Выбрать язык
Книги Ветхого Завета
Книги Нового Завета
с русским текстом1Самуил вӧйын сосуд кутӥз но Сауллэн вылаз кисьтӥз, чупаса солы шуиз: «Тани, Кузё-Инмар Аслыз люкетлы басьтэм калыкезлы тонэ кивалтӥсь карыны вӧйын зырӟе [Израильын, тон Кузё-Инмарлэн калыкеныз кузёяськод, котыртэм тушмонъёссылэн киулысьтызы соосты утёд. Кузё-Инмар Аслыз люкетлы басьтэм калыкезлы тонэ эксэй кариз шуыса, тани паймымон тодмет]:2мон дорысь кошкыкуд, Вениамин музъемысен, Целцахысен, Рахильлэн шайгу вӧзысеныз кык адямиосты пумиталод, соос тыныд шуозы: ”Утчано мумы ишакъёсыд сюризы, атаед ишакъёсыз сярысь вунэтӥз ни, табере со тӥ сярысь сюлмаське, шуэ: ”Мар луиз пиеным?”3Отысен азьпала вамыштод, Фаворысь тыпы сурд доры вуод, отысен Инмар доры Вефиле мынӥсь куинь адямиосты пумиталод: одӥгез куинь кечпи нуэ, мукетыз куинь бискыли нянь, куинетӥез винаен тырмытэм сепыс нуэ.4Тонэн соос ӟечбуръяськозы, тыныд кык бискыли нянь сётозы, соослэн киысьтызы сое басьтод.5Инмар вырйылэ (Гивае) вуэм берад, отын филистим ожгарчиослэн возьмаськисьёссы сыло, [филистим калыклэн кузёйыръёсыз но], городэ пырод но отысен гурезь йылысь васькись пророкъёсты пумиталод, соослэн азязы – псалтирь, тимпан, чипчирган, крезь, – соос азьпалзэ тодытыса верало;6Кузё-Инмарлэн Духез тон вылэ лэзиськоз но тон соосын ӵош азьпалзэ тодытыса вералод, мукет адями луод.7Та паймымон тодметъёс быдэсмем бере, соку ваньзэ, мае быгатэ киыд, лэсьты, уго тонэн огазьын Инмар.8Мынэсьтым азьлогес тон Галгалэ мын, отчы мон но тылын сутӥськись курбонъёс, тупаса улонлы сӥзем курбонъёс сётыны тон доры мыно; тон доры вуэмме сизьым нунал возьма, лыктӥ ке, возьмато, мар тыныд лэсьтыны кулэ луоз».
9Самуил дорысь кошкыны берытскем бераз ик Инмар солэсь сюлэм малпанзэ воштӥз; вань со верам паймымон тодметъёс со нуналэ ик быдэсмизы.10Вырйыл доры вуэмзы бере соосын пророкъёс пумисько, соку со вылэ Инмарлэн Духез васькиз но со соос пӧлын азьпалзэ тодытыса улӥз.11Толон но, тӥзьнал но сое тодӥсьёс пророкъёсын ӵош азьпалзэ тодытыса верамзэ кылӥзы но калык пӧлын ог-огзылы тазьы шуыны кутскизы: «Мар таӵе та Кислэн пиеныз луиз? Оло, Саул но пророк луиз-а?»12Калык пӧлысь одӥгез ответ сётыса шуиз: «Нош соосызлэн кин атайзы?» Соин ик таӵе веран кылдӥз: «Оло, Саул но пророк луиз-а?»13Азьпалзэ тодытыса верамысь дугдэм бераз гурезь йылэ кошкиз.
14Сауллэн агаез солы но, солэн медоезлы но шуиз: «Кытчы тӥ ветлӥды?» Со шуиз: «Мумы ишакъёсты утчаны ветлӥмы, ӧм шедьтэ соосты но Самуил доры пыримы».15Сауллэн агаез шуиз: «Вера, мар тӥледлы Самуил мадиз».16Соку Саул агаезлы шуиз: «Вераз, ишакъёсты сюризы ни, пе». Нош эксэй луон сярысь мар солы Самуил мадиз, со сярысь номыр ӧз вера, ватӥз.
17Самуил калыкез Кузё-Инмар доры Массифае люказ но18израиль пиослы шуиз: «Тазьы шуэ Израильлэн Инмарез Кузё-Инмар: израиль калыкез Мон Египетысь поттӥ, египет калыклэн, тӥледыз ултӥясь вань эксэйёслэн киулысьтызы мозмытӥ.19Нош табере тӥ вань шугадӟонъёстылэсь, ӝоже-куре усёнъёстылэсь мозмытӥсь Инмардылэсь куштӥськиды но Солы шуиды: ”Милемлы эксэй пукты”. Табере Кузё-Инмар азе выжыен, улыен-бечеен султэ».
20Самуил Израиль выжыосты матэ лыктыны косӥз, пус усиз Вениамин выжылы.21Вениамин выжылы вань улыосыныз-бечеосыныз ӵош матэгес лыктыны косӥз, Матрий бечелы пус усиз; Матрий бечеысь пиосмуртъёсты султытӥз но Кислэн Саул пиезлэсь нимзэ поттӥз; сое утчазы, но ӧз шедьтэ.22Эшшо Кузё-Инмарлы вазиськизы: «Лыктоз на-а со татчы?» Кузё-Инмар шуиз: «Тӥни со воз пушкы пегӟем».
23Бызьыса мынӥзы но сое отысь поттӥзы, со калык шоры султӥз, быдэс йырлы котырысьтыз калыклэсь со ӝужытгес вал.24Самуил вань калыклы шуиз: «Адӟиськоды-а, кинэ Кузё-Инмар бырйиз? Со кадез быдэс калык пӧлын ӧвӧл». Соку вань калык бадӟымен черектӥськиз: «Кема мед улоз эксэй!»
25Эксэйлэсь правооссэ Самуил калыклы тодытӥз но книгае гожтӥз, сое Кузё-Инмар азе понӥз. Собере вань калыкез, вань адямиосты доразы бертыны лэзиз.26Саул но Гивае дораз бертӥз; соин ӵош кышкасьтэм пиос мынӥзы, соослэн сюлэмзы борды Инмар йӧтӥськиз.27Нош лэсянтэм адямиос вераськизы: «Со-а асьмеды утёз?» Соос сое кулэтэм каризы, саламъёс-кузьымъёс ӧз вае. Нош со та пумысен нокыӵе но ӧз кариськы.
Глава 10