Выбрать язык
Книги Ветхого Завета
Книги Нового Завета
с русским текстом1Тани, Кузё-Инмар музъемез тырттэм кельтэ, емыш сётӥсьтэм каре;
солэсь вылтуссэ воштэ, отын улӥсьёсты пазьге.
2Мар луоз калыкен, со ик луоз священникен;
мар луоз медоен, со ик луоз солэн кузёеныз;
мар луоз медо кышноен, со ик луоз солэн кузё кышноеныз;
мар луоз басьяськисен, со ик луоз вузасен;
мар луоз пунэм басьтӥсен, со ик луоз пунэмлы сётӥсен;
мар луоз барыш басьтӥсен, со ик луоз барыш будэтыны сётӥсен.
3Музъем выл быдэсак куашкатэмын, ваньмыз таркамын,
уго Кузё-Инмар тазьы луыны косон сётӥз.
4Ӝожомемын, мӧзме музъем; мыкырскиз, куасалскиз дунне выл;
музъем вылысь калыкен кузёяськыса улӥсьёс лапказы-мыкырскизы.
5Музъем вылэз саптазы со вылын улӥсьёс,
уго соос законъя улонлэн сьӧраз выжизы,
пуктон-косонэз воштӥзы,
пумтэм вапумлы сётэм сӥзён-косонэз сӧризы.
6Со понна вуэм карган музъем вылэз сие-ньылэ,
отын улӥсьёс ас вылазы вӧсь каронэз чидано луо;
со понна сутэмын-ӵушкамын музъем вылын улӥсьёс,
ӧжыт кылизы улэп муртъёс.
7Бӧрдэ виноград пурылэн сокез; висе виноградпуд;
мур лулӟылӥсько шулдыръяськыса улэмъёс.
8Тимпан шудыса шулдыръяськонъёс быризы,
шулдыръяськисьёслэн куаразы чусомиз, крезь гуръёс чалмизы.
9Кырӟаса вина уг ни юо, курыт луиз сикера вина юисьёслэн юонзы.
10Куашкатэмын тырттэм кылем город,
вань коркаос ӵогамын, – пырыны уг луы.
11Ульчаосын вина утчаса бӧрдо; вань шумпотон быриз;
нокыӵе шулдыръяськон но музъем вылэ ӧз ни кыльы.
12Город таркамын, капкаос куашказы.
13Нош музъемлэн шораз, калыкъёс пӧлын луоз озьы ик,
кызьы луэ вӧйпулэсь емышсэ октэм бере,
виноград бичаку, куке емыш октон-калтон йылпумъяське ни.
14Соос бадӟым куаразэс поттозы,
Кузё-Инмарлэсь быдӟымлыксэ данъяса шулдыръяськозы,
зарезь вылысен бадӟым куараен вазиськылозы.
15Кузё-Инмарез шундыӝужанысен данъялэ,
зарезьысь шормуӵъёсын Кузё-Инмарлэсь
Израильлэн Инмарезлэсь нимзэ данъялэ.
16Музъемлэн пумысеныз ми кылӥськомы кырӟан:
«Дан Шонер Улӥсьлы!»
Мон шуи: «Куректон-кайгу мыным! Куректон-кайгу мыным!
Лек муртъёс урод уж лэсьто,
урод муртъёс лек муртъёс кадь урод уж лэсьто».
17Шимес кышкан, пеймыт гу, кыӵес тыныд дасямын,
музъем вылын улӥсь!
18Соку шимес куаралэсь кышкаса пегӟись мурт гуэ усёз,
нош кин ке гуысь потӥз, со кыӵесэ сюроз;
ин ӝуждалаысен укноос усьтӥськозы,
музъемлэн инъетъёсыз зуркалозы.
19Музъем куашка, музъем пильылӥське, кужмо зурка!
20Кудӟем мурт кадь музъем шонаське; кӧкы кадь веттаське,
законлы пумит улэмез сое нюртыса возе;
со погралоз но уз ни султы.
21Со нуналэ тазьы луоз:
Кузё-Инмар вылӥын вылӥ воинъёсыз судить кароз,
нош музъем вылын музъем выл эксэйёсыз судить кароз.
22Пытсэтэ сюремъёс выллем соос гуэ огазе люкамын луозы,
пеймыт ворсэт улэ пытсамын луозы,
трос нуналъёс ортчем бере судить каремын луозы.
23Саваоф Кузё-Инмар Сӥон гурезе, Иерусалиме, эксэе пуксем,
но солэн тӧроосыз азе данлык усьтӥськем бере
толэзь гордэктоз, шунды возьытэ вуоз.
Глава 24