Выбрать язык
Книги Ветхого Завета
Книги Нового Завета
с русским текстом1[Филистим ожгарчиос израиль калыкен ожмаськыны дасяськизы.] Самуил быдэс Израильлы кыл вераз. Израиль пиос филистим калыклы пумит ожен ӝутскизы, соос Авен-Езер вӧзы интыяськизы, нош филистим ожгарчиос Афек вӧзы интыяськизы.2Филистим ожгарчиос израиль ожгарчиослэн пумитазы султӥзы, ожмаськон пуромиз, филистим ожгарчиос израиль пиосты вормизы, ог ньыль сюрс пиоссэс погыртӥзы.3Калык лагере люкаськиз; израиль калыклэн тӧроосыз шуизы: «Филистим калык азе Кузё-Инмар туннэ малы асьмеды погыртӥз? Кузё-Инмарлэн сӥзён-косонэныз ковчегез асьмелы Сӥломысь басьтоме, со асьме пӧлтӥ мыноз но тушмонъёсмылэн кизылэсь утёз».4Калык воргоронъёсты Сӥломе ыстӥз, отысь херувимъёс вылын пукись Саваоф Кузё-Инмарлэсь ковчегзэ вайизы; Инмарлэн сӥзён-косонэныз ковчег вӧзын Илийлэн кык пиосыз Офни но Финеес сылӥзы.
5Лагере Кузё-Инмарлэн сӥзён-косонэныз ковчегез ваем бере быдэс Израиль сыӵе куашетон ӝутӥз – музъем ик зурказ.6Филистим калык куаш поттыса кырӟам куараосты кылэм бераз шуиз: «Еврейёслэн лагерязы мар пумысен куаш поттыса кырӟало?» Тодӥзы: Кузё-Инмарлэн ковчегез лагере вуэм.7Филистим калык куалектыса шуиз: «Соослэн лагерязы Инмар лыктэм». Шуизы: «Куректон-кайгу асьмелы! Толон но, тӥзьнал но номыр сыӵе-таӵеос ӧй вал.8Куректон-кайгу асьмелы! Та кужмо Инмарлэн киулысьтыз кин асьмеды мозмытоз на? Та – со – кыр дуннеысен египет калыкез пӧртэм курадӟонъёсын погыртӥсь Инмар со.9Филистим калык, юнматскы, кышкасьтэм лу, еврейёслы медо-ляльчи луыны медад кыле, кызьы али соос тӥ дорын медо-ляльчи радын уло; кышкасьтэмесь луэ, соослы пумит ожмаськыны ӝутске».10Филистим пиос ожмаськыны кутскизы, израиль пиосты погыртӥзы, ваньзы асьсэлэн балаганъёссы доры бызьыны кутскизы, туж тросэз виемын вал, израиль калыклэн пыдын ожмаськисьёсыз пӧлысь куамын сюрсэз погыртэмын вал.11Инмарлэсь ковчегзэ киултӥзы, Илийлэн кык пиосыз, Офни но Финеес, кулӥзы.
12Вениамин выжыысь одӥг мурт ож бусыысь бызьыса кошкиз но со нуналэ ик Сӥломе вуиз; выл дӥськутэз кесяськемын, йыр вылаз тузон пызьнамын вал.13Со вуыку, Илий пуке вал сюрес дурын капка вӧзысь пукон вылын, со учкыса улӥз, уго солэн сюлмыз Инмарлэн ковчегез понна куалекъяз. Со адями, городэ вуыса, ковчег сярысь ялэм бере быдэс город бадӟым куараен кесяськыса бӧрдыны кутскиз.14Викышъям куараосты кылыса, Илий шуиз: «Мар таӵе куашетон та?» Соку ик со адями вуиз но Илийлы ялӥз.15Илийлы соку укмыстон тямыс арес вал; синъёсыз бездӥзы, адӟемысь дугдӥз.16Со адями Илийлы шуиз: «Ожгарчиослэн сылон интыысьтызы мон лыктӥ, туннэ ож бусыысь мон пегӟи». Соку Илий шуиз: «Пие, мар луиз?»17Иворчи ответ сётыса шуиз: «Филистим калык азьысь израиль пиос пегӟоно луизы, туж трос калыкмы быдтэмын, кыкез ик пиосыд, Офниен Финеес, кулӥзы, Инмарлэн ковчегез мурт кие сюриз».18Инмар ковчег сярысь верам бере Илий капка выжыын сылӥсь пукон вылысь ымныр вылаз усиз, сюрлызэ тӥяз но кулӥз; уго со пересь, секыт мугоро вал. Ньыльдон ар ӵоже со Израильлэн судьяез вал.
19Кенэз, Финееслэн кышноез, секытэн вал, нуны ваён дырыз вуэмын ни вал. Инмар ковчегез киултэм сярысь, картэзлэн атаезлэн, аслаз кузпалызлэн кулэмзы сярысь ивор кылэм бераз пыдес вылаз усиз но нуны вайиз, – вӧсь луон со доры вуиз уга.20Кулыны курадӟыкуз, со вӧзын сылӥсь кышномуртъёс солы шуизы: «Эн кышка, тынад пи нуныед вордскиз». Нош со номыр но ӧз вазьы, нокыӵе но ӧз кариськы.21Пичи нунылы Ихавод*а ним сётыса шуиз: «Израиль бордысь данлык кошкиз» – Инмарлэсь ковчегзэ басьтэм бере, картэзлэн, картэзлэн атаезлэн кулэмзы бере.22Со шуиз: «Израиль бордысь данлык кошкиз, Инмарлэн ковчегез мурт кие сюриз».
*а 4:21 Ихавод – «данлыктэк кылён» шуэм луэ
Глава 4