Выбрать язык
Книги Ветхого Завета
Книги Нового Завета
с русским текстом1Иисус пересьмем, бадӟым арлыдэ вуэм бере Кузё-Инмар солы шуиз: «Тон пересьмид ни, бадӟым арлыдэ вуид ни, нош люкетлы басьтоно музъем туж трос на.2Кылё на та музъемъёс: филистим калыклэн вань улосвылъёсыз, быдэс Гессур [но Хананей] музъем.3Египет азьысь Сӥхор бордысен кутскыса Екрон ёрослэн уйпал люкетозяз кыстӥськись шаер Ханаан музъеме пыре, отын вить филистим кузёос: Газалэн, Азотлэн, Аскалонлэн, Гефлэн, Екронлэн кузёйыръёссы, аввейёслэн но кузёйыръёссы;4нош лымшор палаз быдэс музъем ханаан калык киын, – Сӥдонысь Меара дорысен кутскыса Афекозь, аморрейёслэн музъемзы дорозь,5озьы ик [Филистим] Гевла музъем, быдэсыз шундыӝужанпал Ливан, Ермон гурезь вӧзысь Ваал-Гадысен Емафе пырон дорозь.6Ливанысен Мисрефоф-Маимозь кыстӥськись гурезьёсын вань улӥсьёсты, Сӥдонын вань улӥсьёсты израиль пиослэн син азьысьтызы улляло. Кызьы Мон тонэ косӥ, Израильлы та музъемез люкетлы сётъя;7та музъемез Израильлэн укмыс выжыосызлы люк, озьы ик Манассия выжылэн ӝыны люкетэзлы [Иордан дорысен кутскыса быдӟым зарезь дорозь кыстӥськись музъемлэсь шундыпуксён палзэ соослы сёт, быдӟым зарезь дорозь со кыстӥськоз]».
8Нош Рувим но Гад выжыос Манассиялэн ӝыны люкетыныз ӵош Моисей киысь асьсэлы люкет басьтӥзы Иорданлэн тупаласьтыз, шундыӝужан палаз интыяськем музъемез, Кузё-Инмарлэн ляльчиез Моисей тазьы сётӥз,9Арнон ӧр дурысь Ароер дорысен, ӧр шорысь городэз но, быдэссэ Медева ӵошал интыез но Дивон дорозь;10озьы ик аморрейёслэн Есевонын кивалтыса улэм Сӥгон эксэйзылэсь вань городъёссэ – аммонъёслэн улоссы дорозь,11озьы ик Галаадэз, гессур но мааха калыкъёслэсь улосвылъёссэс, быдэс Ермон гурезез, Салхаозь кыстӥськись быдэссэ Васанэз,12Аштарофын но Едреяын эксэйын пукем Васанлэн Ог эксэезлэсь быдэс кунзэ. Моисейлэн виылэм, уллям рефаимъёсыз пӧлысь со одӥгназ кылемын вал.13Нош израиль пиос Гессурын, Маахаын улӥсьёсты, [хананейёсты] ӧз уллялэ, гессур но мааха калыкъёс та дырозь израиль калык пӧлын уло.
14Левийлэн выжыезлы гинэ со люкетлы музъем ӧз сёты: Израильлэн Инмарезлы Кузё-Инмарлы ваем курбонъёс – соослэн со люкетсы, кызьы соослы Кузё-Инмар вераз.
[Тани Иордан тупалась Моав нёжалъёсысь Иерихонлы ваче беринысь, Моисейлэн израиль пиослы выжыен-выжыен люкылэм, сётъям музъемез:]
15Рувим выжыысь пиослэн улы-бечеоссылы Моисейлэн люкетлы сётэм музъемез:16Арнон ӧр дурысь Ароер город дорозь кыстӥськиз, ӧр шорысь город дорозь кыстӥськиз, Медева вӧзысь быдэс нёжал солы сётэмын вал,17Есевон но ӵошкыт интыысь солэн вань городъёсыз, Дивон но, Вамоф-Ваал но, Беф-Ваал-Меон но,18Иааца, Кедемоф но Мефааф,19Кириафаим, Сӥвма но Емек гурезьысь Цереф-Шахар,20Беф-Фегор но Фасга гурезь выжыысь интыос, Беф-Иешимоф,21ӵошкыт интыысь вань городъёс, аморрейёслэн Сӥгон эксэйзылэн быдэс кунэз, со Есевонын эксэйын пукиз вал, но сое Моисей вииз, кызьы вииз мадиан калыклэсь азьвалтӥсьёссэ: Евиез но, Рекемез но, Цурез но, Хурез но, Реваез но, [со] музъемын улӥсь Сӥгонлэсь кивалтӥсьёссэ;22та виылэм муртъёсынызы огазе ик израиль пиос Веорлэсь Валаам пизэ, туно-пеллёез, мечен виизы.23Рувим пиослэн музъемзы Иордан дурозь кыстӥськиз. Рувим пиослэн улы-бечеоссы люкетлы таӵе музъем, городъёс, гуртъёс басьтӥзы.
24Гад выжыысь Гад пиослэн улы-бечеоссылы но озьы ик Моисей люкетлы музъем сётъяз:25соослы сётэм люкетэ пыризы Иазер кар, Галаадысь вань городъёс; аммон пиослэн Равва азьысь Ароер город дорозь кыстӥськись ӝыны музъемзы,26Есевонысен Рамаф-Мицфаен Ветонимозь, Маханаимысен Давир дорозь кыстӥськись музъемъёс,27нёжалысь Беф-Гарам, Беф-Нимра, Сокхоф но Цафон городъёс – Есевон эксэйлэн, Сӥгонлэн, эксэйлыкезлэн кылем бервылыз; люкетлы басьтэм музъемзы Иордан дорозь, Иорданлэн шундыӝужан палысьтыз Киннереф зарезь дорозь кыстӥськиз.28Тани Гад пиослэн улы-бечеоссылэн люкетлы басьтэм городъёссы, гуртъёссы.
29Манассиялы но, Манассиялэн ӝыны выжыезлы но Моисей люкет сётӥз, Манассия выжы пиослэн ӝыны люкетсылэн улы-бечеоссылы сётӥз;30люкет музъемзы кыстӥськиз Маханаим дорысен кутскыса, отчы пыре быдэс Васан, Васанлэн Ог эксэезлэн быдэс эксэйлыкез, Иаирлэн Васанысь вань гуртъёсыз, куатьтон городъёс;31нош Галаадлэн ӝыны люкетэз, Астарофен Едрея, Васанысь Ог эксэйлэн кивалтон городъёсыз Манассиялэн Махир пиосызлы, Махир пиослэн ӝыны люкетэзлэн улы-бечеоссылы сётэмын вал.
32Тани та музъемъёс Иорданлэн тупалаз Иерихонлы ваче беринэ, шундыӝужан палаз, Моав нёжалэ интыяськемын, со музъемез Моисей люкетлы сётылӥз.33Нош Левийлэн выжыезлы Моисей люкет ӧз сёты: Израильлэн Инмарез Кузё-Инмар Ачиз соослэн люкетсы луэ, кызьы соослы Со вераз.
Глава 13