Выбрать язык
Книги Ветхого Завета
Книги Нового Завета
с русским текстом1Зарезь дурысь луоё кыр сярысь азьпалзэ тодытыса веран.
Кызьы лымшорын сильтӧлъёс поръяло,
озьы ик кин ке но со лыктэ луоё кырысь,
кӧшкемыт-шимес музъем вылысь.
2Шурдыт адӟон мыным возьматэмын:
талась-кыскась – тала, таркась-быдтӥсь – тырттэм кельтэ.
Ӝутскы, Елам, котырты, Мидия!
Вань бӧрдон-чигиськонъёслы пум пононо.
3Та адӟонэн сэрен мынам кусъёсы куалекъяло;
нуны вайисез кадь курадӟонъёс монэ шымыртӥзы.
Мон сокем куалектэмын – номыр но уг кылӥськы;
сокем абдрамын – номыр но уг адӟиськы.
4Сюлмы тэтча; мугоры дыр-р куалекъя;
шумпотон ваёно уе шимес курадӟонлы пӧрмиз.
5Сиськон инты дасяло, ӝӧккышетъёс вӧлдо, – сиё, юо.
«Кивалтӥсьёс, султэлэ, вӧяса дасялэ щитъёстэс!»
6Тазьы шуиз мыным Кузё-Инмар:
«Мын, возьмаськись пукты; мае ке адӟиз, сое со мед ивортоз».
7Со адӟиз вал вылын парен-парен мынӥсьёсты,
ишакъёс вылын мынӥсьёсты,
верблюдъёс вылын мынӥсьёсты;
валаны тыршыса, со сак кылзӥськыса улӥз.
8Соку со сьӧсь пӧйшур кадь кеськиз:
«Кузёе! Нуналлы быдэ возьмаськыса сылӥ,
ас интыям вань уйёсты ортчытъяй.
9Но тани, адямиос мыно, парен-парен вал вылын адямиос лыкто».
Собере со бадӟым куараен черектӥськиз но шуиз:
«Усиз, усиз Вавилон, вань инмаръёсызлэн сульдэръёсыз
сӧриськыса музъем вылын кыллё».
10Э, мынам кутсаськеме, итымелэн пиез!
Мон мар кылӥ Саваоф Кузё-Инмарлэсь,
Израильлэн Инмарезлэсь, сое ик тӥледлы ивортӥ.
11Дума*а сярысь азьпалзэ тодытыса веран.
Сеирысен мыным кесясько:
«Возьмаськись! Уйлэн али кыӵе дырыз?
Возьмаськись! Уйлэн али кыӵе дырыз?»
12Возьмаськись ответ сётэ:
«Ӵукна вуэ ни, но али эшшо уй.
Туж тодэмды потэ ке, лыктэ но юалэ!»
13Аравия сярысь азьпалзэ тодытыса веран.
Дедан выжылэн караванъёсыз,
Аравиялэн куакъёсыз пӧлын уйдэс потэ.
14Фема музъемын улӥсьёс!
Сюзы куасьмем муртъёслэн пумитазы ву нуэ,
пегӟемъёсты нянен пумиталэ.
15Соос уго палашъёслэсь кышкаса пегӟо,
ожмаськыны дасям палашъёслэсь, золтэм пукыӵлэсь,
ожмаськонлэн секытэзлэсь соос пегӟо.
16Тазьы шуиз мыным Кузё-Инмар: «Эшшо ар, со медъяськем арен огмында, – соку Кидарлэн вань данэз ышоз-быроз,17Кидарлэн кышкасьтэм пиосызлэн пукыӵъёссы но трос уз кыльы. Тазьы шуиз Кузё-Инмар, Израильлэн Инмарез».
*а 21:11 Дума – быдэс нимыз: Идумея; Сылало зарезьлэн лымшораз интыяськем кун
Глава 21