Выбрать язык
Книги Ветхого Завета
Книги Нового Завета
с русским текстом1Кыр дуннеысь Села музъемысь ыжъёстэс ыстэ кузёлы,
Сӥон ныллэн гурезяз.
2Карысьтыз куштэм, йыромыса ветлӥсь
тылобурдолы укшалозы Моавысь нылъёс
Арнон шурлэн лазег азьтӥз выжон доръёсын.
3«Визь-кенеш сёт, шонер сюрес возьматы;
нуназе шорын, уйин кадь,
аслад вужереныд шобырты, уллямъёсты ват,
костаськыса-ёрмыса ветлӥсьёсты тушмон кие эн сёты.
4Моавысь уллям муртъёс тон дорын мед улозы;
таласьёслэсь соосты уть,
уго отын ёртӥсь-ӝикатӥсь уз ни луы, таласькон-лушкаськон дугдоз,
лёгаса-ултӥяса возисьёс музъем вылысь ышозы-бырозы.
5Соку эксэй пукон гажан-жалянэн юнмалоз,
со вылэ Давидлэн юртаз зэмлыкез яратӥсь судья пуксёз –
шонерлыкез утчась, шонерлыко судить карыны тыршись».
6«Кылэммы вань Моавлэн вылӥ мылкыдо,
ушъяськись, вылтӥяськись,
жалянэз валасьтэм луэмез сярысь:
солэн кылызлы оскиськыны уг, пе, луы».
7Соин ик Моав пумысен Моав куараен бӧрдоз,
ваньзы викышъяса бӧрдозы;
Кир-Харешетысь изкаръёс понна бадӟым куараен бӧрдэ:
соос быдэсак куашкатэмын.
8Есевон бусыос начармизы,
Севамысь виноград бакча но емышсэ уг ни сёты;
калыкъёслэн кузёйыръёссы солэсь устоесь модосъёссэ быдтӥзы –
соос Иазер кар дорозь вуылӥзы, луоё кыр кузя вӧлдӥськыса,
пушъетъёссы зарезь сьӧры пото вал.
9Соин ик мон но Иазерен ӵош Севамысь модосъёс пумысен бӧрдо,
синвуосыным тӥледыз пальккыло, Есевон но Елеала;
винограддэ бичан, аранэд дыръя кадь,
ӧвӧл ни куаш поттыса шумпотон.
10Удалтӥсь музъем вылысь быриз шулдырен, шумпотыса улон;
виноград бакчаосын уг ни кырӟало, шумпотыса уг ни лӧптыло;
виноград будэтӥсь вина виятон гуын уг лёга виноградзэ;
шумпотыса улонэз Мон быдтӥ.
11Соин мынам пушкы-еры Моав пумысен крезь музэн бӧрдэ-ӝуштэ,
нош сюлмы Кир-Харешет пумысен куректэ.
12Моав лыктыса жадьытозяз гурезь йылъёсын йыбыртъяз ке но,
вӧсяськон интыяз сюлворыса куриськиз ке но,
номыр но солы уз юртты.
13Та луэ Кузё-Инмарлэн кемалась дырысен Моав сярысь верам кылыз.14Нош али Кузё-Инмар тазьы шуэ: «Медъяськем муртлэн медоын улон нуналъёссэ лыдъямез кадь, куинь ар ортчыса, Моавлэн быдӟымлыкез вань калыкеныз ӵош ултӥямын-покчиятэмын луоз; кылемез калыкез ӧжыт гинэ луоз».
Глава 16