Выбрать язык
Книги Ветхого Завета
Книги Нового Завета
с русским текстом1Адӟон Нёжал сярысь азьпалзэ тодытыса веран.
Мар тонэн луиз, Иерусалим, быдэсак липет йылэ тубид?
2Куашетӥсь, бугыръяськись, шулдыръяськыса черекъясь город!
Пограм муртъёсыд мечен виемын ӧвӧл, соос ожмаськыса ӧз кулэ.
3Вань кивалтӥсьёсыд пегӟыса кошкизы,
но пукыӵчиос соосты кутылыса думылӥзы;
вань ожгарчиосыд огазе думылэмын,
кыдёке ке но пегӟыса кошкизы вал.
4Соин ик шуисько: «Кошке мон дорысь, мон викышъяса бӧрдо;
калыкме таркамзы понна эн тыршелэ монэ буйгатыны».
5Саваоф Инмар Кузё-Инмар Адӟон Нёжалын улӥсьёс доры
шугадӟон, курадӟон, куалекъян нунал ыстӥз.
Борддоръёсты тӥяло, кесяськем куараос гурезьёс йылэ ӝутӥсько.
6Елам ньӧл тырон сепысэз нуэ;
адямиос ожмаськон уробо вылын, буш вал вылын пуко.
Кир щитсэ поттыса дася.
7Тани, устоесь нёжалъёсыд ожмаськон уробоосын тырмемын,
вал вылын пукисьёс капкаедлэн ваче пумитаз султӥзы,
8Иудеялэн вылысьтыз шобретсэ басьто.
Тон со нуналэ кедырпулэсь пуктэм коркан запаслы возиськись ожмаськон тӥрлык пала ымнырдэ берыктӥськод.
9Тӥ адӟиськоды Давидлэн городысьтыз борддорысь трос пасьёсты, Улысь Ӵыпетэ ву люкаськоды;10Иерусалимысь коркаосты чакласькоды но борддорез юнматон понна коркаосты куашкатъяськоды.11Кык борддоръёс вискы вуж ӵыпетлэсь вузэ возён инты лэсьтӥськоды. Нош Кин тае лэсьтэ, Со шоры тӥ уд учкиське, Кин кемалась дырысен тае пуктыны малпаз, Со пала уд кариськиське.
12Кузё-Инмар, Саваоф Кузё-Инмар,
тӥледыз ӧте та нуналэ бӧрдыны,
кайгырыны, йырсиостэс ӵышкыны,
бышкись чурыт ӟустари дӥськутэн дӥсяськыны.
13Нош татын тани шулдыръясько, шумпото!
Ошъёсты виыло, ыжъёсты вандыло;
сӥль сиё, вина юо но шуо: «Ваелэ, сиёме-юоме,
ӵуказе асьме доры кулон вуэ ук!»
14Нош Саваоф Кузё-Инмар пельме усьтыса шуиз:
«Тӥляд тазьы йӧнтэм улэмды понна
кулытозяды но сьӧлыкъёсты уз ӵушиське».
Тазьы шуиз Кузё-Инмар, Саваоф Кузё-Инмар.
15Тазьы шуиз Кузё-Инмар, Саваоф Кузё-Инмар: «Мын, ветлы эксэй юртэн кузёяськись Севна кузёйыр доры но солы шу:
16”Мар тыныд татын кулэ, мар татын тынад ужед,
малы тон татчы шайгу гудӥськод?
Вырйылэ со аслыз шӧй возён лэсьтэ,
изгурезе аслыз улон инты гудӟе.
17Тани, тонэ, кужмо адями, Кузё-Инмар сэрпалтоз,
комокез кадь тонэ пызьыртоз;
18бинялтыса тонэ, тупез кадь, паськыт музъем вылэ зӥртоз;
отчы тон кулод, туж чебересь ожмаськон уробоосыд отчы кылёзы,
кузёедлэн юртаз серекъян-веранлы пӧрмозы.
19Сылон интыысьтыд тонэ донгыса лэзё,
тон санысьтыд куштэмын луод.
20Со нуналэ тазьы луоз: Аслэсьтым ляльчиме, Хелкиялэсь пизэ Елиакимез, ӧтё,21тынэсьтыд дӥськуттэ со вылэ дӥсяло, еэныд куссэ думо, кивалтон уждэ солэн кияз сёто; соку со Иерусалимын улӥсьёслы, Иудалэн юртэзлы атай луоз.22Давидлэн юртэзлэсь усьтонзэ солэн пельпум вылаз поно; со ӧсэз усьтоз но, нокин но сое уз ни ворса; со ворсалоз но, нокин но сое усьтыны уз ни быгаты.23Чурыт интыысь кортӵогез кадь сое юнмато, соку со аслаз атаезлэн юртэз понна данлыклэн пукон интыез луоз.24Соку со вылын атаезлэн юртэзлэн данлыкез ошиськыса улоз, пиезлэн пиосызлэн но, корка котырысь вань сосудъёслэн но – крезьгур поттон макеосыз бордозь ик.25Со нуналэ, – шуэ Саваоф Кузё-Инмар, – чурыт интые юнматэм кортӵог вырӟоз; поттэмын луоз, усёз но, со вылын возиськись вань секытлык пазьгиськоз”». Тае Кузё-Инмар вераз.
Глава 22