Выбрать язык
Книги Ветхого Завета
Книги Нового Завета
с русским текстом1Та сярысь Асорлэн Иавин эксэез кылӥз но Мадонлэн Иовав эксэез доры, Шимронлэн эксэез доры, Ахсафлэн эксэез доры иворчиоссэ ыстӥз,2озьы ик уйпал гурезьёсын, Киннерефлэн лымшор паласьтыз нёжалын, улыг интыосын, шундыпуксён палась Нафоф-Дорын улӥсь эксэйёс доры иворчиоссэ ыстӥз,3шундыӝужан палан но, зарезь палан но улӥсь хананейёс доры, гурезьын улӥсь аморрейёс, хеттейёс, ферезейёс, иевусейёс доры; Ермон вӧзысь Массифа музъемын улӥсь евейёс доры но иворчиоссэ ыстӥз.4Соос но, соосын огазе люкаськем вань ожгарчиоссы, туж трос калык – лыдзыя зарезь дурысь луо мында вал соос, оже вырӟизы; валъёс но, ожмаськон уробоос но тачак вал.5Вань та эксэйёс, огазе люкаськыса, ӵош лыктӥзы но израиль калыкен ожмаськон понна станэн Меромысь вуос доры дугдӥзы.
6Нош Кузё-Инмар Иисуслы шуиз: «Соослэсь эн кышка, уго ӵуказе, та дыре ик, Мон соосты ваньзэсты израиль [пиослэн] киулазы виыны сёто; нош валъёссылэсь сӧнзэс (сӥнырзэс) вандылы, ожмаськон уробооссэс тылын сут».
7Иисус но соин огазе люкаськем ожмаськыны быгатӥсь вань калык малпамтэ шорысь Мерим вуос дорысен соослы пумит потӥзы но соос вылэ урдскизы.8Кузё-Инмар израиль пиослэн киулазы соосты сётӥз, соосты вормизы-погыртӥзы, быдӟым Сӥдон карозь, Мисрефоф-Маимозь, шундыӝужанысь Мицфа нёжалозь сьӧразы уйиськыса мынӥзы, соосты вормизы-погыртӥзы, одӥг мурт но соос пӧлысь улэп ӧз кыльы, [утиськыны ӧз быгатэ].9Иисус соослы озьы лэсьтӥз, кызьы Кузё-Инмар косӥз: валъёссылэсь пыд сӧнзэс вандылӥз, ожмаськон уробооссэс тылын сутӥз.
10Со виын ик, отысь берытскыса, Иисус Асорез киултӥз, солэсь эксэйзэ мечен вииз. Вазен Асор вань та эксэйлыкъёслэн шоркарзы вал.11Со пушкысь вань улэп-шокась макеосты мечен виылӥзы, [ваньзэс] быдтӥзы: одӥг улэп лул но ӧз кыльы; нош Асорез тылын сутӥз.
12Та эксэйёслэсь вань городъёссэс, соослэсь вань эксэйёссэс Иисус кутылӥз но мечен кораз, каргаз-быдтӥз, кызьы косӥз Кузё-Инмарлэн Моисей ляльчиез;13со дыре ик вырйылъёсын сылӥсь городъёсты израиль ожгарчиос ӧз сутэ, одӥг Асорез сяна, сое Иисус сутӥз.14Нош со городъёслэсь вань ваньбурзэс, [вань] пудозэс израиль пиос талазы; соослэсь вань калыксэс мечен виылӥзы, озьы ваньзэсты быдтӥзы: соос пӧлысь одӥгзэ но лулэз улэп ӧз кельтэ.15Кызьы Кузё-Инмар Аслаз Моисей ляльчиезлы косӥз, озьы ик Моисей Иисуслы курон-косон сётӥз, нош Иисус озьы ик лэсьтӥз: Кузё-Инмарлэн Моисейлы сётэм косонъёсыз пӧлысь одӥг кылызлэсь но ӧз куштӥськы.
16Таӵе амалэн Иисус быдэс гурезё шаерез киултӥз, быдэс лымшор шаерез, быдэссэ Гошен музъемез, улыго интыосты но, ӵошкыт интыосты но, Израиль гурезез но, [гурезь вӧзысь] улыго интыосты но,17Сеир дорозь кыстӥськись Халак гурезь дорысен Ливан нёжалысь Ермон гурезь вӧзысь Ваал-Гадозь; соослэсь вань эксэйёссэс кутылӥз но ваньзэс погыртӥз, виылӥз.18Трос аръёс ӵоже Иисус вань та эксэйёсын ожмаськылӥз.19Гаваонын улӥсь евейёс сяна, одӥг город но израиль пиосын тупаса улон сярысь огкыл ӧз гожты: ваньзэ ожен басьтоно луиз;20уго Кузё-Инмар дорысь вал та: соос сюлэмзэс лекомытӥзы но израиль пиосын ожмаськыны кутскылӥзы, каргамын-быдтэмын мед луозы, соос доры гажан-жалян медаз вуы шуыса, быдтэмын-виылэмын мед луозы озьы, кызьы Кузё-Инмар Моисейлы косон сётӥз.
21Со виын ик Иисус лыктӥз но гурезё шаерысь, Хевронысь, Давирысь, Анавысь, быдэс Иудей гурезьысь, быдэс Израиль гурезьысь [вань] енакимъёсты погыртӥз-виылӥз; городъёсынызы валче Иисус соосты каргаз-быдтӥз;22израиль пиослэн улоно музъемазы одӥг енаким но ӧз кыльы, Газае, Гефе, Азотэ гинэ кылизы.
23Тазьы Иисус быдэс музъемез киултӥз, кызьы вераз Кузё-Инмар Моисейлы; та музъемез Иисус израиль калыклы люкетлы сётӥз, вань выжыослы люкылӥз. Ожмаськонъёс дугдӥзы, музъем каньылэн улыны кутскиз.
Глава 11