Выбрать язык
Книги Ветхого Завета
Книги Нового Завета
с русским текстом1Куректон-кайгу тэрытскисьтэм муртъёслы, – шуэ Кузё-Инмар, –
кенешъёс ортчытъяло,
Мынэсьтым юатэк кусыпъёс-эштосъёс кылдытъяло, –
сьӧлык вӧзы сьӧлык ватсан понна гинэ соос лэсьтӥсько.
2Мынэсьтым юатэк-вератэк Египетэ мыно фараонлэсь
юрттэт курыны Египетлэн вужераз ватскон понна.
3Но фараонлэн сётэм юрттэтэз тӥледыз возьытэ вуттоз,
Египетлэн вужер улаз ватӥськон сӥтэм-сантэм луонэ кельтоз,
4малы ке шуоно солэн кивалтӥсьёсыз Цоанын ини,
солэн ыстэм муртъёсыз Ханесэ вуизы ни.
5Ваньзы соос пайда вайисьтэм калыкен сэрен
возьытэ вуттэмын луозы;
со бордысь юрттэт но, пайда но уз луы, –
возьытлык но юрӟымлык гинэ луозы.
6Секытлыкъёс уло ултӥяса, ӝикатыса возён
мумы левъёслэн, айы левъёслэн, аспид кыйёслэн но
лобась кыйёслэн потон музъем вылтӥзы
лымшор пала мынӥсь пудо-животъёс вылын;
ишакъёслэн сюрлы вылазы соос нуо асьсэлэсь узырлыкъёссэс,
верблюдъёслэн тыбыр лёг вылазы нуо асьсэлэсь ваньбурзэс
соослы пайда вайисьтэм калык доры.
7Уго Египетлэн юрттэтэз пайдатэм но юнме гинэ луоз;
соин ик Мон соослы шуи:
«Тӥляд кужымды зӥбыт-востэм улон бордын».
8Табере мын но соос дорын пул вылын гожъя,
гожты тае книгае, азьпал дырлы,
пырак ӵожелы со мед кылёз, дауръёсысь дауръёсы мед улоз.
9Уго та бугыръяськись калык, ӧрекчаськись нылпи,
Кузё-Инмарлэсь законзэ кылзӥськемзы потӥсьтэм нылпиос.
10Соос азьпалзэ адӟисьёслы шуо:
«Дугдэ азьпалзэ адӟемысь»,
пророкъёслы шуо: «Азьпалзэ тодытыса шонерлыкез эн вералэ,
милемлы кӧтэ кельшымонзэ вералэ,
азьпалзэ тодытыса, сюлме кельшымонзэ вералэ.
11Сюрес вылысь коже, сюрес вылысь палэнске;
Израильлэсь Дун-Сьӧлыктэмзэ син азьысьтымы палэнтэ».
12Соин ик Израильлэн Дун-Сьӧлыктэмез шуэ:
«Та кылэз тӥ кулэтэм кариськоды бере,
нош пӧяськонлы, ӧрекчаськонлы оскиськиськоды но
со вылэ пыкиськиськоды ке,
13соку тӥляд законлы пумит улонды
ӝужыт борддорлэн тэрскамез кадь кышкыт луоз, –
борддор син куспын, малпамтэ шорысь куашка.
14Горд сюй сосудэз кадь сое Со куашкатоз, жалятэк пильылоз,
пилиськем пырыос пӧлысь чалеп но уз шедьы
гурысь ӝуась эгыр басьтон понна яке
ошмесысь ву омыртон понна».
15Уго тазьы шуэ Инмар Кузё-Инмар, Израильлэн Дун-Сьӧлыктэмез:
«Ас интыяды каньыллыкен улысалды ке, тӥ утиськысалды;
чус, оскиськыса улон бордын тӥляд кужымды-юнлыкты,
нош тӥ сыӵе улонэз кулэ ӧд каре,
16шуиды: ”Ӵок, ми вал вылын ворттыса кошкомы”, –
со понна ик бызьыса кошконо луоды.
”Шаплы валъёс вылын ми ӝог ворттыса кошкомы” –
со понна ик тӥледыз уйисьёс но шаплыесь луозы.
17Одӥг тушмонлэн кышкатонэзлэсь сюрсэз пегӟоз,
нош вить тушмонлэн кышкатонэзлэсь ваньды пегӟоды:
тӥлесьтыд кылёз гурезь йылысь тодмет бодыос мындаез гинэ,
мувыр йылысь знамя кадь кылёды».
18Соин ик Кузё-Инмар уг дырты тӥледыз жаляны,
соин ик Со возиське тӥледыз жалянлэсь;
уго Кузё-Инмар шонерлыклэн Инмарез луэ:
шудоесь ваньмыз Со вылэ оскиськисьёс!
19Калык Сӥон гурезьын Иерусалимын улоз;
тон трос уд бӧрды, – тынэсьтыд викышъям куарадэ кылыса,
Со тонэ простить кароз, кылэм бераз соку ик тыныд юрттэт сётоз.
20Ӟудыса улыкуды, Кузё-Инмар тӥледлы нянь сётоз,
ёрмыса улыкуды, ву ваёз;
дышетӥсьёсыд ватӥськыса уз ни улэ,
ас синъёсыныд аслэсьтыд дышетӥсьёстэ адӟод.
21Бурпала ке тӥ кожысалды, паллян пала ке тӥ кожысалды,
пельёсыд мышкад верам кылэз кылозы:
«Тани сюрес, со кузя мынэ!»
22Соку тӥ юрӟым шуыса лыдъялоды
сульдэръёслэсь-идолъёслэсь азвеседлэсь кисьтэм ӵоктэтсэс,
вӧлэм сульдэръёслэсь зарниедлэсь кисьтэм ӵоктэтсэс,
кырсь макеез кадь тон соосты куштод но соослы шуод:
«Кошке татысь!»
23Бусыдэ кизён кидысэд вылэ Со зор кисьтоз,
ю-нянед – музъемлэн емышез – удалтоз, буй-буй луоз;
со нуналэ пудо уллёосыд паськыт возьвылъёстӥ ветлозы.
24Ошъёсыд но, ишакъёсыд но – бусыдэ гырись-кизисьёс –
сускичен шорӟем, тӧлэм, сылало сиён сиёзы.
25Туж бадӟым вир кисьтон, каланчаос погран дыръя
ӝужытэсь гурезьёстӥ, ӝужытэсь вырйылъёстӥ
шур вуос бызёзы, визыл вуос кошкозы.
26Кузё-Инмар Ас калыкезлэсь яраоссэ бинян но
вӧсь карем гижло бервылъёссэс бурмытэм нуналэ
толэзьлэн югытэз шундылэн югытэз кадь луоз,
нош шундылэн югытэз сизьым пол югытгес луоз,
сизьым нуналъёслэн югытсы кадь.
27Тани, Кузё-Инмар кыдёкысь лыктэ, Солэн вожпотонэз ӝуа,
гомась тылыз кужмо, Солэн ымыз йыркурен тырмемын,
Солэн кылыз сиись-ньылӥсь тыл кадь,
28Солэн шоканэз чырты кемозь ик ӝутӥськись,
бугыръяськыса кошкись ву кадь, –
калыкъёсты сӥсъяса-пужныса поттон понна.
Калыкъёслэн ангес вылазы йыромонэ нуись сермет луоз.
29Нош тӥ дорын кырӟанъёс луозы шулдыр праздник уе кадь,
сюлэм шумпотон луоз чипчирган шудыса Кузё-Инмарлэн гурезяз,
Израильлэн утиськон интыяз, мынӥсьлэн кадь.
30Соку Кузё-Инмар туж быдӟым куараеныз гудыртоз но
зол вожпотон дыръяз сиись-ньылӥсь гомась тыл пӧлын,
сильтӧл пушкын, ву тудӟонын, изэн йӧзор пӧлын
Аслэсьтыз нюртыса возись кужымзэ возьматоз.
31Кузё-Инмарлэн куараезлэсь
корт боды улын погырась Ассур зуркалоз.
32Ассурез жугыны дасям корт бодыез Кузё-Инмар вырӟытыку,
со вылэ лэзьыку, тимпанэн, цитраен шудозы,
соку Со со вылэ куашкатӥсь-таркась ожен мыноз.
33Уго Тофет*а кемалась дась ини, со эксэйлы шуыса дасямын:
мур, паськыт со;
тылскемез бадӟым тылын ӝуа, пуэз трос;
Кузё-Инмарлэн пельтэмез, бызись сирез кадь, сое сутоз.
*а 30:33 Тофет – шӧй сутон инты
Глава 30