Выбрать язык
Книги Ветхого Завета
Книги Нового Завета
с русским текстом1Кузё-Инмаре! Тон – мынам Инмаре;
мон Тонэ данъяло, Тынэсьтыд нимдэ ушъяло,
Тон паймымон ужъёс лэсьтӥд;
вашкала вапумъёсы сётэм пуктон-косонъёсыд зэмесь, аминь.
2Городэз Тон из люклы пӧрмытӥд,
юнматэм изкарез – куашкам юртлы;
мурт выжы калыкъёслэн четлыкъёссы городэ ӧз ни кыле;
нокыӵе дауръёсы но со выльдыса пуктэмын уз ни луы.
3Соин ик Тонэ кужмоесь калыкъёс данъялозы,
кышкытэсь выжыослэн каръёссы Тынэсьтыд курдаса улозы.
4Тон куанер муртлэн пегӟон интыез вал,
кураськисьлэн ёрмыса улон дыръёсаз ватӥськон интыез вал,
сильтӧллэсь утид, ӵушкась пӧсь куазь дыръя вужер сётӥд;
уго жалянэз тодӥсьтэм эксэйёслэн йыркурен шокамзы
борддорлы пумит пельтӥсь сильтӧллы укша.
5Вутэм интыысь ӵушкась пӧсез кадь,
тушмонъёслэсь йӧнтэмъяськемзэс Тон зӥбломытӥд;
пилем вужерлэн пӧсез нюртэмез кадь,
ёртыса-ӝикатыса возисьёслэн шумпотон-шулдыръяськонзы
нюртэмын.
6Вань калыкъёс понна та гурезь йылэ Саваоф Кузё-Инмар
кӧё-вӧё сиёнъёсын, дуно винаосын,
лыослэн виыменызы,
самой чылкыт винаосын сиён-юон дыр ортчытоз.
7Та гурезь йылын шобретэз быдтоз,
вань калыкъёсты шобыртыса возисез,
вань выжыос вылын кыллись шобретэз Со быдтоз.
8Кулон пумтэм вапумъёслы ньылэмын луоз,
Инмар Кузё-Инмар ваньмызлэсь ымныр вылысьтыз синвузэ ӵушоз,
быдэс дунне вылысь Ас калыксэ ултӥян улысь басьтоз, –
уго тазьы шуэ Кузё-Инмар.
9Со нуналэ шуозы: «Тани Со, асьмелэн Инмармы!
Со вылэ асьмеос оскиськыса улӥмы но, Со асьмеды утиз!
Со – Кузё-Инмар; Со вылэ асьмеос оскиськыса улӥмы;
Солэн утемез понна ваелэ шумпотоме, шулдыръяськоме!»
10Кузё-Инмарлэн киыз та гурезь вылын улэ;
куролэн кыед пӧлы лёгаськемез кадь,
Моав ас интыяз лёгаса куштэмын луоз.
11Уясь муртлэн уян понна кизэ вӧлъямез кадь,
со киоссэ вӧлъяз ке но,
нош Инмар солэсь вылтӥяськонзэ
киызлэн кескич ужъёсыныз валче быдтоз.
12Ӝужытэсь, юнэсь борддоръёстэ куашкатоз, погыртоз,
музъем вылэ уськытоз, тузонлы пӧрмытоз.
Глава 25