Выбрать язык
Книги Ветхого Завета
Книги Нового Завета
с русским текстом1Иерусалимлэн Адони-Седек эксэез доры таӵе ивор вуиз: Иисус Гаез киултэм, сое каргам, Иерихонэз кадь ик Гаез но пазьгем, Иерихонлэсь эксэйзэ кадь ик Гайлэсь но эксэйзэ вием. Адони-Седек кылӥз на, Гаваонын улӥсьёс [Иисусэн], Израилен эшъяськыса улыны кыл сётӥллям, израиль пиос пӧлы, пе, соос улыны кылиллям.2Соку со туж кышказ, уго Гаваон город туж бадӟым, – эксэй городъёслы укша вал со, Гайлэсь со бадӟымезгес, отын улӥсь адямиос ваньзы кышкасьтэмесь вал.3Соин ик Иерусалимлэн Адони-Седек эксэез Хевронлэн Гогам эксэезлы, Иармуфлэн Фирам эксэезлы, Лахислэн Яфий эксэезлы, Еглонлэн Девир эксэезлы тазьы вераны ыстӥз:4«Лыктэ мон доры, юрттэ Гаваонэз та понна погыртыны: со Иисусэн, израиль пиосын тупаса улон сярысь огкыл гожтӥз».
5Соос огазе люкаськизы но вить аморрей эксэйёс сюрес вылэ потӥзы: Иерусалимлэн эксэез, Хевронлэн эксэез, Ярмуфлэн эксэез, Лахислэн эксэез, Еглонлэн эксэез, вань ожгарчиоссы соосын валче вал; соос Гаваон вӧзы солы пумит ожмаськон понна станэн дугдӥзы.6Гаваонын улӥсьёс [израиль калыклэн] дугдон интыязы (станэ) Иисус доры, Галгалэ, тазьы вераны ыстӥзы: «Аслэсьтыд ляльчиостэ куштыса эн кельты; ӝоггес ми доры лыкты, уть милемыз, милемлы юртты; уго гурезьёсын улӥсь вань аморрей эксэйёс милемлы пумит ожмаськыны ӝутскизы».7Галгалысен Иисус ачиз мынӥз, со бӧрсьы вань ожмаськыны быгатӥсь калык, ваньзы кышкасьтэм пиосъёс вырӟизы.
8Кузё-Инмар Иисуслы шуиз: «Эн кышка соослэсь, соосты Мон тынад киулад сётӥ: соос пӧлысь одӥгез но тон азьын сылыны уз чида».9Соос доры Иисус шӧдтэк шорысь вуиз, [уго] со быдэс уй ӵоже Галгалысь лыктӥз,10израиль пиосты адӟыкузы, Кузё-Инмар соосты куалектытӥз, туж кужмо шуккетэн соосты Гаваонысен погыртӥзы, бӧрсязы уйиськыса Веф-Орон вырйылозь сюрес кузя мынӥзы, Азеке, Македэ вуытозь соосты погыртылӥзы.11Веф-Орон гурезь бамалтӥ израиль пиослэсь пегӟыкузы, Азеке вуытозь Кузё-Инмар соос вылэ инмысен бадӟымесь [йӧ] комокъёс куяз, озьы соос кулылӥзы; израиль ожгарчиослэн [жугиськыку] мечен виылэмзылэсь но тросгес быризы, йӧ комокъёс вылазы усьылыку.
12[Инмар] Кузё-Инмар Аморреез израиль пиос кие сётыку, [Гаваонын соосты виылыку, но соос израиль пиос азьын виылэмын вал], со нуналэ Иисус Кузё-Инмарлы вазиськиз, израиль пиос азьын со шуиз: «Шунды, Гаваон йылын дугдыса сыл, нош толэзь, – Аиалон нёжал йылын!»13Калык тушмонъёсызлы пунэмзэ берыктытозь, шунды азьлань мынэмысь дугдӥз, толэзь но огинтыяз сылӥз. Та сярысь гожтэмын ӧвӧл-а Шонер Улӥсьлэн книгаяз: «Инлэн шораз шунды быдэс нунал пала сылӥз, шундыпуксёнэ мыныны ӧз дырты»?14Адямилэсь курись куаразэ Кузё-Инмар [сокем] мед кылысал, – азьло но, та учыр бере но сыӵе нунал ӧй вал. Кузё-Инмар Израиль палан нюръяськиз.
15Собере Иисус но, ваньзы израиль пиос но соин ӵош станэ, Галгалэ, берытскизы.16Нош соосыз, витез эксэйёс, бызьыса кошкизы но Македысь гуэ-пещерае ватӥськизы.17«Со вить эксэйёс шедизы, соос Македысь гуын-пещераын ватӥськыса уло» шуыса Иисуслы ивортэм бере18Иисус шуиз: «Гуэ-пещерае пырон пасез бадӟымесь изъёсын пыкъялэ, со доры возьмаськисьёсты пуктэ;19нош тӥ [татчы] эн дугдэ, тушмонъёсты сьӧры уйиськыса мынэ, мышказ мынӥсь ожгарчиоссэс виылэ, городъёсазы кошкыны эн лэзе, уго тӥляд Инмарды Кузё-Инмар соосты тӥляд киулады сётӥз».
20Иисус израиль пиосын ӵош соослы туж бадӟым шуккет лэсьтэм бере кылем люкетэз юнматэм каръёсы пегӟылӥзы.21Вань калык станэ, Иисус дӥне, Македэ, каньыл мылкыдын берытскиз, нокин но израиль пиослы пумит кыл вераны ымзэ ӧз усьты.
22Соку Иисус шуиз: «Гулэсь-пещералэсь пырон пасьсэ усьтэ но отысь со вить эксэйёсты мон доры поттэ».23Озьы ик каризы: гуысь-пещераысь со доры та вить эксэйёсты поттӥзы: Иерусалимлэсь эксэйзэ, Хевронлэсь эксэйзэ, Иармуфлэсь эксэйзэ, Лахислэсь эксэйзэ, Еглонлэсь эксэйзэ.24Та эксэйёсты Иисус доры поттэм бере Иисус вань израиль калыкез ӧтьытӥз но соин ӵош ветлэм ожгарчиослэн азьвалтӥсьёссылы шуиз: «Лыктэ но та эксэйёслэн чырты вылазы пыдъёсыныды лёгиське». Соос лыктӥзы но чыртыоссы вылэ лёгиськизы.
25Иисус соослы шуиз: «Эн кышкалэ, эн куалекъялэ, юнэсь, кышкасьтэмесь луэ; Кузё-Инмар ваньмызлы тушмонъёстылы тазьы кароз, соосын ожмаськыны кутскиды ке».26Собере Иисус соосты погыртӥз, виылӥз, вить писпуэ ошылӥз; ӝытозь писпуын ошиськыса улӥзы.27Шунды пуксьыку Иисус косэмъя соосты писпуосысь басьтӥзы но ватӥськыса улон гуазы-пещераязы куязы; гуэ-пещерае пырон пасез бадӟымесь изъёсын ӵоксазы, туннэ нуналозь но соос отын возисько.
28Со нуналэ ик Иисус Македэз киултӥз, [сое] мечен кораз, эксэйзэ но; соосты, солэн пушказ улӥсь вань шокасьёсты каргаз-быдтӥз: нокинэ но улэп ӧз кельты, [нокин но пегӟыны ӧз быгаты]; Иерихонысь эксэйлы кадь ик Македысь эксэйлы но озьы ик лэсьтӥз.
29Иисус но, вань израиль пиос но соин ӵош Македысь Ливна доры кошкизы, Ливналы пумит ожмаськизы;30та городэз но, солэсь эксэйзэ но Кузё-Инмар Израиль киулэ сётӥз, [киултӥзы сое]; Иисус мечен сое быдтӥз, та город пушкысь вань шокась макеосты быдтӥз: нокинэ но улэп ӧз кельты, [нокин но пегӟыны ӧз быгаты], Иерихонлэн эксэеныз мар кариз, таизлы но озьы ик кариз.
31Иисус но, вань израиль ожгарчиос но соин ӵош Ливнаысь Лахисэ кошкизы но со вӧзы станэн дугдӥзы, Лахислы пумит ожмаськизы;32Кузё-Инмар Лахисэз Израильлэн киулаз сётӥз, мукетаз нуналэ сое киултӥз, вань шокась макеосты мечен кораз, мар вал со пушкын, [ваньзэ быдтӥз], Ливналы кадь ик таизлы но озьы ик кариз.33Со виын Газерлэн Горам эксэез Лахислы юрттӥськыны лыктӥз; нош Иисус сое но, солэсь калыксэ но [мечен] погыртӥз, нокинэ но улэп ӧз кельты, [нокин но пегӟыны ӧз быгаты].
34Иисус но, вань израиль пиос но соин ӵош Лахисысь Еглонэ мынӥзы но со вӧзы станэн дугдӥзы, солы пумит ожмаськизы;35[Кузё-Инмар сое Израильлэн киулаз сётӥз], со нуналэ ик сое киултӥзы но со пушкысь вань улэп-шокась макеосты мечен коразы, кызьы азьвыл Лахисэз каргаз-быдтӥз, тае но озьы ик кариз.
36Иисус но, вань израиль пиос но соин ӵош Еглонысь Хевронэ мынӥзы, солы пумит ожмаськизы;37киултӥзы сое, мечен коразы, эксэйзэ но, вань городъёссэ но, со пушкысь вань улэп-шокась макеоссэ но; нокинэ но улэп ӧз кельты, кызьы лэсьтӥз Еглонын но: со пушкысь вань улэп-шокась макеосты каргаз-быдтӥз.
38Собере Иисус, вань израиль пиос но соин ӵош Давир пала берытскизы, солы пумит ожмаськизы.39Сое но, эксэез но, солэсь вань городъёссэ но басьтӥз, соосты мечен коразы, [соосты], со пушкысь вань улэп-шокась макеосты каргазы-быдтӥзы: нокин но улэп ӧз кыльы; кызьы Хевронлы, солэн эксэезлы лэсьтӥз, кызьы Ливналы, солэн эксэезлы лэсьтӥз, озьы ик Давирлы но солэн эксэезлы лэсьтӥз.
40Иисус вормиз-погыртӥз быдэссэ гурезё шаерез, лымшорпал музъемез, улыго шаерез, гурезь вӧзысь улосэз, соослэсь эксэйёссэс: нокинэ но улэп ӧз кельты, вань улэп-шокась макеоссэс каргаз-быдтӥз, кызьы косӥз Израильлэн Инмарез Кузё-Инмар;41Кадес-Варниысен кутскыса Газаозь кыстӥськись музъемез, быдэссэ Гошен музъемез но Гаваонозь ик Иисус погыртӥз-виылӥз;42вань та эксэйёсты, соослэсь музъемъёссэс Иисус огкутскемен киултӥз, уго Израильлэн Инмарез Кузё-Инмар Израиль палан ожмаськиз.
43Собере Иисус, вань израиль пиос но соин ӵош Галгалысь станэ берытскизы.
Глава 10