Выбрать язык
Книги Ветхого Завета
Книги Нового Завета
с русским текстом1Лыктэ калыкъёс, кылзӥське, калык выжыос, сак кылзӥське!
Мед кылозы музъем выл но мар отын вань,
быдэс дунне выл но ваньмыз мар отын вордӥське.
2Уго Кузё-Инмарлэн йыркурез вань калыкъёс вылэ,
Солэн вожпотонэз соослэн вань ожгарчиоссы вылэ ӝутӥське.
Соосты Со каргаз, соосты быдтыны сётӥз.
3Виылэм муртъёссы пазямын луозы,
шӧйёссы бордысь кӧш зын ӝутскоз,
гурезьёс соослэн виренызы орсмозы.
4Вань ин воинъёс сылмозы-бырозы;
инъёс бинялтэм книга кадь куасалскозы;
соослэн вань воинъёссы виноград вайёсысь куаръёс кадь усёзы,
смоквапуысь шуям куар кадь куашкалозы.
5Мынам палаше инмын кудӟытозяз юиз;
тани Едом вылэ, каргам калыке вылэ палаше суд лэсьтыны ваське.
6Кузё-Инмарлэн палашез вирен орсмоз, кӧен зӧкомоз,
ыжпиослэн но кечъёслэн виренызы,
такаослэн пекля бордысьтызы кӧйын со куаёз;
уго Восорын Кузё-Инмарлы курбон сётон,
трос пудо вандылон Едом музъемын.
7Кыр ошъёс но соин ӵош погралозы, кунянъёс ошъёсын ӵош усёзы,
соослэн вирынызы музъем орсмоз, кӧйынызы со зӧкомоз.
8Кузё-Инмар киын пунэм берыктонлэн нуналэз,
Сӥон понна пунэм берыктон ар.
9Едомлэн шуръёсыз юрсирлы пӧрмозы,
пыд ул сюез ӵуждарилы пӧрмоз,
музъемез ӝуась юрсир луоз:
10нуназе но, уйин но уз кысы,
пумтэм вапумъёс ӵоже ӵынэз ӝутскыса улоз;
выжыысь выжые тырттэм улоз;
вапумъёсысь вапумъёсы со пыр нокин но уз ортчы.
11Сое пеликан тылобурдо но ӵушъял киултозы;
пелёкучыран но кырныж отчы каръяськозы;
со пыр куашкатонлэсь гозызэ,
быдтонлэсь мертаськон калзэ кыскозы.
12Нимо-дано муртъёсыз пӧлысь нокин но отчы уз ни кыльы,
кудзэ эксэе пуктон понна ӧтьыны мед луысал,
вань кивалтӥсьёсыз но номыр кадь но уз ни луэ.
13Чеберъям юртъёсыз бышкись будосъёс пӧлы ӵоксаськозы,
изкаръёсыз пушнерен люгы пӧлы кылёзы;
шакалъёслы улон интылы пӧрмоз, страусъёслы пегӟон инты луоз.
14Луоё кырлэн пӧйшуръёсыз кыркоӵышъёсын пумиськылозы,
шуралиос ваче черекъялозы, уйёсы отын пелёкучыран шутэтскоз,
отын со майбыр улоз.
15Отчы лобась кый каръяськоз, пузъёссэ тыроз,
пи поттоз но аслаз шобрет улаз соосты люкалоз;
отчы душесъёс но огзы доры огзы люкаськылозы.
16Кузё-Инмарлэн книгаысьтыз утчаса шедьтэ но лыдӟе:
та верам пӧлысь огез но лыктыны уз вунэты,
одӥгез мукетыныз уз воштӥськы.
Уго Солэн ымыз таӵе косон сётӥз, Солэн Духез соосты люкалоз.
17Со Ачиз соослы пус чӧлтӥз,
Солэн киыз сое мертаса соослы люкиз;
пумтэм вапумъёс ӵоже сое соос киулазы возёзы,
выжыысь выжые отын улозы.
Глава 34