Выбрать язык
Книги Ветхого Завета
Книги Нового Завета
с русским текстом1Куректон-кайгу Арииллы, Арииллы,
Давидлэн улэм городэзлы!
Ар вӧзы ар ватсалэ; курбонъёс вандыса мед дасялозы.
2Но Мон Ариилэз ӝикато –
бӧрдон, куректон-ӝожтӥськон луоз;
курбон сётон интые со Мынам луоз.
3Аслам ожгарчиосыным ӵош тынад котырад интыясько,
чакласькись-возьмаськисьёсыным тонэ ёрто,
тыныд пумит ожмаськон понна юнматскон интыос ӝуто.
4Ултӥямын-пыдултэмын луод, музъем вылысен вералод,
тынад тузон улысен верамед мырдэм кылӥськоз,
куараед кулэм муртлэсь духсэ ӧтьылӥсьёслэн кадь луоз,
сюй улысь кылӥськоз сипыртэм куараед.
5Тынад трос тушмонъёсыд тузон пыры кадесь луозы,
урмемъёслэн уллёзы тӧлэн пельтэм букро кӧм кадесь луозы;
шӧдтэк шорысь, туж ӝог со быдэсмоз.
6Саваоф Кузё-Инмар тон доры гудыръяса,
музъемез зуркатыса лыктоз,
кужмо куара поттыса, сильтӧлэн,
ваньзэ ньылӥсь-сутӥсь гомась тылын Со лыктоз.
7Арииллы пумит ожмаськись туж трос калыкъёс
умме усён кадь, уйвӧт кадь луозы;
солы ваньзы пумит султӥзы, солэн юнматэм интыосызлы но,
соку сое ёртӥзы-ӝикатӥзы.
8Сютэм мурт, сиськисько шуыса, уйвӧт адӟе,
нош сайка ке, лулыз катьтэммемын;
сюэз куасьмись мурт, ву юисько шуыса, уйвӧт адӟе,
нош сайка ке, лулыз юэмез потыса курадӟе;
озьы ик луоз Сӥон гурезьлы пумит ожмаськись вань калыкъёслы.
9Паймелэ, абдралэ; асьтэос синтэм луэ, адӟытэк улэ;
соос кудӟемын, но вина юыса ӧвӧл;
шонасько, но нырвыл вина юыса ӧвӧл.
10Уго тӥ вылэ Кузё-Инмар умме усёнлэсь духсэ вайиз но
тӥлесьтыд, пророкъёслэсь, синъёстэс ворсаз,
тӥлесьтыд, азьпалзэ адӟисьёслэсь, йыръёстэс шобыртӥз.
11Азьпалзэ тодытыса веран тӥ понна печать нюртыса ворсам книга кадь ик луэ, кудзэ книга лыдӟыны быгатӥсьлы сёто но шуо: «Лыдӟы сое», нош соиз ответ сётэ: «Уг быгатӥськы, со печать нюртыса ворсамын ук».12Собере книгаез сёто солы, кин лыдӟыны уг быгаты но шуо: «Лыдӟы сое»; соиз шуэ: «Мон лыдӟыны уг быгатӥськы».
13Кузё-Инмар шуиз:
«Та калык ымыныз Мынам матам лыктэ,
кылыныз Монэ сӥлы каре,
нош сюлмыныз Мынэсьтым кыдёкын улэ,
соослэн Мон азьын йыбыртъянзы
адямиослэсь курон-косонъёссэс эскерон-дышетон гинэ луэ;
14соин ик Мон эшшо та калыкен аспӧртэмлыко,
паймымон, абдрамон уж лэсьто на:
визьнодоосызлэн визьлыксы быроз,
валасьёсызлэн валанзы уз ни кыльы».
15Куректон-кайгу асьсэлэсь малпанзэс
Кузё-Инмарлэсь ватон понна мур азе пегӟыны малпасьёслы,
соос асьсэлэсь ужъёссэс пеймыт азьын лэсьто но шуо:
«Кин милемыз адӟоз? Кин милемыз тодмалоз?»
16Паймымон визь ыштон ук та!
Горшок лэсьтӥсез горд сюен ӵошатыны луэ шат?
Арбери ассэ лэсьтӥсь сярысь тазьы шуоз шат: «Монэ со ӧз лэсьты».
Суред аслаз суредасез сярысь шуоз-а: «Со уг вала»?
17Эшшо ӧжытак, туж ӧжытак улыса,
Ливан уз пӧрмы-а садлы,
нош садэз, нюлэс шуыса, сӥлы уз каре-а?
18Со нуналэ пельтэмъёс книгаысь кылъёсты кылозы,
пеймытын, уйин улэм синтэмъёслэн синъёссы усьтӥськозы.
19Курадӟисьёс Кузё-Инмарлы тросгес но тросгес шумпотозы,
куанер адямиос но Израильлэн Дун-Сьӧлыктэмез понна
шумпотозы-шулдыръяськозы;
20малы ке шуоно азьланяз уз ни луы вӧсь карись,
сантэмась но ышоз-быроз,
ӧрекчаськон пала пырисьёс но ваньзы быдтэмын луозы,
21соос адямилэсь визьзэ кылъёсын тугало,
кар капка азьын шонерлык утчаны лыктэм муртлы
сьӧлтэтъёс пуктыло, шонер улӥсез юнме шорысь палэнто.
22Со понна Иаковлэн выжыез сярысь
Авраамез мозмытӥсь Кузё-Инмар шуэ:
«Соку Иаков возьдаськыса улоно уз ни луы,
солэн ымнырыз азьланяз уз ни гордэкты,
23уго Мынэсьтым соослы сётэм ас нылпиоссэс адӟизы ке,
соос Мынэсьтым нимме сӥё-дано карозы,
Иаковлэсь Дун-Сьӧлыктэмзэ сӥлы карозы,
Израильлэн Инмарезлы йыбыртъяса улозы.
24Соку духенызы йыромыса-шонаськыса ветлӥсьёс
визьлыкез тодмалозы,
тэрытскисьтэм муртъёс кылзӥськись луыны дышетскозы».
Глава 29