Выбрать язык
Книги Ветхого Завета
Книги Нового Завета
с русским текстом1-тӥ книга
1Филистим калык Израилен ожмаськиз, израиль ожгарчиос филистим ожгарчиослэсь бызьыса пегӟизы, Гелвуй гурезе погразы-усьылӥзы.2Филистим ожгарчиос Саул сьӧры, солэн пиосыз сьӧры уйиськыса мынӥзы, филистим ожгарчиос Ионафанэз, Аминадавез, Мелхисуаез, Сауллэсь пиоссэ, виизы.
3Сауллы пумит ож кужмояз, пукыӵен ыбылӥсьёс со вылэ урдскизы, озьы сое пукыӵчиос яраё-яраё каризы.4Ожмаськон тӥрлыксэ нуллӥсьлы Саул шуиз: «Мечтэ потты но бышкалты монэ, та вандӥськымтэос лыктыса монэ сантэманы медаз быгатэ». Нош ожмаськон тӥрлык нуллӥсь ӧз дӥсьты, уго туж кышкатскиз. Соку Саул ачиз меч кутӥз но со вылэ уськытскиз.5Ожмаськон тӥрлык нуллӥсь адӟиз, Саул кулэмын ни шуыса, соку ачиз но со меч вылэ уськытскыса кулӥз.6Саул кулӥз, куинь пиез но, соин валче быдэсак юртэз-выжыез но быриз.7Нёжалын улӥсь израиль пиос адӟизы, ваньмыз бызьыса пегӟо, Саул но, солэн пиосыз но виемын ни шуыса адӟизы но, городъёссэс куштыса, пегӟылыны кутскизы; нош филистим калык лыктыса отчы улыны интыяськиз.
8Мукетаз нуналэ филистим пиос виылэмъёслэсь ваньбурзэс октыны лыктӥзы, Гелвуй гурезе бырем Саулэз но солэсь пиоссэ шедьтӥзы.9Сое кылизы, йырзэ ӵогыса басьтӥзы, ожмаськон тӥрлыксэ но басьтӥзы, Филистим музъеме келязы та сярысь сульдэръёссы-идолъёссы азьын, калыксы азьын ивортон понна.10Ожмаськон тӥрлыксэ инмаръёссылэн куалаязы понӥзы, нош йырзэ Дагонлэн корказ понӥзы.
11Галаадысь Иавис карын вань улӥсьёс кылӥзы, мар каризы Саулэн филистим пиос.12Вань кужмо адямиос султӥзы но Сауллэсь мугорзэ басьтӥзы, солэн пиосызлэсь но мугорзэс басьтӥзы, Иависэ вайыса, Иависысь тыпы улэ соослэсь лыоссэс ватӥзы, собере сизьым нунал ӵоже визяса (кӧс утьыса) улӥзы.
13Кузё-Инмар азьын законлы пумит улэмез понна, Кузё-Инмарлэсь кылзэ утьымтэез понна, тунаськись кышномуртлы юанэн вазиськемез понна тазьы кулӥз Саул.14Нош Саул Кузё-Инмарез ӧз утча. Со понна ик Со сое вииз, эксэйлыкез Иессейлэн Давид пиез кие сётӥз.
Глава 10