Выбрать язык
Книги Ветхого Завета
Книги Нового Завета
с русским текстом1Галаад шаерысь Фесва карын улӥсь Илия [пророк] Ахавлы шуиз: «Израильлэн Инмарез Кузё-Инмар улэп, Кин азьын мон сылӥсько! Та аръёсы лысву но, зор но уз луы, мынам кылыя гинэ соос луизы ке луозы».2Солы Кузё-Инмар дорысь верамын вал:3«Мын татысь, шундыӝужан пала кариськы, Иорданлэн ваче пумитысьтыз бызись Хораф ӧр дуре ватӥськы.4Со ӧрысь тон ву юод, нош тонэ сюдыны Мон кырныжъёсты косӥ».5Со мынӥз но Кузё-Инмарлэн верам кылызъя лэсьтӥз; Иорданлэн ваче пумитысьтыз бызись Хораф ӧр дуре мыныса дугдӥз.6Ӵукнаосы кырныжъёс солы нянен сӥль вайылӥзы, ӝытъёсы но нянен сӥль вайылӥзы, нош ву со шурысь юылӥз.7Кӧня ке дыр ортчыса, та ӧр куасьмиз, уго музъем вылэ зор ӧз ни усьы.
8Илиялы Кузё-Инмар дорысь верамын вал:9«Султы но Сӥдонысь Сарепта каре мын, кӧня ке но отын ул; отысь палкышноез тонэ сюдыса возьыны косӥ».10Со султӥз но Сарептае кошкиз. Кар капка доры вуэм бераз адӟиз: отӥ, пу бичаса, палкышно ветлэ. Сое дораз ӧтьыса, Илия шуиз: «Ву тыронысьтыд юыны ӧжытак вудэ сёт вал».11Палкышно вузэ вайыны кошкиз, нош Илия солэн бӧрсяз кеськыса шуиз: «Одӥг шорем ке но няньдэ мыным но вай».12Палкышно шуиз: «Тынад Инмаред Кузё-Инмар улэп! Мынам нокыӵе но пыжем сиёнэ ӧвӧл, вышкыям одӥг кырым пызе вань, кувшинам ӧжыт гинэ вӧйы вань. Тани, ог кык пис шедьтӥ ке, аслым но, аслам пиелы но сиён дасяны мыно, тае сиёмы но куломы».13Илия солы шуиз: «Эн кышка, мын, мар верад, сое лэсьты; но нырысь ик талэсь пичи гинэ юмал нянь мыным дася, вай мыным, нош аслыд, пиедлы но берлогес дасялод;14уго тазьы шуэ Кузё-Инмар Израильлэн Инмарез: ”Кузё-Инмар музъемлы зор сётытозь, вышкыысь пызь уз быры, кувшинысь вӧй но уз кулэсмы”».15Со мынӥз но, кызьы Илия косӥз, озьы лэсьтӥз; озьы кӧня ке дыр ӵоже со ачиз но, семьяез но, Илия но кӧтсэс тырыса улӥзы.16Вышкыысь пызь ӧз быры, кувшинысь вӧй ӧз кулэсмы – Кузё-Инмарлэн Илия пыр верам кылызъя луиз.
17Та бере та кышномуртлэн, кузёкалэн, пиез висьыны кутскиз, сокем кужмо черлаз, шоканэз ик дугдӥз.18Кышномурт Илиялы шуиз: «Инмарлэн адямиез, мыным но, тыныд но маиз? Мон доры тон сьӧлыкъёсме тодам вайытыны но пиме виыны лыктӥд».19Илия палкышнолы шуиз: «Вай мыным пидэ». Кышномуртлэн киысьтыз пияшез басьтӥз но коркалэн бадӟым палаз, солэн улон интыяз, нуиз; валес вылэ понэм бераз20Илия Инмарлы вӧсяськыса шуиз: «Инмаре Кузё-Инмаре! Та палкышнолы, кин дорын мон улӥсько, оло, урод лэсьтод-а – пизэ виёд-а?»21Пинал пи вылэ куинь пол мыкырскиз но Кузё-Инмарлы вазиськыса шуиз: «Инмаре Кузё-Инмаре! Та пияшлэн лулыз ас пушказ мед берытскысал».22Кузё-Инмар Илиялэсь куаразэ кылӥз: пияшлэн лулыз пушказ берытскиз но, со улӟиз.23Илия пияшез кутӥз но, коркалэн бадӟым паласьтыз поттыса, анаез кие сётӥз, солы шуиз: «Учкы, пиед улэп».24Та кышномурт Илиялы шуиз: «Табере мон тодӥ, тон Инмарлэн адямиез луиськод, Кузё-Инмарлэн верамез тынад кылад-ымад зэм луэ».
Глава 17