Выбрать язык
Книги Ветхого Завета
Книги Нового Завета
с русским текстом1Дамаск сярысь азьпалзэ тодытыса веран.
Тани Дамаск городъёс радысь куштэмын луоз,
со куашкам юрт бервылъёслы пӧрмоз.
2Ароер каръёс куштэмын луозы –
отын пудо уллёос кылёзы, шутэтскозы,
соосты кышкатӥсь уз ни кыльы.
3Ефрем выжылэн юн изкарез уз ни луы,
Дамаск эксэйлык но Сириялэн кылем люкетэныз ӵош куашкалоз;
Израиль пиослэн данлыкенызы кадь ик соосын но озьы ик луоз, –
шуэ Саваоф Кузё-Инмар.
4Со нуналэ тазьы луоз:
Иаковлэн данэз пичиёмоз, кӧй мугорыз начармоз.
5Арасьлэн ю-нянез октэм бервылаз кадь татын луоз;
Рефаим нёжалын ю шепез октыса быдтэм бере кадь татын луоз.
6Вӧйпуэз зуркатыса емышсэ бичам бере кадь луоз:
кык-куинь емышез кылёз самой ӝужыт вайлэн йылаз,
ньылез-витез – емыш сётӥсь вайёсаз, –
шуэ Израильлэн Инмарез Кузё-Инмар.
7Со нуналэ адями аслэсьтыз ымнырзэ Кылдытӥсез пала берыктоз, солэн синъёсыз Израильлэн Дун-Сьӧлыктэмез шоры учкозы.8Уз учкы курбон тырон шоры, аслаз киызлэн ужез шоры; уз учкы со шоры, мар лэсьтӥзы солэн чиньыосыз – Астарталэн но Вааллэн сульдэръёссы шоры.
9Со нуналэ изкаръёсыз нюлэсъёсысь, гурезьёслэн йылъёсысьтызы
куштӥськем интыос кадесь луозы,
израиль пиос лыктон азьын куштыса кельтэм музъем кадь луозы –
кыр дуннелы пӧрмозы.
10Уго тон утись Инмардэ вунэтӥд, ватӥськон изгурезьдэ но
тодад ӧд вайылы;
со понна шулдыръяськон садъёс кылдытӥд,
мурт модосысь вайёсты мерттылӥд.
11Мерттӥськон нуналад тон сюлмаськид,
мерттосэд мед будоз вал шуыса,
тынад мерттэм будосэд вазь ик мед сяськаяськысал шуыса.
Нош емыш бичан нуналад удысад
арам люкъёсыд-суслонъёсыд уз луэ,
туж секыт куректон-кайгуэд луоз.
12Трос калыкъёслэн куашетонзы кылӥське!
Зарезь кадь соос куашето.
Калык выжыос вузо! Соос кужмо вуос кадь шау каро.
13Бадӟым вуос кадь шау каро, бӧрдо калыкъёс,
нош Со кышкатӥз соосты но, соос кыдёке бызьыса кошкизы,
сильтӧллэн гурезьёстӥ тузонэз,
тӧлберез пельтыса нуллэмез кадь.
14Ӝыт вуиз но – тани син азьын шимес кышкытлыко суред!
Нош ӵукна вуиз но – со ӧвӧл ни!
Сыӵе адӟонзы асьмемыз таласьёслэн,
сыӵе басьтоно люкетсы асьмемыз таркасьёслэн.
Глава 17