Выбрать язык
Книги Ветхого Завета
Книги Нового Завета
с русским текстом1Вань израиль пиос Сӥломе лыктӥзы, отчы вӧсяськон скиния пуктӥзы, уго та музъем соосын киултэмын вал.2Израиль пиос пӧлысь эшшо сизьым выжы аслыз люкет музъем басьтытэк кылиз на.3Соку израиль пиослы Иисус шуиз: «Кема-а сюлмаськытэк-тыршытэк улоды на атайёстылэн Инмарзылэсь Кузё-Инмарлэсь тӥледлы сётэм люкетсэ асьтэлы киултыны мынытэк?4Котькудӥз выжы быдэн куинь адямидэс сётэ; мон соосты ысто, соос султозы но музъем вылтӥ мынозы, со сярысь пыр-поч гожъялозы, кызьы сое люкетъёслы люкылоно, собере мон доры лыктозы;5сое сизьым люкетлы мед люкозы; Иуда ас палаз – лымшоре – мед кылёз, нош Иосифлэн выжыез ас палаз – уйпала – мед кылёз;6нош тӥ со музъемлэсь сизьымзэ ик люкетъёссэ пыр-поч гожъялэ но мыным вае: мон татын Инмармылэн Кузё-Инмарлэн азяз тӥ понна пус чӧлто;7нош левитъёслы тӥ пушкын люкет ӧвӧл, уго Кузё-Инмарлэн священникез луон – соослэн люкетсы со; нош Гад, Рувим, Манассиялэн ӝыны люкетэз асьсэлы люкет музъем басьтӥзы Иорданлэн шундыӝужан палаз, сое соослы Кузё-Инмарлэн Моисей ляльчиез сётӥз».
8Та адямиос султыса кошкизы, нош Иисус музъем гожъяны мынӥсьёслы таӵе косон сётӥз: «Мынэлэ, музъемез котырак ортче, адӟемды сярысь пыр-поч гожтэ но мон доры берен лыктэ; нош мон татын, Сӥломын, Кузё-Инмар азьын тӥ понна пус чӧлто».
9Соос мынӥзы но со музъем вылтӥ ортчизы, – [чаклазы-эскеризы] но со музъемез сизьым люкетлы люкылӥзы, отысь вань городъёс сярысь адӟемзэс-тодэмзэс книгае пыр-поч гожъязы, собере Иисус доры станэ, Сӥломе, лыктӥзы.10Кузё-Инмар азьын Сӥломын Иисус соос понна пус чӧлтӥз, отысен Иисус израиль пиослы музъемез люкетэн-люкетэн сётъяз.
11[Нырысетӥ] пус Вениамин выжыысь пиослэн улы-бечеоссылы усиз. Люкет музъемзы пус чӧлтэм бере Иуда пиослэн но Иосиф пиослэн люкет музъемзы вискы интыяськиз;12кунгожзы уйпал ласянь Иордан дурысен кутскиз, та кунгож Иерихон вӧзтӥ уйпалтӥз ортче, отысен шундыпуксён пала гурезе тубе но Беф-Авен луоё кыр дуннее вуыса дугдэ;13отысен кунгож Луз пала мынэ, Лузлэн, мукет сямен вераса, Вефильлэн, лымшор палаз, собере кунгож лэзиське Атароф-Адар пала, улӥ Беф-Оронлэн лымшор палысьтыз гурезь доры;14собере кунгож кожытске, мынэ зарезь пала, лымшоре, Беф-Оронлэн азьысьтыз, лымшор палысьтыз гурезь дорысь, Кириаф-Ваал, – мукет нимыз Кириаф-Иарим, – иуда пиослэн городзы дорын йылпумъяське. Та шундыпуксён палыз.
15Нош лымшор ласянь кунгож Кириаф-Иарим дорысен зарезь пала мынэ но Нефтоахысь потӥсь ошмес вуос доры вуэ;16собере кунгож лэзиське Рефаим нёжаллэн уйпалась, Енном пилэн нёжалэз азьысь гурезьлэн выжыяз, отысен Енном нёжал кузя лэзиське Иевуслэн лымшор палаз, отысен мынэ Ен-Рогел доры;17собере уйпалась кожытске но Ен-Шемеш пала мынэ, собере мынэ Гелилоф доры, кудӥз интыяськемын Адуммим вырйыллы ваче беринэ, отысен Рувимлэн Боган пиезлэн изэз доры ваське;18собере ӵошал вӧзтӥ уйпала кыстӥське, отысен ӵошалэ лэзиське;19татысен кунгож Беф-Хогла вӧзтӥ уйпала мынэ но Сылало зарезьлэн уйпалысьтыз сюм (залив) доры дугдэ, – Иорданлэн лымшор пал пумаз. Тани та лымшор палтӥз мынӥсь кунгож. Шундыӝужан палтӥз кунгож ортче Иордан шур кузя.20Тани Вениамин пиослэн улы-бечеоссылэн люкетлы басьтэм музъемзы, солэн котыр ласянь кыстӥськись кунгожъёсыз.
21Вениамин выжыысь пиослэн улы-бечеоссылы таӵе городъёс сюремын: Иерихон, Беф-Хогла но Емек-Кециц,22Беф-Арава, Цемараим но Вефиль,23Аввим, Фара но Офра,24Кефар-Аммонай, Афни но Гева – дас кык городъёс гуртъёсынызы валче.25Гаваон, Рама но Бероф,26Мицфе, Кефира но Моца,27Рекем, Ирфеил но Фарала,28Цела Елеф но Иевус, мукет нимыз Иерусалим, Гивеаф, Кириаф – дас ньыль городъёс гуртъёсынызы валче. Тӥни сыӵе Вениамин пиослэн улы-бечеоссылэн люкетлы басьтэм музъемзы.
Глава 18