Выбрать язык
Книги Ветхого Завета
Книги Нового Завета
с русским текстом1Та сярысь кылэм беразы Иордан сьӧрысь, гурезьёсын, нёжалъёсын, быдӟым зарезьлэн кузянаяз, Ливан вӧзын улӥсь вань [аморрей] эксэйёс, хеттей, аморрей, [гергесей], хананей, ферезей, евей, иевусей калыкъёс,2огазе люкаськизы, огкылысь кариськыса, Иисусэн но вань израиль калыкен ожмаськон вылысь.
3Нош Гаваонын улӥсьёс Иисуслэсь Иерихонэн но Гай карен мар лэсьтэмез сярысь кылӥзы но4кескич амалэз уже кутӥзы: сюрес вылэ запас нянь дасязы но вужмем пуйыосты ишакъёссы вылэ тыризы, вужмем, кесяськем, кышъям сепысъёсазы вина лэзьяса тыризы;5пыдысьтызы кутчанъёссы но вужесь, кышъямын вал ни соос, дӥськутсы но вужмемын; сюрес вылэ дасям няньзы куасьмемын, пурысьтамын, [пырдэмын] вал.6Соос Галгалэ [израиль калыклэн] дугдон интыяз, Иисус доры лыктӥзы но солы, вань израиль калыклы веразы: «Туж кыдёкысь музъемысь ми лыктӥмы; озьыен, милемын кусып кылдытэ».7Нош израиль пиос евейёслы шуизы: «Оло, тӥ милемын артэ улӥськоды? Кызьы ми тӥледын кусып кылдытомы?»
8Соос Иисуслы шуизы: «Ми тынад ляльчиосыд». Нош Иисус соослы шуиз: «Кинъёс тӥ, кытысен лыктӥды?»9Соос солы шуизы: «Туж кыдёкысь музъемысь тынад ляльчиосыд лыктӥзы тынад Инмаредлэн Кузё-Инмарлэн нимыз понна; уго ми Солэн данлыкез сярысь кылӥмы, ваньзэ, мар Со лэсьтӥз Египетын, со сярысь ваньзэ ми кылӥмы,10ваньмыз сярысь но, мар Со лэсьтӥз Иордан тупалан улӥсь кык аморрей эксэйёслы, Есевонлэн Сӥгон эксэезлы, Васанлэн Астарофын, [Едреяын] улӥсь Ог эксэезлы.11[Та сярысь кылэм беразы] милям тӧроосмы, музъем выламы вань улӥсьёс милемлы шуизы: ”Сюрес вылэ потыкуды, сьӧрады нянь кутэ, соослэн пумитазы мыныса шуэлэ: ”Ми тӥляд ляльчиосты; озьы тӥ милемын эшъяськыса улыны кыл сётэ”.12Та няньмес ми коркасьтымы шуныт дыръяз басьтӥмы тӥ доры лыктыны потон нуналамы, нош тани табере со куасьмиз, пурысьтаз ини;13тани та вина лэзем сепысъёсмы но вылесь вал, табере кесяськизы; туж кузь сюрес кузя ветлыса, та дӥськутмы но, пыдкукмы но пӧсьтӥзы».
14Израиль пиос соослэсь няньзэс басьтӥзы, нош Кузё-Инмарлэсь ӧз юалэ.15Иисус соосын тупаса улон гожтӥз, соослэсь улонзэс утёз шуыса, соосын огкыл гожтӥз; калыклэн кивалтӥсь йыръёсыз тае соослы кыл сётыса юнматӥзы.
16Нош соосын кусып кылдытэмзы бере, куинь нунал ортчыса, соос бускельёс луо, соослы матын уло шуыса кылӥзы;17уго израиль пиос сюрес вылэ потэм беразы, куинь нунал ортчыса, соослэн городъёсазы вуизы; соослэн таӵе городъёссы [вал]: Гаваон, Кефира, Беероф но Кириаф-Иарим.18[Иисус но,] израиль пиос но соосты ӧз виылэ, малы ке шуоно калыклэн [вань] кивалтӥсь йыръёсыз Израильлэн Инмарезлэн Кузё-Инмарлэн нимыныз соослы кыл сётӥзы. Та понна быдэс [израиль] калык кивалтӥсь йыръёс вылэ йыркуръяськыны-ӟургетыны кутскиз.19Вань кивалтӥсь йыръёс калыклы шуизы: «Ми соослы Израильлэн Инмарезлэн Кузё-Инмарлэн нимыныз кыл сётӥмы, соин ик соос борды йӧтӥськыны ум быгатӥське;20тани мар каромы соосын: соослы кыл сётыса вераммес быдэстымтэмы понна вожпотон асьме вылэ медаз вуы шуыса, соосты ум виылэ».21Кивалтӥсь йыръёс соослы шуизы на: «Мед улозы, но со понна соос калыклы пу кораса, ву омыръяса улозы». [Вань калык лэсьтӥз] озьы, кызьы соослы кивалтӥсь йыръёс веразы.
22Иисус Гаваонын улӥсьёсты ӧтьыса шуиз: «Ми тӥлесьтыд туж кыдёкын улӥськомы шуыса, малы милемыз пӧяды, – нош асьтэос милемын артэ улӥськоды ук?23Со понна тӥ каргамын! Пумтэм дыръёс ӵоже тӥ ляльчи радын улоды, [мыным но,] Инмарелэн юртэзлы [но] пу кораса, ву омыръяса улоды!»24Соос Иисуслы ответ сётыса шуизы: «Тынад ляльчиосыд доры ивор вуиз, Инмаред Кузё-Инмар Аслаз Моисей ляльчиезлы, [милемыз,] та музъем вылын вань улӥсьёсты тӥляд азьысьтыды быдтыса, вань та музъемез тӥледлы сётыны косэм; тӥ милемыз медад быдтэ шуыса, ми туж кышкаса улӥмы, соин ик ми та ужмес лэсьтӥмы.25Тани табере ми тынад киулад: кызьы умойгес, шонергес кадь тыныд потоз, озьы тон милемлы лэсьты».
26Соосын тазьы кариз: израиль пиослэн киулысьтызы мозмытӥз, соос соосты ӧз виылэ.27Со нуналэ Иисус таӵе пуктон-косон сётӥз: [быдэс] калыклы, Кузё-Инмарлэн курбон сётон интыезлы но пу кораса, ву омыръяса мед улозы; [соин ик Гаваонын улӥсьёс Кузё-Инмарлэн курбон сётон интыезлы пу корасьёс, ву нуллӥсьёс луизы, Кузё-Инмарлэн] быръем интыяз туннэ нуналозь но тазьы ужаса уло.
Глава 9