Выбрать язык
Книги Ветхого Завета
Книги Нового Завета
с русским текстом1Куректон-кайгу луоз кудӟем Ефрем выжылэн
вылтӥяськонэзлэн эксэй изьыезлы,
йырзэ чеберъянысь шуясь сяськалы,
вина юыса погырамъёслэн узыр нёжалзылэн вылӥяз интыяськемлы.
2Кузё-Инмарлэн вань юн, кужмо, йӧэн зор кадь,
куашкатӥсь тӧлпери кадь, тудӟем ву кадь
куашетыса бызись калыкез,
со, кужмын лыктыса, Ефрем пиосты музъем вылэ погыртоз.
3Пыд улын лёгаське кудӟем Ефрем выжылэн вылтӥяськон тугокоез.
4Узыр нёжаллэн йылӥяз сылӥсь эксэй изьыезлэсь
шуям сяськазэ каро озьы ик,
кызьы каро дырызлэсь вазь кисьмам смоква емышен –
кин ӝоггес адӟе,
со соку ик кияз басьтэ но ньылэ сое.
5Со нуналэ Саваоф Кузё-Инмар
вераны луонтэм чебер венец изьы луоз,
Аслаз кылем калыкез понна Со дано диадем изьы луоз,
6суд лэсьтонын пукисьлы Со шонер судить каронлэсь духсэ сётоз,
тушмонэз капка дорозь пырыны лэзисьтэмъёслы
кышкасьтэм луон сётоз.
7Но таосыз но винаен шонаськыса ветло,
сикера винаен сэрен сюрес вылэ пограло;
священник но, пророк но кужмо юонъёсын сэрен канжаськыло;
вина вормиз, сикера вина юыса, визьзэс ыштӥзы,
адӟонзэс усьтыкузы, янгышало, янгышесь решениос кутыло.
8Вань ӝӧкъёс юрӟым ӧскем бервылэн паньсамын,
ӧвӧл чылкыт инты. –
9Нош шуо: «Кинлы тодон-валан сётыны со ӧдъя,
кинэ тодытон пыр визьманы малпа?
Анай йӧллэсь люкемъёсты,
анай нонокъёслэсь палэнтэмъёсты ке шат?
10Уго ялан курон-косон вылэ курон-косон,
курон-косон вылэ курон-косон,
правило вылэ правило, правило вылэ правило сётэ, –
татын ӧжытак, отын но ӧжытак».
11Со понна бӧтьыртӥсь ымынызы,
валантэм, мурт кылын та калыклы вералозы.
12Соослы Со вераз: «Тани – шутэтскон инты,
жадем муртлы шутэтскыны дыр сётэ,
тани – буйгатскон инты».
Нош соослэн кылзӥськемзы ӧз поты,
13соин ик Кузё-Инмар соосын тазьы вераськоз:
курон-косон вылэ курон-косон, курон-косон вылэ курон-косон,
правило вылэ правило, правило вылэ правило сётоз,
татчы ӧжытак, отчы но ӧжытак, –
озьы луоз: мынозы но ымныр вылазы усёзы, пазьгиськозы,
соку сьӧлтэтэ сюрозы, отысен соосты кутозы.
14Соин ик, урод кылын вераськисьёс,
Иерусалимысь калыклэн кивалтӥсьёсыз,
Кузё-Инмарлэсь кылзэ санэ понэ.
15Тӥ шуиськоды уго: «Кулонэн ми кусып кылдытӥмы,
дунне пыдэсэн огкылысь луон гожтӥмы:
ваньзэ погыртӥсь эзель потӥз ке, со ми доры уз вуы,
малы ке шуоно пӧяськон улэ ми ватӥськомы,
ӧрекчаськонэн асьмеды шобыртомы».
16Соин ик Инмар Кузё-Инмар тазьы шуэ:
«Тани, Мон Сӥонэ инъетлы йыр из понӥсько, –
эскерем-чаклам, туж кулэ луись, дуно, юн карем изэз:
Солы оскись мурт возьытэ уз усьы».
17Шонерлык луоз мертаськон гозы, зэмлык луоз шонертӥсь гозы;
ӧрекчаськонлэсь пегӟон интызэ йӧзор быдтоз,
ватӥськон интызэ вуос ӝокатозы.
18Кулонэн кусыпты куашкалоз,
дунне пыдэсэн огкылысь луон гожтэмды но кема уз улы.
Ваньзэ погыртӥсь эзель потӥз ке, тӥ уськытэмын-лёгамын луоды.
19Ӝоген со потӥз ке, тӥледыз кырмоз;
нош ветлоз ӵуклы быдэ, нуназе но, уйин но;
со сярысь кылӥды ке гинэ но, шимес кышкалоды.
20Назьылляськон понна валесты укыр вакчи луоз;
шобретты но укыр ӟоскыт луоз со пушкы пырон понна.
21Уго Перацим гурезьын кадь Кузё-Инмар султоз;
Гаваон нёжалын кадь вожзэ поттоз,
Аслэсьтыз ужзэ, аспӧртэмлыко ужзэ, лэсьтон понна но
Аслэсьтыз ужрадзэ, Аслэсьтыз паймымон ужрадзэ, ортчытон понна.
22Та веранэз эн серекъялэ,
жильыетъёстэс эшшо юнгес ӝикатытэмды уг ке поты;
мон уго Саваоф Инмарлэсь Кузё-Инмарлэсь кылӥ,
быдэс музъем вылэз быдтон пуктэмын-кутэмын шуыса.
23Пельдэс мыкыртэ но мынэсьтым куараме кылзэ;
сакесь-валасесь луэ, мынэсьтым верамме кылзэ.
24Музъем ужась котьку ик-а кизён понна гыре,
чуръёс лэсьтэ но усыя аслэсьтыз музъемзэ?
25Уг. Солэсь вылзэ ӵошкатэ ке,
соку со укроп кидыс кизе яке калямпер кидыс пазьге,
яке чурен-чурен чабей кизе, кулэ интые йыды кизе,
соин артэ вазь кидыс пазьге.
26Таӵе радъянлы сое Инмар дышетэ; Со солы визь-нод сётэ.
27Укропез пинё кутэсэн уг кутсало,
калямпер вылтӥ кутсаськон поглянэн уг ветло;
бодыен кокало укропез, калямперез но бодыен кутсало.
28Ю-нянез кутсало, но уг пыргыто сое;
со вылтӥ валэн кутсаськон поглян нулло, пызь кадь уг каро.
29Та Саваоф Кузё-Инмар бордысь потэ:
паймымон Солэн малпанъёсыз, быдӟым Солэн визьлыкез!
Глава 28