Выбрать язык
Книги Ветхого Завета
Книги Нового Завета
с русским текстом1Тани, Эксэй шонерлыко кузёяськыса улоз,
кивалтӥсьёс но законъя кивалтозы;
2котькудӥз соос пӧлысь тӧллэсь утиськон маке кадь луоз,
жобаськись куазьлэсь утись шобырет кадь,
кыр дуннеын ошмес кадь,
ӵушкась пӧсьлэсь пыжем музъемын ӝужыт изгурезьлэн
вужерез кадь луоз.
3Адӟисьёслэн синъёссы уз ворсаське,
кылӥсьёслэн пельёссы кылзозы.
4Капчи визьем муртъёслэн сюлэмзы малпаськыны быгатоз,
могаса шенгыль вераськисьёс валамон вераськозы.
5Укылтэм муртэз сӥё-дано шуыса уз ни нималэ,
кескич мурт сярысь шонер лэсьтӥсь уз ни шуэ.
6Уго укылтэм мурт укылтэм кылъёс вера,
сюлмыз но солэн законлы пумит уж сярысь малпа –
чеберъяськыса улон понна;
Кузё-Инмар вылэ сантэман кылъёс вераны,
сютэм муртэз няньтэк кельтыны,
сюэз куасьмись муртлэсь юонзэ таланы со тырше.
7Кескич муртлэн ужъёсыз быронэ нуо:
со сьӧлтэт дася куанер муртэз
ӧрекчаськон кылъёсын быдтон вылысь, –
куанер мурт шонер ке но улэ.
8Нош шонер улӥсь мурт ӧрекчаськытэк улон сярысь малпа,
шонер улон бордын со юн возиське.
9Капчи визьем кышномуртъёс! Султэлэ, кылзэ мынэсьтым верамме;
номыр сярысь сюлмаськисьтэм нылмуртъёс!
Мыкыртэ пельдэс мынам верам кылъёсы пала!
10Ар вӧзы эшшо кӧня ке но нунал ватсаськем бере
куалектоды, капчи визьемъёс!
Уго виноград октон уз луы, аран дыр но уз вуы.
11Куалектэ, сюлмаськытэк улӥсьёс! Кышкатске, капчи визьемъёс!
Куштэ дӥськуттэс, кылиське, кусъёстэс думе.
12Удалтӥсь, ӟеч музъемъёссэс жаляса,
трос емыш сётӥсь виноградпудъёссэс тодазы вайыса,
гадьёсазы мыжгалозы.
13Мынам калыкелэн музъем вылаз бышкись будос, жаг турын будоз,
озьы ик шулдыръяськыса улӥсь городлэн корка йылъёсаз но
соос будозы;
14юртъёссы-четлыкъёссы куштӥськемын луозы;
куара-лангаосын куашетӥсь городысь улӥсьёс кошкозы;
Офел вырйыл но каланча пырак ӵоже пещералы-гулы пӧрмозы,
кыр ишакъёслы пегӟон, пудо уллёослы ветлон инты луозы.
15Вылӥысен ми вылэ Дух васькытозь, луоё кыр садлы пӧрмытозь,
нош садэз нюлэс шуыса лыдъятозязы озьы луоз.
16Соку зэмлыко суд та луоё кыре вуоз,
шонерлыко суд удалтӥсь, емышо бусыын улоз.
17Шонерлыклэн ужез тупаса улон луоз, шонерлыко судлэн емышез –
пумтэм вапумъёсы каньылэн, кышкатэк улон луоз.
18Соку мынам калыке тупаса улонлэн юртаз пыроз,
кышкатэк улоно гуртъёсын улоз, шудо-майбыро азе интыяськоз.
19Йӧзор нюлэс вылэ усёз, город нёжалэ лэзиськоз.
20Шудоесь тӥ, вань ву дуръёсы кизисьёс,
ошез но ишакез отчы ыстылӥсьёс.
Глава 32