Выбрать язык
Книги Ветхого Завета
Книги Нового Завета
с русским текстом1Луоё кыр, кӧс музъем шулдыръяськоз,
калыктэм музъем шумпотоз,
лилия кадь со сяськаяськоз.
2Туж чебер сяськаялоз но шумпотоз,
шумпотоз-шулдыръяськоз, куаныса улоз.
Ливанлэн данэз, Кармиллэн но Саронлэн чеберлыксы
солы сётэмын луоз.
Кузё-Инмарлэсь пиштӥсь данлыксэ,
Инмармылэсь быдӟымлыксэ соос адӟозы.
3Лябӟем киостэс кужмоятэ, куалекъясь пыдесъёстэс юнматэ;
4дӥсьтӥсьтэм, кышкась муртъёслы вералэ:
«Юнэсь луэ, эн кышкалэ! Тани тӥляд Инмарды,
пунэм сётон лыктоз, Инмарлэн пунэм берыктонэз.
Со лыктоз но утёз тӥледыз».
5Соку синтэмъёслэн синъёссы усьтӥськозы,
пельтэмъёслэн пельзы кылыны кутскоз.
6Соку чут мурт пужей кадь тэтчоз, кылтэм мурт кырӟаны кутскоз;
луоё кырын вуос потозы, кыр дуннеын ву ӧръёс усьтӥськозы.
7Вулы укшась ворекъясь вужер тылы пӧрмоз,
пашмем музъем ошмес вуосын пачылмоз;
шакалъёслэн азьвыл улон, шутэтскон интыязы шашы, камыш будоз.
8Отын бадӟым сюрес луоз,
отӥ мынӥсь сюрес дун-шектэм шуыса лыдъяськоз:
сьӧлыко-кырсь мурт со вылтӥ уз ветлы; дун-шектэмъёслы со луоз;
та сюрестӥ мынӥсьёс, дышымтэосыз-валамтэосыз гинэ но,
уз йыроме.
9Лев отын уз луы, сьӧсь пӧйшур со сюрес вылэ уз султы,
сое отысь уз шедьты;
отӥ сьӧлыклэсь мозмытэмъёс ветлозы.
10Соку Кузё-Инмарлэн мозмытэм муртъёсыз берытскозы но
шумпотыса, куараен черекъяса,
Сӥонэ лыктозы;
соослэн йыр вылазы бырисьтэм шумпотон улоз;
соос шумпотон, шулдыръяськон пӧлын улозы,
нош куректон-кайгу, лулӟылӥськон соос дорысь кошкозы.
Глава 35