Выбрать язык
Книги Ветхого Завета
Книги Нового Завета
с русским текстом1Езекия дас ньылетӥ арзэ эксэйын пукыку, Ассириялэн Сеннахирим эксэез Иудеялэн вань юнматэм городъёсыз вылэ урдскиз но соосты киултӥз.2Ассириялэн эксэез Лахисысь Иерусалиме Езекия эксэй доры Рабсакез бадӟым войскоен ыстӥз; со дугдӥз вылысь ӵыпетлэн ву бызён дырдыез доры, дэра гужатӥсьлэн бусыысьтыз сюрес вылэ.3Со доры потӥз эксэй юртэн кивалтӥсь, Хелкиялэн пиез Елиаким, Севна подъясь но эксэй ужъёсты гожъясь Асафлэн Иоах пиез.4Рабсак соослы шуиз: «Езекиялы вералэ: тазьы шуэ быдӟым эксэй, Ассириялэн эксэез: мар со сыӵе оскиськон, кудӥз вылэ тон оскиськыса улӥськод?5Мон малпасько, та – токма, буш кылъёс, нош ожмаськон понна визь-кенеш но кужым кулэ; озьыен, мон бордысь куштӥськыса, кин вылэ тон оскиськиськод?6Тани, тон малпаськод Египет вылэ – чигиськем боды вылэ – пыкиськыны, кин со боды вылэ пыкиськиз, солэн кияз со пыроз но сое бышкалтоз. Сыӵе со фараон, Египетлэн эксэез, ваньмызлы солы оскиськисьёслы.
7Нош мыным шуид ке: ”Инмармы Кузё-Инмар вылэ ми оскиськиськом”, – со вылэ ӧвӧл-а, кинлэсь вӧсяськон гурезьёссэ, курбон сётон интыоссэ Езекия кулэтэм кариз но Иудаен Иерусалимлы со шуиз: ”Таиз курбон сётон азьын гинэ йыбыртъялэ”.8Озьыен, эшъяськон кусып кылдыты мынам кузёеным, Ассириялэн эксэеныз; мон тыныд кык сюрс вал сёто, соос вылэ пуктыны адямиос шедьтод-а?9Кызьы тон озьы мынам кузёелэн ляльчиосызлэсь покчиосыз пӧлысь покчизэ азьветлӥсез чигнаны косыны ӧдъяськод, – Египет вылэ, солэн ожмаськон уробоосыз, валъёсыз вылэ оскиськыса-а?10Кузё-Инмарлэн эрикезтэк шат мон та музъем вылэ, сое тарканы-куашкатыны лыктӥ? Кузё-Инмар мыным шуиз: ”Со музъем вылэ мыныса, тарка-куашкаты сое”».
11Елиаким, Севна, Иоах Рабсаклы шуизы: «Аслад ляльчиосыдлы арамей кылын вера, малы ке шуоно ми валаськомы, нош иудей кылын милемын эн вераськы, борддор вылын сылӥсь калык медаз кылы».12Рабсак соку шуиз: «Тынад кузёед доры но тон доры гинэ шат та кылъёсты вераны мынам кузёе ыстӥз? Ӧвӧл, борддор вылын пукись адямиос доры но ыстӥз, тӥледын ӵош асьсэлэсь сӥтьсэс мед сиёзы, кизьзэс мед юозы шуыса».
13Рабсак султӥз но иудей кылын бадӟым куараен кеськыса шуиз: «Быдӟым эксэйлэсь, Ассириялэн эксэезлэсь, верамзэ кылзэ!14Тазьы шуэ эксэй: Езекия тӥлесьтыд визьдэс медаз туга, со тӥледыз утьыны уз быгаты ук.15Езекия тӥледыз Кузё-Инмар вылэ оскиськытыса медаз возьы, медаз шуы: ”Асьмеды Кузё-Инмар утёз, Ассириялэн эксэезлэн киулаз та город сётэмын уз луы”.16Езекияез эн кылзэ. Уго тазьы шуэ Ассириялэн эксэез: ”Монэн тупатске, мон доры потэ, котькудды но виноградпудысьтыды, смоквапуысьтыды емышъёс мед сиёды, котькудды асьтэлэн гудӟемысьтыды ву мед юоды,17мон лыктытозь, тӥляд музъемды кадь ик нянё, винаё, емышо, виноградо музъем вылэ тӥледыз басьтытозям озьы каре”.18Езекия тӥлесьтыд визьдэс, тазьы вераса, медаз туга: ”Кузё-Инмар асьмеды утёз”. Ассириялэн эксэезлэсь язычникъёслэн инмаръёссы ас музъемзэс утьыны быгатӥзы-а?19Кытын Емафлэн но Арпадлэн инмаръёссы? Кытын Сепарваимлэн инмаръёсыз? Мынам киылэсь Самарияез соос утизы-а?20Та музъемъёслэн инмаръёссы пӧлысь кудӥз мынам киылэсь ас музъемзэ утиз? Кузё-Инмар быгатоз шат Иерусалимез мынам киылэсь утьыны?»
21Нош соос чус улӥзы, пал кыл но вераны ӧз быгатэ, малы ке шуоно эксэйлэсь таӵе косон верамын вал: «Солы ответ эн сётэ».22Хелкиялэн пиез Елиаким – эксэй юртлэн кузёйырез, Севна нимо подъясь, Иоах, Асафлэн пиез – гожъяськись, кесяськем дӥськутэн Езекия доры лыктӥзы но солы Рабсаклэсь кылъёссэ веразы.
Глава 36