Выбрать язык
Книги Ветхого Завета
Книги Нового Завета
с русским текстом1Трос нуналъёс ортчем бере, куинетӥ араз, Илиялы Кузё-Инмар дорысь верамын вал: «Мын, Ахавлы возьматскы, соку Мон музъем вылэ зор сёто».
2Илия Ахавлы возьматскыны мынӥз. Нош Самарияын туж секыт сютэм ар вал.3Эксэй юртэн кивалтӥсь Авдиез Ахав ӧтиз. Нош Авдий Инмарлэсь кышканэн улӥсь мурт вал,4Иезавель Кузё-Инмарлэсь пророкъёссэ виылыку, Авдий сю пророкъёсты кутӥз но витьтон муртэн-витьтон муртэн пещераосын ватыса возиз, нянен сюдыса, вуэн сектаса возиз.5Ахав Авдийлы шуиз: «Музъем вылысь вань ву потон интыосы, музъем вылысь вань ву ӧръёс доры мын, валъёсмес, мулъёсмес сюдыны турын ум шедьтэ-а, пудо-животтэк медам кыле вал».6Куспазы музъемез шори люкизы сое ортчон вылысь: Ахав нимаз одӥг сюрестӥ кошкиз, Авдий нимаз мукет сюрестӥ кошкиз.
7Авдий сюрес вылтӥ мыныку, тани, солэн пумитаз Илия лыктэ. Со Илияез тодмаз но пыдесъяськыса шуиз: «Тон-а со, мынам кузёе Илия?»8Соиз солы шуиз: «Мон. Мын, кузёедлы ”Илия татын” шу».9Со шуиз: «Маин мон янгыше уси, малы аслэсьтыд ляльчидэ Ахав кие сётӥськод, монэ мед виёз шуыса-а?10Улэп тынад Инмаред Кузё-Инмар! Ӧвӧл одӥг калык но, эксэйлык но, кытчы тонэ утчаны кузёе-эксэе медаз ысты вал. ”Тон ӧвӧл”, – шуо ке вал, со эксэйлыклэсь, со калыклэсь со кылзэ юа вал, зэмзэ ик тонэ шедьтыны ӧм быгатэ шуыса;11нош тон али шуиськод: ”Мын, кузёедлы вера: Илия татын”.12Тон дорысь мон кошки ке, Кузё-Инмарлэн Духез тонэ нуоз, но уг тодӥськы, кытчы. Ахавлы ивортыны мынӥ ке, нош со тонэ ӧз ке шедьты, со монэ виёз; нош мон, тынад ляльчиед, пинал дырысеным Инмарлэсь кышканэн улӥсько.13Кузёелы верамын ӧвӧл шат, мар мон лэсьтӥ, Кузё-Инмарлэсь пророкъёссэ Иезавель виылыку, кызьы мон Кузё-Инмарлэсь сю пророкъёссэ, витьтон муртэн гурезьысь пещераосы ватскытылӥ но нянен, вуэн сюдыса, сектаса возьылӥ?14Нош тон табере шуиськод: ”Мын, кузёедлы вера: Илия татын”; со монэ виёз».15Соку Илия шуиз: «Улэп Саваоф Кузё-Инмар, Кин азьын мон сылӥсько! Туннэ мон солы возьматско».16Авдий Ахавен пумиськыны мынӥз, солы ивор вуттӥз. Соку Ахав Илиялэн пумитаз мынӥз.
17Ахав Илияез адӟем бере солы шуиз: «Тон-а со Израильлы куректон-кайгу вайись?»18Солы Илия шуиз: «Израилез мон ӝоже уг уськытӥськы, тон сое атаедлэн выжыеныз ӵош таин ӝоже уськытӥськоды: Кузё-Инмарлэсь косонъёссэ кулэтэм кариды, ваал сульдэръёс сьӧры мынӥськоды.19Нош табере мын, вань израиль калыкез мон доры, Кармил гурезе люка, Вааллэсь ньыль сю витьтон азьпал тодытӥсьёссэ, тыпы сурдын вӧсяськонысь ньыль сю азьпал тодытӥсьёсты, Иезавельлэн ӝӧк вылысьтыз сиськисьёсты, татчы вай».20Ахав вань израиль пиос доры ӧтьыны ыстӥз, вань пророкъёсты Кармил гурезе люказ.
21Вань калык азе потыса, Илия шуиз: «Кема-а кык пыдыныды но чутыса ветлоды на? Кузё-Инмар – Инмар ке, Со сьӧры мынэ, нош Ваал ке инмар, соку со сьӧры мынэ». Калык солы пал кыл но ӧз вера.22Соку Илия калыклы шуиз: «Кузё-Инмарлэн пророкъёсыз пӧлысь мон огнам кыли, нош Вааллэн – ньыль сю витьтон азьпалзэ тодытӥсьёсыз, [эшшо тыпы сурдын вӧсяськонысь но ньыль сю азьпалзэ тодытӥсьёс].23Милемлы кык ошпи мед сётозы, соос асьсэлы одӥгзэ ошпиез мед быръёзы, сое шори мед ӵогозы но пуос вылэ мед понозы, нош тыл медаз понэ. Мон мукетсэ ошпиез дасяло но пуос вылэ поно, нош тыл уг поны.24Тӥ асьтэлэн инмардылэн нимызлы вазиське, нош мон [аслам Инмарелэн] Кузё-Инмарлэн нимызлы вазисько. Тыл пыр ответ сётӥсь Инмар – Со ик Зэмос Инмар луоз». Вань калык ответ сётыса шуиз: «Умой, [яралоз]!»25Вааллэн азьпалзэ тодытӥсьёсызлы Илия шуиз: «Асьтэлы одӥгзэ ошпиез быръе, тӥ азьлогес дасялэ, уго тӥ трос кузя; асьтэлэн инмардылы вазиське, но тыл эн понэ».26Соослы сётэм ошпиез соос басьтыса дасязы, соку соос ӵукнаысен нуназе шорозь Вааллэн нимызлы тэльмырыса вазиськылӥзы тазьы шуыса: «Ваалмы, кыл милемыз!» Нош нокыӵе но куара-ланга, ответ ӧй вал. Асьсэлэн лэсьтэм курбон сётон котыртӥзы тэтчаса ветлӥзы.27Нуназе шорын Илия соосты серекъяса шуиз: «Бадӟым куараен кесяське, со инмар ук, оло нош со маке сярысь малпаськыса пуке, оло кыӵе ке но ужен выре, оло со сюрес вылэ потэмын, оло нош со изе, сайкалоз!»28Бадӟым куараен кесяськыны кутскизы; асьсэлэн сямзыя, асьсэды пуртъёсын, шибодыосын бышканы кутскизы – вылтӥзы чур-р! гинэ вир бызиз.29Лымшор ортчиз, нош соос, ӝыт курбон сётон дыр вуытозь, ялан перияськыса улӥзы на. Озьы ке но куара-ланга но, ответ но ӧй вал, номыр ӧз кылӥськы. [Соку Фесвапи Илия Вааллэн азьпал тодытӥсьёсызлы шуиз: «Нош али палэнске, мон но курбон сётыны мед быгатом». Соос палэнскизы но чус кариськизы.]
30Илия вань калыклы шуиз: «Мон доры лыктэ». Вань калык солэн дораз лыктӥз. Со Кузё-Инмарлэсь куашкатэм курбон сётон интызэ выльысен пуктӥз.31Илия дас кык из басьтӥз – Иаковлэн пиосызлэн выжызы мында, Кузё-Инмар солы тазьы шуиз вал: «Тынад нимыд ”Израиль” луоз».32Кузё-Инмарлэн нимызлы сӥзьыса, Илия та изъёслэсь курбон сётон лэсьтӥз; курбон сётон интылэн котыртӥз гоп гудӟиз, солэн быдӟалаез кык сата*а ю тэрымон вал,33[курбон сётон вылэ] пу тыриз но ошпизэ шори ӵогиз, сое пу вылэ поныса34шуиз: «Ньыль ведрае пачылаз ву лэзе но тылын сутоно курбон вылэ, пу вылэ киськалэ». [Озьы лэсьтӥзы.] Собере шуиз: «Эшшо одӥг пол тазьы ик каре». Эшшо тазьы ик каризы. Соку со шуиз: «Тазьы ик куинетӥ ползэ лэсьтэ». Тазьы ик куинетӥ ползэ лэсьтӥзы,35курбон сётон котыре ву вияз, гопе пачылаз ву люкаськиз.
36Ӝыт курбон сётон вакытэ Илия пророк лыктӥз но [ин пала учкыса, вӧсяськыса] шуиз: «Кузё-Инмаре, Авраамлэн, Исааклэн, Израильлэн Инмарез! [Кузё-Инмаре, кыл монэ, туннэ тыл пушкысен монэ кыл!] Та нуналэ [та адямиос] мед тодозы, Израильын Тон одӥг гинэ Инмар, мон Тынад ляльчиед, ваньзэ тае Тынад кылыдъя лэсьтӥ шуыса.37Кыл монэ, Кузё-Инмаре, кыл монэ! Та калык мед тодоз, Тон, Кузё-Инмаре, Инмар луиськод, соослэсь сюлэмзэс [Ас палад] берыктод шуыса».38Соку Кузё-Инмар тыл лэзиз но тылын сутӥськись курбонэз, пуэз но, изъёсты но, сюез-пенез но, гопысь вуэз но ньылӥз.39Тае адӟыса, вань калык ымныр вылаз уськытскиз но шуиз: «Кузё-Инмар – со Инмар, Кузё-Инмар – со Инмар!»
40Соку Илия соослы шуиз: «Вааллэсь азьпал тодытӥсьёссэ кутэ, одӥгез но пегӟыны медаз быгаты». Соосты кутӥзы но, Илия соосты Киссон ӧр доры вайиз, отысен соосты вандылӥз.41Илия Ахавлы шуиз: «Мын, си, ю, уго зор куара кылӥське ни».42Соку Ахав сиыны, юыны мынӥз, нош Илия, Кармил гурезе тубыса, музъемозь йыбырттӥз, йырзэ пыдесъёсыз вискы понӥз.43Аслаз егит медо пиезлы шуиз: «Мын, зарезь пала учкы». Соиз мыныса учкиз но «номыр но ӧвӧл» шуиз. Илия шуиз: «Тазьы сизьым пол кар».44Со сизьыметӥ полаз шуиз: «Тани, зарезь палась пичи гинэ, адямилэн кикурез быдӟа гинэ, пилем ӝутске». Соку Илия шуиз: «Мын, Ахавлы вера: ”[Ожмаськон урободэ] кыткыса кошкы, зор улэ медад сюры”».45Со виын инбам, пилемъёс вуыса, тӧл потыса, пеймыт луиз, зол зорыны кутскиз. Нош Ахав ожмаськон уробояз пуксиз но [бӧрдыны кутскиз], отысен Изрееле кошкиз.46Илия вылын Кузё-Инмарлэн киыз улӥз. Со куссэ думиз но Ахавлэн азьпалаз Изреелёзь бызьыса мынӥз.
*а 18:32 сата – ог 10-12 литр ву яке ю тэрымон сосуд
Глава 18