Библия
Выбрать язык
Книги Ветхого Завета
Книги Нового Завета
с русским текстом
ИСАИЯ ПРОРОКЛЭН КНИГАЕЗ
15-тӥ ЛЮКЕТ
1Моав сярысь азьпалзэ тодытыса веран.
Озьы! Уйин Ар-Моав кар таркамын, быдтэмын луоз;
уйин Кир-Моав кар таркамын, быдтэмын луоз!
2Со Баитэ, Дивонэ, гурезь йылъёсы бӧрдыны тубе;
Нево пумысен, Медева пумысен Моав викышъяса бӧрдэ;
соослэн ваньзылэн йыръёссы ӵышкемын,
ваньзылэн тушъёссы мычемын.
3Ульчаосаз бышкись чурыт дӥсянэн дӥсяськыса пуко;
корка липет йылъёсын, падвожъёсын
ваньзы викышъяса бӧрдо, синву пӧлын уло.
4Вузэ Есевон кар, Елеала но;
соослэн куаразы Иааца дорозь ик кылӥське;
соос бӧрсьы Моавлэн ожмаськись муртъёсыз викышъяса бӧрдо;
Моавлэн лулыз куалектэмын.
5Моав понна сюлмы викышъя;
со дорысь Сӥгор каре адямиос бызьыса мыно,
Куинетӥ Эглаозь вуо; бӧрдыса Лухитэ тубо;
Хоронаиме мынӥсь сюрес кузя шимес кесяськыса мыно;
6малы ке шуоно Нимрим котырысь вуос быризы,
возьёс куасьмизы, турын ӝуаса быриз, – ӧз ни кыльы турын-куар.
7Соин ик люкам-поттэм ваньбурзылэсь люкетсэ
Аравим шур сьӧры нуо.
8Быдэс Моав шаерын кесяськыса бӧрдо,
Эглаимозь, Беэр-Елимозь кылӥське викышъям куара,
9малы ке шуоно Димонлэн вуосыз вирен тырмизы;
но Димон вылэ Мон эшшо мукет курадӟон лэзё, –
левъёсты – Моавысь пегӟемъёс вылэ но,
дор музъемазы кылемъёсыз вылэ но.
Глава 15
