Выбрать язык
Книги Ветхого Завета
Книги Нового Завета
с русским текстом1Галаад пи Иеффай кышкасьтэм адями вал; солэн анаез азыса-калгыса улӥз. Галаадлэсь вордскиз Иеффай.2Галаадлэн аслаз кышноез но пи нуныос вайиз. Соос быдэ вуэмзы бере Иеффаез атай юртысьтыз уллязы, солы шуизы: «Атай юртысьтымы тон люкет басьтыны кулэ ӧвӧл, тон уго мукет кышномуртлэн пиез».3Иеффай агай-вынъёсыз дорысь пегӟиз но Тов музъеме улыны интыяськиз; ужатэк улӥсьёс со котыре люкаськылӥзы, соин ӵош ож сюресъёс вылэ потылӥзы.
4Кӧня ке но дыр ортчыса, аммон калык Израильлы пумит ожмаськыны мынӥз.5Аммонъёс израиль калыкен ожмаськыку, Галаадысь тӧроос Иеффаез Тов музъемысь басьтыны лыктӥзы,6соос Иеффайлы шуизы: «Ойдо ми доры, милемлы азьветлӥсь лу, аммон калыкен нюръяськомы».7Галаадысь тӧроослы Иеффай шуиз: «Тӥ ӧвӧл-а монэ синазькыль карисьёс, атай юртысьтым уллясьёс? Али, шугадӟон тӥ доры вуыку, малы мон доры лыктӥды?»8Галаадысь тӧроос Иеффайлы шуизы: «Со понна ми тон доры лыктӥмы: милемын ӵош ойдо аммон калыкен жугиськыны, Галаадын вань улӥсьёслы тон кузёйыр лу».9Галаадысь тӧроослы Иеффай шуиз: «Монэ аммон калыклы пумит ожмаськыны берыктӥды ке, Кузё-Инмар соосты мон кие сётӥз ке, соку мон тӥледлы кузёйыр луо-а?»10Галаадысь тӧроос Иеффайлы шуизы: «Асьмелэн куспамы адӟисьмы Кузё-Инмар мед луоз, мае ке ми лэсьтӥмы, тынад верамедъя лэсьтомы!»
11Соку Иеффай Галаадысь тӧроосын ӵош кариськыса мынӥз, калык сое аслыз кузёйыр, азьветлӥсь кариз; Иеффай вань кылъёссэ Массифаын Кузё-Инмар азьын вераз.12Иеффай иворчиоссэ аммон эксэйлы вераны ыстӥз: «Мар тыныд мынэсьтым кулэ, малы тон мынам музъем вылам ожмаськыны лыктӥд?»13Иеффайлэн иворчиосызлы аммон эксэй шуиз: «Израиль Египетысь лыктыкуз, Арнонысен Иавокозь, Иордан дорозь кыстӥськись музъемме киултӥз; ӟечкын мыным сое берыкты, [соку мон кошко]».
14[Иворчиос Иеффай доры берытскизы.] Иеффай нош ик иворчиосты аммон эксэй доры15вераны ыстӥз: «Тазьы шуэ Иеффай: Израиль моав калыклэсь, аммон калыклэсь музъемзэ ӧз киулты;16татчы Египетысь лыктыкуз, израиль калык кыр дуннетӥ Горд Кам зарезь дуре кошкиз, Кадесэ лыктӥз;17отысен Израиль иворчиоссэ Едомысь эксэйлы вераны ыстӥз: ”Лэзь монэ музъем ваментӥд ортчыны”, нош Едомысь эксэй сое санэ ӧз поны; Моавысь эксэй доры но со иворчиоссэ ыстӥз, нош со но соглаш ӧз луы; соин ик Израиль Кадесэ кылиз.18Кыр дуннее кошкиз, Едом музъеме, Моав музъеме ӧз пыры, вӧзтӥз ортчиз; Моав музъемлэн шундыӝужанпал люкетэз доры вуыса, Арнон сьӧры со станэн дугдӥз; Моав музъемлэн люкетаз ӧз пыры, уго Арнон шур Моавлэн бесменэз*а луэ.19Израиль иворчиоссэ ыстӥз Сӥгон доры, Есевонысь аморрей эксэй доры; солы Израиль шуиз: ”Лэзь милемыз, музъем ваментӥд потыса, асьмелэн музъемамы мыныны”,20нош Сӥгон Израилез ас музъемез пыр потыны соглаш ӧз луы; Сӥгон, вань калыксэ люкаса, Иааца дуре интыяськиз, отысен Израильлы пумит ожмаськон ӝутӥз.21Соку Израильлэн Инмарез Кузё-Инмар Сӥгонэз вань калыкеныз валче Израиль киулэ сётӥз но соосты со погыртӥз. Табере Израиль татын улӥсь аморрей калыклэсь быдэс музъемзэ люкетлы басьтӥз.22Аморрейёслэсь быдэс музъемзэс – Арнон дурысен Иавок шур дурозь, кыр дуннеысен кутскыса Иордан шур дорозь – люкетлы басьтӥз.23Озьы, Израильлэн Инмарез Кузё-Инмар аморрейёсты Аслаз израиль калыкезлэн азьысьтыз улляз, нош тон сое люкетлы басьтыны малпаськод?24Хамос инмаред мар тыныд сётӥз, со тон киын ӧвӧл-а? Милям но киуламы вань со гинэ, мае милемлы люкетлы сётӥз Инмармы Кузё-Инмар.25Тон Сепфорлэн Валак пиезлэсь, Моав эксэйлэсь, умойгес шат? Израилен со ченгешыса улӥз-а, яке соин ожмаськыса со улӥз-а?26Куинь сю ар ӵоже ини израиль калык Есевонын но со котырысь гуртъёсын, Ароерын но со котырысь гуртъёсын улэ, Арнонлы матысь вань городъёсын со улэ; малы бен тӥ со виын ӧд талалэ [соосты]?27Мон тон азьын янгыш ӧвӧл, нош тон мыным урод ужъёс лэсьтӥськод – мыным пумит ожмаськыны султӥськод. Судить карись Кузё-Инмар туннэ израиль пиос но аммон калык вискын судья мед луоз!»28Аммон эксэй Иеффайлэсь солы вераны ыстэм кылъёссэ санэ ӧз поны.
29Иеффай вылын Кузё-Инмарлэн Духез улӥз; со ортчиз Галаад пыр, Манассия пыр, Галаадысь Массифаез пыр потӥз, отысен аммон калык доры мынӥз.30Кузё-Инмар азьын Иеффай тазьы кыл сётӥз: «Аммон калыкез мынам киулам сётӥд ке;31Аммон музъемысь вормонэн берытскыкум, мынам пумитам юртэлэн капкатӥз кин нырысь потоз, со Кузё-Инмарлы сётэмын луоз, тылын сутӥськись курбон каро сое».
32Иеффай аммон калыкен ожмаськыны лыктӥз, Кузё-Инмар соосты Иеффай киулэ сётӥз;33Аммон калык туж зол куашкатэмын вал, Ароер карысен Минифозь, Авель-Керамим кар дорозь ик кызь городъёс куашкатэмын вал; израиль пиос азьын аммон калык йырзэ ошиз.
34Табере Иеффай дораз Массифае берытскиз; соку солэн пумитаз тимпан шудыса, кырӟаса-эктыса нылыз потӥз: солэн со одӥг гинэ нуныез вал, со сяна пиосыз но, мукет нылъёсыз но солэн ӧй вал.35Сое Иеффай адӟиз но дӥськутсэ кесьыса шуиз: «Эй, нылы! Тон монэ погыртӥд; тон сюлмам куректон вайид! Кузё-Инмар азьын [тон сярысь] ымме усьтӥ, табере сётэм кылылэсь куштӥськыны уг ни быгатӥськы».
36Нылыз солы шуиз: «Атае! Тон Кузё-Инмар азьын ымдэ усьтӥд – быдэсты ук сое, мае вераз тынад кылыд-ымыд Кузё-Инмар азьын, соку тон пыр Кузё-Инмар тушмонъёсыдлы – аммон калыклы – пунэмзэ берыктӥз».37Атаезлы со шуиз: «Тае гинэ лэсьты мыным: кык толэзьлы монэ лэзь, мон мыно, гурезьёс йылэ тубо но, эшъёсыным огазьын бӧрдыса, ныл дырме келяло».
38Атаез солы шуиз: «Мын». Сое кык толэзьлы лэзиз. Эшъёсыныз ӵош мынӥз но, гурезьёсын бӧрдыса, пинал дырзэ келяз.39Кык толэзь ортчем бере со атаез доры берытскиз. Атаез Кузё-Инмар азьын сётэм кылзэ быдэстӥз; та ныл борды одӥг пиосмурт но ӧз йӧтӥськылы. Израильлы таӵе сям кылдӥз:40Израиль нылъёс арлы быдэ ньыль нунал ӵоже Галаадысь Иеффайлэсь нылзэ бӧрдыса буре вайыны ветло вал.
*а 11:18 бесмен – межа, граница
Глава 11