Выбрать язык
Книги Ветхого Завета
Книги Нового Завета
с русским текстом1Пус чӧлтыса, Манассия выжылы но люкетлы музъем сюриз, уго со Иосифлэн нырысетӥ пиез вал. Манассиялэн нырысь вордскем пиезлы, Махирлы, Галаадлэн атаезлы, ожъёс дыръя кышкасьтэм муртлы, Галаадэн Васан сюризы.
2Манассиялэн мукет пиосызлэн улы-бечеоссылы но люкет музъем сюриз, Авиезерлэн пиосызлы но, Хелеклэн пиосызлы но, Асрииллэн пиосызлы но, Шехемлэн пиосызлы но, Хеферлэн пиосызлы но, Шемидалэн пиосызлы но. Тани Иосифлэн Манассия пиезлэн пиосызлэн улы-бечеоссы.
3Нош Салпаадлэн – Манассиялэн Махир пиезлэн, солэн Галаад пиезлэн Хефер пиезлэн пиез – пиосыз ӧй вал, нылъёсыз гинэ вал. Тани нылъёсызлэн нимъёссы: Махла, Ноа, Хогла, Милка но Фирца.4Соос лыктӥзы Елеазар священник доры, Навинлэн Иисус пиез доры, кузёйыръёс доры но соослы шуизы: «Кузё-Инмар Моисеез милемлы агай-вынъёсмы пӧлы люкет музъем сётыны косӥз». Кузё-Инмарлэн косонэзъя атайзылэн агай-вынъёсыз пӧлы соослы люкет музъем сётэмын вал.
5Иордан шур сьӧрысь Галаад но Васан музъемъёс сяна, Манассиялы мукет дас люкетъёс сюризы;6уго Манассиялэн [пиосызлэн] нылъёссы пиосыз пӧлы люкет музъем басьтӥзы, нош Галаад музъем Манассиялэн мукет пиосызлы сюриз.
7Манассиялэн [пиосызлэн] кунгожзы мынэ Асирысен Михмефаф пала, кудӥз интыяськемын Сӥхемлы ваче беринын; татысен кунгож мынэ бурпала, Ен-Таппуахын улӥсьёс доры.8Таппуах музъем Манассиялы шедиз, нош ачиз Таппуах, Манассиялэн кунгож дураз сылӥсь город, Ефрем пиослы сюриз.9Татысен кунгож Кана ӧр пала лэзиське, ӧрлэн лымшор палтӥз. Та Ефремлэн городъёсыз, Манассиялэн городъёсыз пӧлын ке но соос сыло. Манассиялэн люкет музъемезлэн кунгожез ӧрлэн уйпалтӥз мынэ но зарезь борды пыкъяськыса йылпумъяське.10Лымшор палан ке, со Ефремлэн, нош мар вань уйпалан, со Манассиялэн; шундыпуксён палан музъемзы зарезёзь кыстӥськиз; Асир люкет музъем борды соос уйпал ласянь пыкъясько, нош Иссахар люкет музъем борды шундыӝужан паласен пыкъясько.
11Иссахарлэн но Асирлэн люкет музъемъёсазы Манассия киулэ шедизы, Беф-Сан но солы тэрытскись интыос, Ивлеам но солы тэрытскись интыос, Дорын улӥсьёс но солы тэрытскись интыос, Ен-Дорын улӥсьёс но солы тэрытскись интыос, Фаанахын улӥсьёс но солы тэрытскись интыос, Мегиддонын улӥсьёс но солы тэрытскись интыос, Нафефлэн куинетӥ люкетэз [солэн гуртъёсыныз ӵош].12Манассия пиос та городъёсын улӥсьёсты улляны ӧз быгатэ, соин ик хананейёс та музъем вылэ улыны кылизы.13Израиль пиос кужым люкамзы бере хананейёсты выт тырись калык каризы, нош улляны ке, ӧз уллялэ.
14Иосифлэн пиосыз Иисуслы шуылӥзы: «Малы тон мыным люкетлы одӥг жеребе сётӥд, одӥг музъем люкет, – мон трос адямиё выжы ук, малы ке шуоно тазьы монэ Кузё-Инмар бакель кариз?»15Иисус соослы шуиз: «Тынад выжыяд калыкед трос ке, мын нюлэсъёсы но отын, ферезейёслэн, рефаимъёслэн музъемазы, аслыд инты сайкы, Ефрем гурезь тыныд ёркыт-ӟоскыт ке потэ».16Иосифлэн пиосыз шуизы: «Ефрем гурезез ми киултыны ум быгатэ, малы ке шуоно Беф-Санын, солэн котыраз улӥсьёслэн, Изреельын но мукет нёжалъёсын улӥсь вань хананей выжыослэн кадь ик ожмаськыны корт уробооссы вань».17Нош Иисус Иосиф выжылы, Ефремен Манассиялы, шуиз: «Тон трос калыко, кужымед тынад туж бадӟым; тынад одӥг гинэ жеребеед уз луы:18гурезь но тынад луоз, та нюлэс но; тон сое сайкод но самой пумозяз со тынад луоз; уго тон хананейёсты уллялод, соослэн ожмаськон корт уробооссы вань ке но, соос кужмоесь ке но, [тон соосты вормод]».
Глава 17