Выбрать язык
Книги Ветхого Завета
Книги Нового Завета
с русским текстом1[Инмар] Кузё-Инмар Израильлы кема дыр ӵоже каньылэн, вань тушмонъёсызлэсь, котыр ласянь ёртӥсьёслэсь, кышкатэк улон сётэм бере Иисус пересьмиз, бадӟым арескы вуиз.2Соку Иисус вань израиль [пиосты], соослэсь тӧрооссэс, соослэсь кивалтӥсьёссэс, соослэсь судьяоссэс, эскерись-чакласьёссэс дораз ӧтьытӥз но соослы шуиз: «Мон пересьми ни, бадӟым арескы вуи ни.3Тӥ ваньзэ адӟиды, Инмарды Кузё-Инмар тӥляд син азяды вань та калыкъёсын мар кариз, уго Инмарды Кузё-Инмар Ачиз тӥ понна ожмаськиз.4Тани мон, пус чӧлтыса, таоссэ кылемзэ калыкъёсты тӥледлы люкылӥ, озьы ик Иордан дурысен кутскыса шундыпуксён палась быдӟым зарезь дорозь улӥсь вань калыкъёсты мон быдтӥ соослэсь музъемзэс тӥляд выжыостылы люкетлы сётон понна.5Инмарды Кузё-Инмар Ачиз соосты [кулыса бырытозязы] тӥ дорысь уллялоз; [соос вылэ кыр пӧйшуръёсты лэзёз, соосты, соослэсь эксэйёссэс но] тӥ азьын быдтоз, соослэсь музъемзэс асьтэлы люкетлы мед басьтоды шуыса, кызьы вера вал тӥледлы Инмарды Кузё-Инмар.6Соин ик Моисей законлэн книгаяз гожтэмез тыршы номырзэ но, пичи но сӧрытэк утьыны, ваньзэ быдэсъяны, солэсь бурпала но, паллян пала но эн кожылы.7Тӥ пӧлы кылем калыкъёсын кусып эн возе, соослэн инмаръёссылэсь нимзэс тодады но эн возе, [соослэн нимынызы] кыл эн сётэ, соослы эн йыбыртъялэ, соослы ужаса-тыршыса эн улэ,8асьтэлэн Инмарды Кузё-Инмар бордын юн возиське, кызьы тӥ та дырозь лэсьтӥськоды вал.9Кузё-Инмар тӥляд азьысьтыды быдӟымесь, кужмоесь калыкъёсты улляз, та нуналозь но тӥляд азяды нокин но пумит сылыны ӧз чида;10тӥ пӧлысь одӥгез сюрссэ улля, уго Инмарды Кузё-Инмар Ачиз тӥ понна ожмаське, кызьы Со тӥледлы вера вал.11Соин ик котькызьы но тырше Инмардэс Кузё-Инмарез яратыны.12Нош Солэсь палэнскиды ке, тӥ пӧлы улыны кельтэм калыкъёсын кушласькиды ке, соос борды лякиськиды ке, тӥ соос доры, соос тӥ доры ветлыны кутскизы ке,13соку тодэ: Инмарды Кузё-Инмар та калыкъёсты тӥ пӧлысь уз ни улля, соос тӥледлы кыӵес интыын луозы, калтон-сьӧлтаськон, урдлыостылы сюло-урыс, синъёстылы бышкись будос интыын луозы, – Инмардылэн Кузё-Инмарлэн тӥледлы сётэм та ӟеч музъем вылысь тӥледыз быдтытозьлы.
14Тани, мон али кошкисько дунне вылысь ваньмылэн мыноно сюрес выламы. Нош тӥ вань сюлмыныды, вань лулыныды тодӥськоды – Инмардылэн Кузё-Инмарлэн тӥ сярысь верам вань ӟеч кылъёсыз пӧлысь одӥгез но кылыз пайдатэм ӧз кыльы: ваньмыз тӥ понна быдэсмиз, одӥгез но кылыз быдэсмытэк ӧз кыльы.15Кызьы Инмардылэн Кузё-Инмарлэн тӥледлы верам вань ӟеч кылъёсыз тӥ вылын быдэсмизы, озьы ик Кузё-Инмар тӥ вылын быдэстоз котькудзэ лек кылэз, та ӟеч музъемысь, Инмардылэн Кузё-Инмарлэн тӥледлы сётэм музъемысьтыз, тӥледыз быдтытозяз.16Нош тӥ Инмардылэн Кузё-Инмарлэн тӥледлы сётэм сӥзён-косонэз сьӧры потӥды ке, мыныса мукет инмаръёслы ужаса-тыршыса, йыбыртъяса улӥды ке, соку тӥ вылэ Кузё-Инмарлэн вожпотонэз ӝуатскоз но [Кузё-Инмарлэн] тӥледлы сётэм та ӟеч музъем вылысьтыз ӝоген кулоды-быроды».
Глава 23