Выбрать язык
Книги Ветхого Завета
Книги Нового Завета
с русским текстом1Куректон-кайгу тыныд, тонэ уг таркало,
нош тон мукетъёссэ таркаськод ке,
тынэсьтыд уг талало, нош тон мукетъёссэ таласькод ке!
Таркан уждэ йылпумъяд ке, тонэ но таркалозы;
таласькон уждэ быдэстӥд ке, тонэ но талалозы.
2Кузё-Инмаре! Жаля милемыз: Тон вылэ ми оскиськиськомы;
вазь ӵукна ик милемлы кужым сёт,
ёрмыса-ӝикаса улон дыръямы милемыз утьы.
3Шурдыт куарадэ кылыса, калыкъёс пегӟозы;
султӥд ке, калык выжыос пазьгиськозы.
4Таласа поттэм ваньбурдэс кызьы гоно нумыр бича, озьы бичалозы;
саранча кадь со вылэ тэтчозы.
5Вылӥлыко вылӥын улӥсь Кузё-Инмар;
Сӥонэз зэмлыко судэн, шонерлыко улонэн Со тырмытоз.
6Вуозы кышкатэк улон дыръёсыд,
утиськонэдлэн, визьлыклэн, тодон-валанлэн тыр дыръёссы;
Кузё-Инмарлэсь кышкаса улон тынад байлыкед-узырлыкед луоз.
7Тани соослэн кужмооссы ульчаосын кесясько;
тупаса улон пумысен вераськыны ыстэм муртъёс туж бӧрдо.
8Тырттэм кылизы сюресъёс; мынӥсь-ветлӥсьёс ӧвӧл ини;
огкылысь луон сярысь вераськонэз со сӧриз-тарказ,
городъёсты куашкатъяз, – адямиосты номыр ӵотэ но уг поны.
9Музъем ӝожтӥське, куасьме; Ливан возьытэ вуттэмын, шуяз;
Сарон кыр дуннелы укшаны кутскиз,
куаръёстэк гольык кылизы Васан но Кармил.
10Табере Мон султо, – шуэ Кузё-Инмар, – табере ӝутско,
табере вылэ тубо.
11Ужам ужды турынэн секытэн луэм кадь,
куроез нуны ваем кадь – пайдатэм;
тӥляд шоканды – тыл, со тӥледыз ньылоз.
12Пӧзись избур кадь луозы калыкъёс,
ӵогыса куштэм тёрнпу кадь тылын сутэмын луозы.
13Кылзӥське, кыдёкысьёс, мар Мон каро;
тӥ но, матысьёс, тодэ Мынэсьтым кужымлыкме.
14Кышкатскизы Сӥонысь сьӧлыкоос;
сьӧлыклэсь кышкасьтэмъёс куалекъяны кутскизы:
«Асьме пӧлысь кин ньылӥсь-сиись тыл вӧзын улыны быгатоз?
Асьме пӧлысь кин пумтэм вапумъёс ӵоже
гомась тылын артэ улыны чидалоз?»
15– Со, кин шонерлыко улэ, уг ӧрекчаськы,
кин синазькыль каре лушкаськыса пайда поттонэз,
киоссэ лушкем кузьым басьтонлэсь утьыса улэ,
пельёссэ ӵокса, вир кисьтӥськон сярысь верамез медам кылы шуыса,
синъёссэ кыне, уродэз-лекез медам адӟы шуыса, –
16со вылӥын улоз; солэн пегӟон интыез –
тубыны луонтэм изгурезьёсын;
нянь солы сётозы, вуэз солэн уз быры.
17Тынад синъёсыд Эксэез чебер дыръяз адӟозы,
кыдёкысь музъемез адӟозы.
18Сюлмыныд тодад гинэ вайылод на шимес вакытъёсыз:
«Кытын калыкез ӵотась-гожъясь? Кытын выт мертась?
Кытын каланчаосты эскерись-чаклась?»
19Азьланяз уд ни адӟы лекомем калыкез,
кылыны шуг, валаны луонтэм кылын вераськись калыкез,
кудӥзлэн кылыз йӧспӧртэм, валантэм.
20Учкы Сӥон шоры – шулдыръяськонъёс ортчытыны
люкаськон городмес;
синъёсыд тынад Иерусалимез адӟозы, кышкатэк улон интыез,
вырӟытонтэм вӧсяськон скинияез;
солэн ӵогъёсыз ноку но уз ишкалске,
одӥг гозыез но солэн уз чигиськы.
21Шуръёс интые, паськытэсь арыкъёс интые
милям отын Быдӟым Кузё-Инмармы луоз;
отчы одӥг но полысано пыж уз пыры,
бадӟым корабльлэн но ортчемез уз луы.
22Уго Кузё-Инмар – асьмелэн судить карисьмы,
Кузё-Инмар – закон сётӥсьмы;
Кузё-Инмар – асьмелэн эксэймы: Со асьмеды утёз.
23Гозыосыд лябазы, уг быгато мачтаез кутыса возьыны,
тӧлпоез кыскаса возьыны.
Соку таласа поттэм ваньбурезлы бадӟым люкон луоз,
чутӥсьёс гинэ но таланы-лушкаськыны мынозы.
24Улӥсьёс пӧлысь одӥгез но уз шуы: «Мон висисько»;
отын улӥсь калыклэн сьӧлыкъёсыз куштэмын луозы.
Глава 33