Выбрать язык
Книги Ветхого Завета
Книги Нового Завета
с русским текстом1Езекия эксэй тае кылэмез бере аслэсьтыз дӥськутсэ кесиз но, бышкись чурыт дӥськут дӥсяса, Кузё-Инмарлэн юртаз мынӥз;2эксэй юртлэсь кузёйырзэ Елиакимез, Севна подъясез но бадӟымъёссэ священникъёсты, бышкись чурыт дӥсянэн шобырскытыса, Амослэн пиез Исаия пророк доры ыстӥз.3Соос солы шуизы: «Тазьы шуэ Езекия: ”Та нунал ӝоже усёнлэн, вӧсь каронлэн, возьытэ вуонлэн нуналыз; нуныос анайзылэн пушкысьтызы потон интыязы вуизы, нош нуны вайыны анайлэн кужымез ӧвӧл.4Оло нош тынад Инмаред Кузё-Инмар кылоз Рабсаклэсь вань верам кылъёссэ, сое татчы солэн кузёез – Ассириялэн эксэез – улэп Инмарез сантэманы, урод кылъёсын тышкаськыны ыстӥз, соосты тынад Инмаред Кузё-Инмар кылӥз. Улэп кылемъёс понна вӧсяськы ук”».5Езекия эксэйлэн медоосыз Исаия доры лыктӥзы.6Исаия соослы шуиз: «Асьтэлэн кузёдылы вералэ: ”Тазьы шуэ Кузё-Инмар: Ассириялэн эксэезлэн медоосызлэсь Монэ сантэмам кылъёссэс кылыса эн кышкатскы.7Тани со пушкы Мон духез лэзё, со ивор кылоз но аслаз музъемаз берытскоз, нош Мон сое аслаз музъем вылаз мечен погырто”».
8Рабсак ас дораз берытскиз, соку Ассириялэн эксэез Ливналы пумит ожмаське вал; со кылӥз, Ассириялэн эксэез Лахисысь кошкиз шуыса.9Эфиопиялэн эксэез Тиргака сярысь Сеннахирим кылӥз; солы шуизы: «Тани Тиргака тонэн ожмаськыны потӥз». Тае кылэмез бере со Езекия доры тае вераны ыстӥз:10«Тазьы вералэ Езекиялы, Иудеялэн эксэезлы: оскиськыса улоно Инмаред тонэ медаз пӧя: Иерусалим Ассириялэн эксэезлэн киулаз сётэмын уз луы.11Тон кылӥд, мар каризы Ассириялэн эксэйёсыз киултэм музъемъёс вылын, – соосты быдтӥзы; тон-а быдэс кылёд?12Атайёсылэн таркам музъемысьтызы калыкъёслэн инмаръёссы соосты утизы-а? Утизы-а Гозанэз, Харранэз но, Рецефез но, Фалассарысь Еден пиосты но?13Кытын Емафлэн эксэез, Арпадлэн эксэез, Сепарваим карлэн эксэез, Еналэн, Иввалэн эксэйёссы?»
14Езекия ыстэм муртъёслэн киысьтызы гожтэтэз басьтыса лыдӟиз, Кузё-Инмарлэн корказ мыныса, сое Езекия Кузё-Инмарлэн азяз усьтӥз;15Езекия Кузё-Инмар азьын вӧсяськиз, со шуиз:16«Саваоф Кузё-Инмаре Израильлэн Инмарез, херувимъёс вылын пукись! Тон Одӥгнад музъем вылысь вань эксэйлыкъёслэн Инмарзы, Тон инэз но музъемез кылдытӥд.17Кузё-Инмаре, пельдэ сак кар, кыл монэ; Кузё-Инмаре, синъёстэ усьтыса учкы но Тонэ, улэп Инмарез, сантэманы ыстэм Сеннахиримлэсь кылъёссэ пеляд пон.18Зэм ик, э, Кузё-Инмаре! Ассириялэн эксэйёсыз вань кунъёсты, музъемъёсты тырттэм кельтӥзы,19соослэсь инмаръёссэс тыл пӧлы куязы; нош таос инмаръёс ӧй вал, – соос адями киын лэсьтэмын вал – пулэсь, излэсь, соин ик соос быдтэмын вал.20Али но, Кузё-Инмаре, милям Инмармы, уть милемыз тушмонлэн киызлэсь; музъем вылысь вань эксэйлыкъёс мед тодозы, Кузё-Инмаре, Тон огнад гинэ Инмар луиськод шуыса».
21Амослэн пиез Исаия Езекия доры тае вераны ыстӥз: «Тазьы шуэ Кузё-Инмар Израильлэн Инмарез: Ассириялэн эксэезлы Сеннахиримлы пумит мар сярысь тон Мон азьын вӧсяськид, Мон тодӥсько;22тани Кузё-Инмарлэн со сярысь верам кылыз:
синазькыль кароз, серекъялоз тонэ, Сӥонлэн ныллыксэ утись нылыз,
Иерусалимлэн нылыз, тынад бӧрсяд йырыныз сэзъялоз.
23Кинэ тон курлад, сантэмад?
Кин шоры куарадэ будэтӥд,
кин шоры, сокем вылтӥяськыса, синъёстэ ӝутӥд?
Израильлэн Дун-Сьӧлыктэмез вылэ.
24Аслад ляльчиосыд пыр тон Кузё-Инмарез тышкаськыса шуид:
”Туж трос ожмаськон уробоосыным гурезьёслэн йылазы,
Ливанлэн урдлыосыз вылэ, мон туби, ӝужытэсь кедырпуоссэ ӵоги,
синмаськымонэсь кипарисъёссэ погыртӥ,
солэн самой йылаз туби, садэзлэн ӵем интыяз пыри;
25гудӟиськыса ву поттӥ но юи;
аслам пыдтышъёсыным Египетлэсь вань шуръёссэ куасьто”.
26Тон ӧд кылылы шат,
тае Мон туж кемалась аръёсы лэсьтӥ ни шуыса,
вашкала нуналъёсы тае лэсьтыны эсэплай ни шуыса,
нош али быдэстӥ соин, – юнматэм городъёсты таркаськод но
куашкатэм из люкъёслы пӧрмытъяськод?
27Соослэн улӥсьёссы кужымтэмесь луизы,
куалекъяло, возьдаськыса уло.
Соос луизы бусыысь турын кадесь, ненег вож турын кадесь,
липет йылысь будос кадесь,
шепаськемезлэсь азьвыл ик сутӥськем ю-нянь кадесь.
28Пуксёд-а тон, потод-а, пырод-а, – Мон ваньзэ тодӥсько,
тынэсьтыд Мыным пумит кышкатэк улэмдэ но тодӥсько.
29Мынэсьтым кышкатэк улэмед понна,
вылтӥяськыса улэмед пель сьӧрам вуэм понна
нырпасьёсад кульчоме поно, ымъёстэ кортнало но
со лыктэм сюрестӥд ик берен дорад келяло.
30Тани, Езекия, тыныд паймымон тодмет возьматӥсько: усем юлэсь будэм нянез та арын сие, мукетаз аре ас понназ будэм ю-нянез сие; нош куинетӥяз аре ю-нянь кизе, аралэ, виноград садъёс мерттэ но соослэсь емышъёссэс сие.31Иудалэн юртаз утиськыса кылем люкет нош ик улласянь выжы лэзёз но вылласянь емыш ваёз,32уго Иерусалимысь улэп кылемъёс потозы, Сӥон гурезьысь утиськемъёс потозы. Саваоф Кузё-Инмарлэн сюлмаськонэз-тыршонэз тае лэсьтоз.
33Соин ик Кузё-Инмар Ассириялэн эксэез сярысь шуэ:
”Та городэ со уз пыры, пукыӵ ньӧлзэ но отчы уз ыбы,
щитэныз со доры уз лыкты, солы пумит мудэт уз ӝуты,
34со лыктэм сюрестӥз ик дораз берытскоз,
нош таяз городэ уз пыры, – шуэ Кузё-Инмар. –
35Мон та городэз возьмало,
Ачим понна, Давид ляльчие понна Мон сое утё”».
36Кузё-Инмарлэн Кылчинэз потӥз но ассир пиослэн сылон интыысьтызы сю тямыстон вить сюрс адямизэс быдтӥз. Ӵукна ӵук султӥзы но адӟизы: кулэм шӧйёс музъем вылын кыллё.37Чигнаса кошкиз, дораз берытскиз Сеннахирим, Ассириялэн эксэез; Ниневияын со улыны кутскиз.38Аслаз инмарезлэн, Нисрохлэн, корказ йыбырттон дыръяз солэн Адрамелех но Шарецер пиосыз сое мечен виизы, нош асьсэос Арарат музъеме пегӟизы. Сеннахирим интые эксэе пуксиз солэн Асардан пиез.
Глава 37