Выбрать язык
Книги Ветхого Завета
Книги Нового Завета
с русским текстом1Со нуналэ Кузё-Инмар Аслаз секыт, бадӟым, кужмо палашеныз
погыртоз левиафан кыез – шонер бызись кыез но
левиафан кыез – куасалляськись кыез,
виёз зарезьысь шимес пӧйшурез.
2Со нуналэ кырӟалэ – гажам-яратэм виноград бакча сярысь кырӟалэ:
3Мон, Кузё-Инмар, солэн Утисез,
котькыӵе но дыре Мон сое вуэн сектасько;
уйин но, нуназе но сое возьмаса улӥсько,
изъян лэсьтӥсь отчы медаз пыры шуыса возьмасько.
4Вожме уг поттӥськы. Нош кин ке, Мыным пумит мыныса,
жаг турын, бышкиськись турын кизиз ке,
Мон солы пумит ожен мыно но быдэсак соосты сутыса быдто.
5Мынэсьтым утиськон со куроз шат, тупаса улон Монэн гожтоз-а?
Соку со Монэн тупаса улон мед гожтоз.
6Вуоно нуналъёсы Иаков юнматскоз,
Израиль выжы лэзёз но сяськаяськоз;
дунне выл емышъёсын пачылмоз.
7Озьы ик-а Израиль калыкез Кузё-Инмар уськытъяз,
кызьы уськытъяз Израилез уськытъясьёсты?
Озьы ик-а сое виылӥз, кызьы виемын вал сое виылӥсьёс?
8Сое кулэтэм карыкуд, мертаса кадь гинэ Тон сое вӧсь карылӥд;
шундыӝужанысь тӧл пельтэм кадь сое Тон
Аслад кужмо шокчеменыд палэнэ ыргытылӥд.
9Та пыр Иаковлэн законлы пумит улэмез ӵошкатэмын луоз;
талэн емышез луоз со вылысь сьӧлыкез куштон,
куке курбон сётон интыосысь вань изъёсты избурлы пӧрмытоз,
вӧсяськон тыпы сурдъёсыз уз ни сылэ,
шундылы сӥзем сульдэръёс но уз ни кыле.
10Юнматэм кар тырттэм кылёз, улон интыос куштӥськемын луозы,
кыр дунне кадь кылёзы.
Отӥ кунянъёс ветлозы, отын соос шутэтскозы но
отысь вайёсты йыръёзы.
11Солэн вайёсыз куасьмем бере соосты тӥялозы;
кышномуртъёс лыктыса соосты сутозы.
Таос визьзэс ыштэм калык бере,
соин ик соосты Пӧрмытӥсь уз жаля,
соосты Кылдытӥсь улэп уз кельты соосты.
12Со нуналэ тазьы луоз: быдӟым шур бордысен кутскыса Египетлэн ӧрез дорозь Кузё-Инмар ваньзэ зуркатоз, нош тӥ, Израиль нылпи, огды борды огды люкамын луоды.13Со нуналэ тазьы луоз: пеллялозы-шудозы туж бадӟым гумыен, соку Ассирия музъеме йыромемъёс, Египет музъеме улляса нуэмъёс лыктозы но Иерусалимын, святой гурезьын, Кузё-Инмарлы йыбырттозы.
Глава 27