Выбрать язык
Книги Ветхого Завета
Книги Нового Завета
с русским текстом1Солэн дырыз матын, солэн нуналъёсыз ӝегаса уз улэ; Кузё-Инмар Иаковез жалялоз, Со выльысен Израилез яратоз; дор музъемазы улыны интыялоз, соос борды шӧдьытскозы мурт кунъёсысь адямиос, Иаковлэн юртэз борды лякиськозы.2Мурт калыкъёс Израиль калыкез кутозы но соосты дор музъемазы ваёзы; Кузё-Инмарлэн музъем вылаз Израиль юрт мурт калыкъёсты ляльчи карыса возёз; ассэ пленэ кутэмъёсты табере со пленэ басьтоз но ассэ азьвыл ӝикатыса возисьёсын кузёяськыса улыны кутскоз.
3Со нуналэ тазьы луоз: Кузё-Инмар тонэ куректон-кайгуэдлэсь, кышкаса улонлэсь, секыт зӥбетэдлэсь мозмытэм бере4Вавилон эксэй сярысь кырӟалод но шуод:
«Курадӟытӥсь бырем бере ӝикатыса возён дугдӥз!
5Сьӧлыкъёслэсь кышкасьтэмъёслэсь кивалтэт бодызэс
Кузё-Инмар куашкатӥз,
эксэйёслэсь кивалтонзэс быдтӥз,
6вожпотон дыръяз Вавилон калыкъёсты погыръяса улӥз,
йыркуръяськон дыръяз, жалянэз валатэк,
калык выжыосты ӝикатыса, соосын кузёяськыса улӥз.
7Табере быдэс дунне шутэтске,
каньыллыкен улэ но шумпотыса кырӟа.
8Кипариспуос но, Ливанысь кедырпуос но шумпото, соос шуо:
”Тон умме усем дырысен нокин но милемыз кораны уг лыкты”.
9Тон пырыку, тонэ пумитан вылысь
дунне пыдэсысь ад вырыны кутскиз,
тыныд луыса рефаимъёсты, калыкъёслэсь кивалтӥсьёссэс сайкатӥз;
язычникъёслэсь эксэйёссэс ваньзэс
эксэй пуконъёссы вылысьтызы султытӥз.
10Ваньзы соос тыныд вералозы:
”Тон но ми кадь ик кужымтэм луид! Тон милемлы укшась луид!”
11Тынад вылтӥяськонэд вань куаш поттонъёсыныд
дунне пыдэскы куштэмын;
тон ултӥ нумыръёс вӧлдӥсько, нумыръёс – тынад шобретэд.
12Денница, ӵук ӟардонлэн пиез, кызьы тон инмысь усид!?
Калыкъёсты лёгаса возись, музъем вылэ усьыса, тон пазьгиськид.
13Со сюлмыныз шуэ вал: ”Инме тубо,
Инмарлэн кизилиосызлэсь вылӥе престолме ӝуто но
инмаръёс пӧлы гурезь йылэ,
уйпаллэн дураз, пуксё.
14Пилемъёслэн йылӥязы тубо, Быдӟым Инмарлы укшась луо”.
15Нош тон адэ, дунне пыдэслэн мурдалаяз, куштэмын.
16Тонэ адӟисьёс тон шоры учко, тон сярысь малпасько:
”Та-а со адями, кудӥз музъемез зуркатылӥз,
эксэйлыкъёсты куалекъятылӥз,
17дунне вылэз кыр инты кариз, солэсь городъёссэ куашкатылӥз,
пленэ сюремъёсты доразы ӧз лэзьылы?”
18Калыкъёслэн вань эксэйёссы сӥен-данэн ватэмын,
шӧйзэс возьыны пуктэм коркан кыллё;
19нош тон шӧйдэ возьыны коркаедлэн палэназ куштэмын,
синазькыль улвай кадь,
из гуосы ватэм мечен кораса виемъёслэн дӥськутсы кадь,
тон пыд улын костаськись шӧй кадь,
20мукет эксэйёсты кадь тонэ уз ватэ –
тон уго музъемдэ таркад, ас калыктэ быдтӥд;
лек выжыез ноку но буре уз ни вае.
21Атайзылэн законлы пумит улэмез понна
солэсь пиоссэ виыны дасяське, –
медаз ни ӝутске, музъемез медаз ни киултэ,
дунне вылэ городъёс медаз ни пуктылэ».
22Соослы пумит султо, – шуэ Саваоф Кузё-Инмар, – Вавилонлэсь нимзэ ӵушо, улэп кылемъёссэ – пизэ но, пиезлэсь пизэ но – быдто, – шуэ Кузё-Инмар.23Сое ӵушъялъёслы улон интылы пӧрмыто, сыръясь нюр каро, ӵушкась-быдтӥсь исьнерен сое ӵужо, – шуэ Саваоф Кузё-Инмар.
24Саваоф Кузё-Инмар кыл сётыса шуэ:
«Кызьы Мон малпай, озьы ик луоз; кызьы Мон косӥ, озьы ик пӧрмоз,
25музъем вылам Ассурез пыргыто, гурезьёсам сое лёгало;
соос (калыкъёс) вылысь сиес усёз,
пельпумъёссы вылысь зӥбет басьтӥськоз».
26Тазьы пуктэмын-малпамын быдэс музъем сярысь,
тани, вань калыкъёс вылэ вӧлъям ки.
27Уго Саваоф Кузё-Инмар пуктӥз-малпаз, –
кин тае воштыны быгатэ?
Солэн киыз вӧлъямын, – кин сое палэнтоз?
28Ахаз эксэйлэн кулон араз, азьпалзэ тодытыса, тазьы верамын вал:
29Эн шумпоты, Филистим музъем,
тонэ погыръясь-куасаллясь корт боды сузмытэмын шуыса;
уго кыйлэн выжыысьтыз сюро кый потоз,
солэн емышез бурдо лобась кый луоз.
30Соку куанеръёс сюдэмын луозы,
кураськисьёс ышыг интыын кышкатэк улозы;
нош тынэсьтыд выжыдэ сютэм возё,
сютэм улыса, кылем муртъёсыд кулылозы.
31Капкаос, викышъялэ! Город, куараен вуз!
Быдэс Филистим музъем, куашкалод тон;
уго уйпалась ӵын лыктэ,
соослэн уллёосазы бере кылемъёс ӧвӧл.
32Мар бен шуозы калыклэн ивортӥсьёсызлы?
– Тазьы шуозы: «Кузё-Инмар Сӥонэз юнматӥз,
отчы Солэн калыкез пушкысь куанеръёс ватӥськон инты шедьтозы».
Глава 14