Выбрать язык
Книги Ветхого Завета
Книги Нового Завета
с русским текстом1Вениамин выжыын кыӵе ке но адями вал, солэн нимыз Кис, нимо-дано адями, Афийлэн Бехораф пиезлэн, солэн Церон пиезлэн Авиил пиезлэн пиез вал со.2Солэн чебер, егит Саул нимо пиез вал; израиль пиос пӧлын солэсь чеберез ӧй вал; быдэс йырлы со ас калыкезлэсь ӝужытгес вал.
3Кислэн, Сауллэн атаезлэн, ишакъёсыз ышизы. Соку Кис Саул пиезлы шуиз: «Одӥгзэ медоез бордад кут но мын, ишакъёсты утча».4Ефрем гурезез ортчиз, Шалиша музъемез пыр потӥз, но ишакъёссэс ӧз шедьтэ; Шаалим музъемез ортчизы, отын но соос ӧвӧл; Вениамин музъемез пырпотӥз, но отысь но ӧз шедьтэ.5Цуф музъеме вуэмзы бере Саул ӵош ветлӥсь медоезлы шуиз: «Ойдо, бертом, ишакъёсын сэрен атае асьме понна сюлмаськоно медаз луы».6Нош медо солы шуиз: «Тани та городын Инмарлэн адямиез вань, гажано мурт; мар гинэ со уг вера, ваньмыз быдэсме. Ойдо со доры ветлом, оло нош вералоз, кудтӥз сюрестӥ асьмелы мыноно».7Саул медоезлы шуиз: «Тани асьмеос со доры мынӥмы ке, мар солы нуомы? Ныпъетамы няньмы ӧвӧл ини, кузьыммы но ӧвӧл Инмар адямилы сётыны. Мармы вань асьмелэн?»8Нош ик медо Сауллы ответ сётыса шуиз: «Мынам киям азвесь сӥкльлэн ньылетӥ люкетэз вань; сое мон Инмар адямилы сёто но, со асьмелы сюрес возьматоз».9Вазен израиль калык пӧлысь кин ке Инмарлэсь куриськыны мынон азяз тазьы шуоз вал: «Азьпалзэ адӟись доры мыном». Уго али кинэ ”пророк” шуо, вазен сое ”азьпалэз адӟись” шуозы вал.10Соку Саул медоезлы шуиз: «Умой тон вераськод; ойдо мыном». Инмар адямилэн улон городаз мынӥзы.
11Вылӥе, городэ тубыкузы, вулы лыктӥсь нылъёсты пумитазы, соослэсь юазы: «Татын азьпалзэ адӟись вань-а?»12Нылъёс соослэн пумитазы тазьы шуизы: «Вань. Тани со, тынад азьпалад, но дырты, уго со городэ туннэ соин лыктӥз: гурезь йылын туннэ калык курбон сётэ.13Городэ пыриды ке, сое учыртоды, гурезь йылэ нуназе карыны тубемезлэсь азьло; уго солэн вуэмезлэсь азьло калык сиськыны уз кутскы, малы ке шуоно со курбонэз бакель кароз, собере ӧтем калык сиськыны кутскоз. Мынэлэ, сое учыртоды на».14Соос городэ мынӥзы. Городэ вуэм бере, тани, Самуил, гурезь йылэ мыныны шуыса, соослэн пумитазы потэ.
15Сауллэн лыктэмезлэсь нунал азьло Кузё-Инмар Самуиллы усьтӥз, Со шуиз:16«Ӵуказе та вакытэ тон доры Мон Вениамин выжыысь адямиез лэзё, тон сое израиль калыкелы кивалтӥсь карыны вӧйын зырӟы, со Мынэсьтым калыкме филистим калыклэсь утёз; Ас калыке шоры учки, уго солэн викышъямез Мон доры вуиз».
17Саулэз адӟем бераз Самуиллы Кузё-Инмар шуиз: «Тани со Мынам верано адямие, со Мынам калыкеным кивалтоз».18Соку Саул, кар капка пыр Самуил доры лыктыса, солэсь юаз: «Вера мыным, кытын азьпалзэ адӟисьлэн коркаез?»19Сауллы ответ сётыса, Самуил шуиз: «Мон азьпалзэ адӟись, мынам азьпалтӥм гурезь йылэ мын; туннэ тӥ монэн ӵош нуназе кароды, ӵукна дорад бертыны лэзё, мар тынад сюлэмад, ваньзэ верало.20Нош куинь нунал талэсь азьвыл ышем ишакъёсыд сярысь эн сюлмаськы, соос сюризы ни. Израильлэсь вань дунолэсь но дунозэ кинлы сётоно? Тыныд но, тынад атаедлэн выжыезлы ӧвӧл-а?»21Саул ответ сётыса шуиз: «Израиль калыклэн тужгес пичи Вениамин выжыысьтыз мон ӧвӧл-а? Мынам выжые Вениамин выжылэн самой покчиез улы-бечеез ӧвӧл-а? Малы тон мыным та кылъёсты вераськод?»
22Самуил Саулэз, солэсь медозэ кутӥз но корка пыртӥз, ог куамын ӧтем куноос азьын соосты нырысетӥ интые пуктӥз.23Сиён пӧрасьлы Самуил шуиз: «Тыныд сётэм люкетэз сёт, кудӥз сярысь мон тыныд шуи: ”Ас дорад сое пон”».24Сиён пӧрась пельпумез со бордысь люкетъёсын басьтӥз но Саул азе понӥз. [Самуил] шуиз: «Та люкет нимаз понэмын вал, сое ас азяд поныса си, уго со тон понна та дырозь воземын, калыкез ӧтчам дырысен». Та нуналэ Саул Самуилэн ӵош сиськизы.25Собере гурезь йылысь городэ васькизы, Самуил Саулэн липет йылын вераськизы, [Сауллы отчы валиськизы, со отын изиз].
26Ӵукна соос тазьы султӥзы: куазь ӟардэм бере Самуил корка йылэ Сауллы вазиськыса шуиз: «Султы, мон тонэ келяло». Саул султӥз, кыкназы ик коркась потӥзы, со но, Самуил но.27Город пуме вуыкузы, Самуил Сауллы шуиз: «Медоедлы вера, со азьпаламы мед мыноз». Со азязы мынӥз. «Тон али дугды, мон тыныд Инмарлэсь верамзэ иворто».
Глава 9