Выбрать язык
Книги Ветхого Завета
Книги Нового Завета
с русским текстом1Амослэн Исаия пиезлэн Вавилонлэсь азьпал адӟонзэ тодытонэз.
2Гольык гурезь йылын знамя ӝутэ, куарадэс будэтэ;
соослы киыныды шонтэ,
кузёослэн капка пыртӥзы потыса мед лыктозы шуыса.
3Аслам быръем муртъёсылы Мон косон сётӥ,
вожпотонме возьматыны Аслэсьтым кужмо муртъёсме ӧти,
соос шумпото-шулдыръясько Мынам быдӟым луонэлы.
4Трос калык люкаськон дыръя кадь
гурезьёсын бадӟым куашетон кылӥське,
огазе люкаськем калыкъёслэн но эксэйлыкъёслэн
бугыръяськись куаш поттонзы:
ожмаськыны дасяськем ожгарчиосты
Саваоф Кузё-Инмар учке-чакла.
5Быдэс музъемез куашкатон понна
инлэн пумысеныз, кыдёкысь шаерысь,
Кузё-Инмар но Солэн вожпотонэзлэн
ожмаськон тӥрлыкъёсыз лыкто.
6Викышъяса зар бӧрдэ, – Кузё-Инмарлэн нуналэз матын!
Ваньмызлэсь Кужмо бордысь куашкатӥсь выллем кужым лыктэ.
7Соин ик ваньмызлэн киоссы лэзиськизы,
вань адямиослэн сюлэмзы куалектӥз.
8Дэймизы, сӥнырзы кысканы кутскиз,
вӧсь луонъёс соосты шымыртӥзы;
нуны вайись кадь курадӟо, абдраса огзы шоры огзы учко,
ымныръёссы ӵыжектэмын.
9Тани Кузё-Инмарлэн лек нуналыз вуэ,
лекъяськонэн, гомаса ӝуась вожпотонэн лыктэ –
музъемез кыр дунне карыны, сьӧлыко муртъёсты быдтыны.
10Инмысь кизилиос но, кизили люкъёс но
ас бордысьтызы югыт уг сёто;
шунды ӝужакуз кысэ, толэзь но ас югытэныз уг чиля.
11Дунне вылэз уродлык понна,
сьӧлыклэсь кышкасьтэмъёсты
законлы пумит ужъёссы понна вӧсь каро,
вылӥ мылкыдоослэн вылтӥяськонзылы пум поно,
ёртыса возисьёслэсь возьыттэмлыксэс сереме уськыто.
12Озьы лэсьто: адямиос чылкыт зарнилэсь дуноесьгес луозы,
воргоронъёсты но Офир зарнилэсь дуноесьгес каро.
13Та понна инбамез сэзъяло, соку,
Саваоф Кузё-Инмарлэн вожпотонэзлы чидатэк,
Солэн вожпотонэзлэн гомаса ӝуась нуналаз
музъем интыысьтыз вырӟоз.
14Соку котькудӥз, сьӧраз уйиськись кыркеч кадь,
кузётэк кылем ыжъёс кадь, ас калыкез пала кариськоз,
ваньзы ас музъемазы бызьыса кошкозы.
15Нош кин тушмонлэн киулаз сюриз ке,
сое бышкалтозы,
кинэ ке кырмизы ке, сое мечен ӵогозы.
16Вож нуныоссэс но син азязы виылозы;
коркаоссэс таркалозы, кышнооссэс сантэмалозы.
17Тани соослы пумит Мон азвесез дунъясьтэм,
зарни борды думиськымтэ мидян калыкез ӝуто.
18Пукыӵъёссы егит пиосты погыртозы, кӧтпуш емышез уз жалялэ;
синъёссы пичи муртъёс шоры жаляса уз учке.
19Вавилон – эксэйлыкъёслэн синчеберзы, халдейёслэн данъяськонзы,
Содомен Гоморраез кадь тонэ Инмар погыртоз,
20нокин но отчы улыны уз интыяськы,
выжыысь выжые отын улӥсез уз луы;
Аравияын улӥсь отчы балаганзэ уз пукты,
пудо возьмасьёс но уллёосынызы ӵош отын уз шутэтске.
21Кыр дуннеысь пӧйшуръёс отчы улыны интыяськозы,
корка пушъёсын пелёкучыранъёс пачылаз улозы,
страусъёс улыны интыяськозы, кузь гоноос отӥ тэтчаса ветлозы.
22Юртъёсазы шакалъёс вузозы,
шулдыръяськон коркаосазы гиенаос шуш куараен кесяськозы.
Глава 13