Выбрать язык
Книги Ветхого Завета
Книги Нового Завета
с русским текстом1Куректон-кайгу луоз Египетэ юрттэтлы мынӥсьёслы,
валъёс вылэ оскиськисьёслы,
оскиськонзэс трос ожмаськон уробооссы вылэ понӥсьёслы,
кужмоесь вал вылын мынӥсьёс вылэ оскиськисьёслы,
нош Израильлэн Дун-Сьӧлыктэмез шоры уг учко,
Кузё-Инмар доры уг мыно!
2Нош Со визьмолэсь но визьмо;
шугадӟон ыстоз, Аслэсьтыз верам кылзэ уз вошты;
сьӧлыклэсь кышкасьтэмъёслы пумит бугырскоз,
законлы пумит лэсьтӥсьёслэн юрттэтсылы пумит кариськоз.
3Египет пиос – адямиос гинэ, соос Инмар ӧвӧл;
соослэн валъёссы но – лулмугор гинэ, дух ӧвӧл.
Аслэсьтыз кизэ Кузё-Инмар ӝутоз но, возьмаськись канжаськоз,
утёно-возьмано мурт усёз, – ваньзы ӵош кулозы-бырозы.
4Уго тазьы мыным шуиз Кузё-Инмар:
«Лев кадь, Аслаз шедьтэм мылесэз вылын вузӥсь левпи кадь,
трос пудо возьмасьёс со шоры кесясько ке но,
соослэн черекъямысьтызы со мугорзэ но уз вырты,
соос трос ке но, соослы со уз сётӥськы, –
озьы Саваоф Кузё-Инмар Сӥон гурезь понна,
солэн вырйылэз понна ожмаськыны лэзиськоз.
5Кызьы тылобурдоос пиоссэс-чипыоссэс утё,
озьы ик Саваоф Кузё-Инмар Иерусалимез шобыртоз,
возьмалоз, мозмытоз, жалялоз, утёз».
6Израиль нылпиос! Вазиське Солы, Кудӥз бордысь тӥ
собыдӟа сьӧлык лэсьтыса усиды.
7Со нуналэ котькудды азвесь сульдэръёстэс,
зарни сульдэръёстэс куштоды,
соосты асьтэлы сьӧлык люкан понна тӥляд киосты лэсьтӥзы.
8Ассурез адямилэн лэсьтэм палашез уз виы,
адямилэн лэсьтэм палашез уз быдты сое,
со палашлэсь ватӥськоз, нош егит пиосыз ляльчиос луозы.
9Изкарез вӧзтӥ со кышкаса пегӟоз;
кивалтӥсьёсыз но знамялэсь кышкаса улозы, – шуэ Кузё-Инмар,
Кудӥзлэн тылыз Сӥонын ӝуа, ӝуась гурез Иерусалимын сылэ.
Глава 31