Выбрать язык
Книги Ветхого Завета
Книги Нового Завета
с русским текстом1Египет сярысь азьпалзэ тодытыса веран.
Тани, Кузё-Инмар капчи пилем вылэ пуксёз но Египетэ вуоз.
Со азьын Египетлэн сульдэръёсыз-идолъёсыз куалекъялозы,
Египетлэн сюлмыз пумоз.
2Египетын улӥсьёсты огзылы пумит огзэс султыто –
агай-вынъёс ог-огенызы ваче пумит жугиськозы,
эшез эшезлы пумит кариськоз;
город городэн, эксэйлык эксэйлыкен ваче пумит жугиськозы.
3Египетлэн духез катьтэммоз, Мон солэсь кенешсэ куашкато, –
соку соос сульдэръёссылы, син пӧртмасьёслы, кулэм муртлэсь
духсэ ӧтьылӥсьёслы, туно-пеллёослы вазиськозы.
4Египетын улӥсьёсты жалянэз валасьтэм эксэй киулэ сёто,
туж лек эксэй соосын кузёяськоз, – шуэ Кузё-Инмар,
Саваоф Кузё-Инмар.
5Зарезьысь вуос кулэсмозы, шурысь ву быроз, куасьмоз;
6шуръёсы ӧжыт ву кылёз,
Египетысь арыкъёс лазегомозы, куасьмозы;
камышен тростник будосъёс шуялозы.
7Шур дурысь, шур вӧзысь бусыос куасьмозы,
шурен артэ вань кизем ю-нянь куасьмоз,
тӧлъя-буръя кошкоз, ышоз-быроз.
8Бӧрдозы чорыгасьёс, куараен зар бӧрдозы шуре визнан куштӥсьёс,
казьзэс-сетьсэс вуэ пуктӥсьёс ӝоже усёзы;
9етӥн мертчан согъясьёс, тӧдьы дэра куисьёс куалектозы;
10казьёс-сетьёс кесяськозы, ваньмызлэн,
чорыг кутылонын ужась медоослэн, мылкыдзы сӧриськоз.
11Озьы! Цоанысь кивалтӥсьёс визьзэс ыштӥзы;
фараонлэн визьлыко визь-кенеш сётылӥсьёсызлэн кенешсы
кулэтэм-ярантэм луиз.
Кызьы тӥ фараонлы шуоды:
«Мон – визьнодчиослэн пизы, вашкала эксэйёслэн пизы».
12Кытын соос? Кытын тынад визьнодчиосыд?
Табере соос тыныд мед вералозы;
мед валэктозы, Саваоф Кузё-Инмар Египет пумысен
мар кутӥз-пуктӥз.
13Визьзэс ыштӥзы Цоанысь кивалтӥсьёс;
янгышазы Мемфисысь кивалтӥсьёс,
Египетэз выжыосызлэн йыръёссы
сюрес вылысь мыдлане кожытӥзы.
14Кузё-Инмар отчы кудӟонлэсь духсэ ыстӥз,
соку Египет вань ужъёсыныз йыромиз,
кудӟем муртлэн аслаз ӧскем вылтӥз ветлэмез кадь со улыны кутскиз.
15Египетын йыр но быж, пальма но боды – нокудзы но,
номыр но лэсьтыны уз ни быгатэ.
16Со нуналэ Египетын улӥсьёс кышномуртъёслы укшалозы, куалектозы но Саваоф Кузё-Инмарлэн соос вылэ ӝутэм ки вырӟытэмезлэсь кышкалозы.17Иудалэн музъемезлэсь Египет туж кышкаса улоно луоз; кин ке со сярысь тодаз вайиз ке, со мурт, Саваоф Кузё-Инмарлэсь Египет пумысен кутэм-пуктэмзэ тодыса, куалекъялоз.
18Со нуналэ Египет музъемын вить городъёс ханаан кылын вераськыны, Саваоф Кузё-Инмарлы йыбыртъяны кутскозы; соос пӧлысь одӥгез ”Шундыкар” шуыса нимаськоз.
19Со нуналэ Кузё-Инмарлы курбон сётон ӝӧк Египет музъемлэн шораз пуктэмын луоз, Кузё-Инмарлы сӥзем юбо солэн кунгож дураз пуктозы.20Египет музъемын со Саваоф Кузё-Инмар сярысь тодытӥсь, ивортӥсь луоз, малы ке шуоно ёртыса-ӝикатыса возисьёсын сэрен соос Кузё-Инмарлы вазиськозы но, соослы утисез, дурбасьтӥсез соосты мозмытыны Со лэзёз.21Кузё-Инмар Ассэ Египетын возьматоз; со нуналэ Египетын улӥсьёс Кузё-Инмарез тодмалозы но курбонъёс, кузьымъёс ваёзы, Кузё-Инмарлы сӥзиськозы, сӥзиськемзэс быдэстозы.22Кузё-Инмар Египетэз вӧсь кароз, – вӧсь кароз но бурмытоз: соос Кузё-Инмарлы вазиськозы, нош Со кылоз но соосты бурмытоз.
23Со нуналэ Египетысь Ассирие бадӟым сюрес луоз, Ассирияысь калык Египетэ ветлылоз, нош Египетын улӥсьёс – Ассирияе; Египетысь калык Ассирияысь калыкен валче Кузё-Инмарлы служить карозы.24Со нуналэ Израиль Египетэн, Ассирияен огазьын, куинетӥез кун луоз; соос бакель каремын луозы музъемлэн шораз.25Саваоф Кузё-Инмар соосты бакель кароз но шуоз: «Бакельлыко Мынам калыке – Египетысь калык, Мынам киылэн ужез – ассириецъёс, Мынам люкетэ – Израиль».
Глава 19