; учкелэ, мон тӥледыз косӥсько».9Озьы Иисус соосты ыстӥз; соос ватӥськон интые пыризы, Гаен Вефиль вискы интыяськизы – Гайлэн шундыпуксён палаз; нош Иисус со уе калык пӧлын кӧлӥз.
10Ӵукна вазь ик султыса, Иисус калыкез учкиз-эскериз но Израильысь тӧроосын ӵош калыклэн азьпалаз Гай пала вамыштӥз;11соин ӵош ветлӥсь ожмаськыны быгатӥсь вань калык городлы матэ вуиз, матаз лыктӥз [шундыӝужан палтӥз лыктӥзы, нош ватӥськыса улӥсь ожгарчиоссы городлэн шундыпуксён палаз интыяськемын вал],12ожгарчиослы дугдон инты Гайлэн уйпалаз лэсьтӥзы, нош соос но Гай вискын нёжал вал; собере со ог вить сюрс муртэ кутӥз но Вефилен Гай вискы, городлэн шундыпуксён палаз, ватӥськыса улыны косӥз.13Вань калык городлэн уйпалаз станэн интыяськиз, станлэн мышкыз сылӥз городлэн шундыпуксён палаз. Со уе Иисус нёжал шоры лыктӥз.
14Гайлэн эксэез тае адӟем бераз соку ик городын улӥсьёсын ӵош вазь ик султӥзы но Израиль вылэ ожен вырӟизы, со но, солэн вань калыкез но нёжал азьысь пусъем интые вуизы; нош со ӧз тоды, [солэн] городэзлэн сьӧраз солы пумит ватӥськыса ожгарчиос сыло шуыса.15Иисус но, вань израиль ожгарчиос но, соос азьын кышкам улэ аналскыса, кыр дуннее бызьыса пегӟыны кутскизы;16таосыз городысь вань калыкез чортыса кеськизы, израиль калык сьӧры уйиськыса мед мынозы шуыса, Иисус бӧрсьы уйиськон сямен городлэсь кыдёке ортчоно луизы;17Гае, Вефиле одӥг адями но ӧз кыльы – ваньзы израиль калык сьӧры уйиськыса мынӥзы; израиль калык сьӧры уйиськыса мынон сяменызы соос кар капкаоссэс ворсатэк кельтӥллям.18Соку Кузё-Инмар Иисуслы шуиз: «Киысьтыд шибодыдэ Гай вылэ ӝут, уго Мон сое тон кие сёто, [ватӥськыса улӥсьёс со виын ик интыысьтызы султозы]». Иисус [кизэ,] киысьтыз шибодызэ город вылэ ӝутӥз.19Город шоры кизэ мычем бере ик ватӥськыса улӥсь ожгарчиос соку ик интыысьтызы султӥзы, бызьыса мынӥзы, городэ пырыса, сое киултӥзы но соку ик, тыл поныса, городэз сутӥзы.20Гайын улӥсьёс мышказы учкизы но городлэсь ӝуамзэ, ӵынлэсь инме ӝутскемзэ адӟизы. Пегӟон интызы ӧй ни вал, – отчы но ватӥськыны уг луы, татчы но уг луы: уго кыр дуннее пегӟись калык берытскиз но уйиськыса лыктӥсь калык вылэ урдскиз.
21Иисус но вань израиль калык, ватӥськыса улӥсь ожгарчиос городэз киултӥзы, город пушкысь ӵын [инме] ӝутске шуыса адӟизы но берытскыса Гайын улӥсьёсты виылыны кутскизы;22нош соосыз городысь потӥзы таослэн пумитазы, озьы гай калык израиль ожгарчиос шоры ӝиптэмын вал, – одӥгъёсыз огласянь, мукетъёсыз – мукет ласянь; озьы соосты погыръязы – одӥгез но улэп ӧз кыльы, пегӟыны но ӧз быгаты;23нош Гайлэсь эксэйзэ, улэпкын кутыса, Иисус доры вайизы.
24Израиль пиос Гайын вань улӥсьёсты, кыр дуннее сьӧразы уйиськыса мынэм муртъёсты, бусыын виылэм бере, меч улэ соосты ваньзэс одӥгтэм погыртэм бере вань израиль пиос Гай пала берытскизы но сое мечен кораса виизы.25Со нуналэ Гайын вань улӥсьёс – пиосмуртъёс но, кышномуртъёс но – дас кык сюрс мурт виемын вал.26Гайын вань улӥсьёсты одӥгтэм быдтытозяз, Иисус шибоды кутыса ӝутэм кизэ улэ ӧз лэзьы;27пудоез, городысь люкам ваньбурез израиль [пиос] куспазы люкылӥзы Кузё-Инмарлэн Иисуслы верам кылызъя.28Иисус Гаез сутӥз, пумтэм вапумъёс ӵожелы куашкам бервыллы, кыр дуннелы пӧрмытӥз, туннэ нуналэ но озьы ик улэ,29нош Гайлэсь эксэйзэ писпуэ ошизы, [писпуын со] ӝытозь [улӥз]; шунды пуксем бере Иисус косэмъя, шӧйзэ писпуысь басьтӥзы но кар капка азе куштӥзы, со вылэ бадӟым из люк куязы, со туннэ нуналозь но возиське на.
30Соку Иисус Гевал гурезе Израильлэн Инмарезлы Кузё-Инмарлы курбон сётон инты лэсьтӥз,31кызьы Кузё-Инмарлэн ляльчиез Моисей Израиль пиослы сӥзиз, – та сярысь Моисейлэн закон книгаяз гожтэмын, – быдэс изъёслэсь, корт тӥрлыкен вӧлымтэ изъёслэсь, лэсьтӥз; со вылын Кузё-Инмарлы тылын сутӥськись курбонъёс сётӥзы, тупаса улонлы сӥзем курбонъёс сётӥзы.
32Отысен изъёс вылэ Моисейлэн законысьтыз кылъёссэ [Иисус] гожтӥз, сое со израиль пиослэн син азязы гожтӥз.33Быдэс Израиль – солэн тӧроосыз, эскерись-чакласьёсыз, судьяосыз – ковчеглэн мыд-мыд палаз, Кузё-Инмарлэсь сӥзён-косонэн ковчегзэ нуллӥсь священникъёслэн, левитъёслэн ваче пумитазы султӥзы, кызьы ке лыктэм муртъёс, озьы ик татын пырак ӵоже улӥсьёс но, одӥг люкетэз Гаризим гурезь дорын, нош мукет люкетэз – Гевал гурезь дорын, кызьы азьвыл ик косӥз Кузё-Инмарлэн ляльчиез Моисей израиль калыкез бакель карыны.34Собере [Иисус] лыдӟиз законысь вань кылъёсты, бакель каронэз, карганэз, кызьы ваньмыз гожтэмын закон книгаын.35Ваньзэ, мае Моисей [Иисуслы] сӥзьыса сётӥз, ваньзэ – котькуд кылзэ – Иисус вань люкаськем израиль калык азьын – пиосмуртъёс, кышномуртъёс, нылпиос, израиль калык пӧлын сылӥсь лыктэм калык азьын – лыдӟиз.
Глава 8