Выбрать язык
Книги Ветхого Завета
Книги Нового Завета
с русским текстом1Со нуналэ Иудалэн музъемаз та кырӟан кырӟамын луоз:
милям городмы юн; борддоръёс но борддор котырысь мудэт интые
Со милемлы утиськон сётӥз.
2Капкаез усьтэлэ; оскиськымон, шонерлыко улӥсь калык мед пыроз.
3Духеныз юн муртэ тупаса улон пӧлын Тон возиськод,
уго со Тон вылэ оскиськыса улэ.
4Пумтэм вапумъёс ӵоже Кузё-Инмар вылэ оскиське,
Инмар Кузё-Инмар пумтэм-йылтэм дыръёслы
юнматскон инты луэ уго.
5Вылӥын улӥсьёсты, вылӥын сылӥсь городэз но Со уськытӥз;
погыртӥз сое, музъем вылэ погыртӥз, тузон пӧлы сое куштӥз.
6Пыд улын лёгаськыса со улэ,
куанерлэн пыдъёсыз, кураськисьёслэн пыдтышъёссы сое лёгаса возё.
7Шонер улӥсьлэн сюресэз шонер;
шонер улӥсьлэсь сюрессэ Тон ӵошкатӥськод.
8Кузё-Инмаре, Тынад курон-косонъёсыд вылэ пыкиськыса,
Тон вылэ оскиськыса улӥмы;
Тон доры, Тынад данлыкед пала
милям лулмылэн мынэмез потыса улӥз.
9Уйёсы мон лулыным Тон пала мыныны тыршыса улӥ,
ас пушкысьтым духеным вазь ӵукна ик мон Тонэ утчало.
Музъем вылын судъёстэ лэсьтыкуд,
дунне вылын улӥсьёс шонерлыко улонлы дышетско.
10Шонер улӥсьтэмлэн сьӧлыкез куштэмын ке луиз,
со шонерлыко улыны уз дышы, –
шонер улӥсьёслэн музъем вылазы со лек ужъёс лэсьтыса улоз,
Кузё-Инмарлэн быдӟымлыкез шоры уз но учкы.
11Кузё-Инмаре! Тынад киыд вылэ ӝутэмын вал,
нош сое соос ӧз адӟе;
Тынэсьтыд калыктэ адӟонтэм карисьёс адӟозы но возьдаськозы;
Тынэсьтыд тушмонъёстэ тыл ньылоз.
12Кузё-Инмаре! Тон милемлы каньыллык кузьмаськод;
милесьтым вань ужъёсмес Тон Ачид тупатӥськод.
13Инмармы Кузё-Инмаре!
Тон сяна, мукет кузёйыръёс милемын кузёяськыса улӥзы;
но Тон бордын улыса гинэ,
ми Тынэсьтыд нимдэ данъяны быгатӥськомы.
14Кулэмъёс уз улӟе; рефаимъёс уз султэ,
Тон лыктӥд но быдтӥд уго соосты,
соос сярысь буре ваёнэз быдэсак ӵушид.
15Кузё-Инмаре, Тон йылэтӥд калыкез, йылэтӥд калыкез –
Аслэсьтыд данлыктэ ӝутӥд, дуннелэн вань пумъёсаз вӧлмытӥд.
16Кузё-Инмаре! Шугадӟонъёс вуыку, со Тонэ утчаз;
вӧсь каронэд со доры вуылыку, вань сюлмысьтыз со вӧсяськылӥз.
17Секытэн кышномурт нуны вайыкуз кызьы курадӟе,
вӧсь луэмезлы чидатэк, кесяське,
озьы ик ми но Тон азьын, Кузё-Инмаре.
18Секытэн вал, курадӟимы,
но тӧл кадь тырттэм макеез вордскытылӥмы;
музъемлы утиськон ӧм вае,
дунне вылысь мукет улӥсьёс но ӧз погралэ.
19Тынад кулэмъёсыд улӟозы, султозы кулэм мугоръёс!
Султэлэ но шумпотэ-шулдыръяське, сюй пушкын кыллисьёс,
уго Тынад лысвуэд – будосъёслэн лысвузы,
музъем кулэмъёсты поттоз-донгытоз.
20Калыке, мын, шутэтскон интыосад пыр но ас бӧрсяд ӧсъёстэ ворса,
огдырлы, вожпоттон дыр ортчытозьлы, ватӥськы;
21тани, Кузё-Инмар Аслаз улон интыысьтыз потэ музъем вылын
улӥсьёсты законлы пумит улэмзы понна вӧсь карыны,
музъем ньылэм вирзэ кыре поттоз, вием муртъёсты уз ни ваты.
Глава 26