Выбрать язык
Книги Ветхого Завета
Книги Нового Завета
с русским текстом1Со нуналъёсы Езекия кулоно кадь черлаз. Со доры Амослэн пиез Исаия пророк лыктӥз но солы шуиз: «Тазьы шуэ Кузё-Инмар: аслад юртэд пумысен сӥзиськон гожтэт гожты, уго тон кулод, уд ни бурмы».2Соку Езекия ымнырыныз борддор пала берытскиз но Кузё-Инмарлы вӧсяськыса шуиз:3«Э, Кузё-Инмаре! Тодад вай, кызьы мон Тон азьын шонерлыко улӥ, оскиськымон вал, Тыныд ярамон уж лэсьтыса улӥ». Езекия кужмо бӧрдыны кутскиз.
4Кузё-Инмар дорысь Исаиялы тазьы шуэмын вал:5«Мын, Езекиялы вера: тазьы шуэ Кузё-Инмар, Давидлэн, тынад атаедлэн Инмарез: Мон кылӥ тынэсьтыд вӧсяськемдэ, синкылиостэ адӟи, но тани тынад улоно нуналъёсыд борды дас вить ар ватсасько.6Ассирия эксэйлэн киызлэсь тонэ но, та городэз но утё, та городэз чакласа-возьмаса уло.
7Кузё-Инмар сётэм кылзэ быдэстоз шуыса тани тыныд Кузё-Инмарлэн сётэм паймымон тодметэз:8Ахазлэн тубатъёсыз вылэ васькем шундылэсь вужерзэ мон дас вамышлы берлане берыкто». Тубатъёс вылэ васькем шунды дас вамышлы берлане берытскиз.
9Иудей эксэйлэн Езекиялэн висьыса бурмем бераз вӧсяськонэз:
10«Аслым ачим мон шуи:
улонлэн шор вадесаз мон дунне пыдэслэн капкаяз пырыны кулэ;
улоно аръёсылэсь пумзэ адӟытэк кылисько.
11Мон шуылӥ: Кузё-Инмарез мон уг адӟы,
улэпъёслэн музъемысьтызы Кузё-Инмарез уг адӟы;
дунне вылын улӥсьёс пӧлысь адямиез мон уг адӟы ни;
12мынам улон интые ас интыысьтыз басьтэмын луоз,
пудо возьмасьёслэн балаганзы кадь мон дорысь со нуэмын луоз;
куиськись музэн, дэра пуме кылем шортэз вандэм кадь
Со мынэсьтым улонме вандыса уськытоз;
уй но нунал мон вити, Тон мыным кулон-эзель ыстод шуыса.
13Ӵукнаозь мон вити;
сьӧсь пӧйшур музэн вань лыосме Со тӥялляз;
уй но нунал мон вити, Тон мыным кулон-эзель ыстод шуыса.
14Тури кадь, ваёбыж кадь мон куара поттылӥ, дыдык кадь гурлай;
ӝожомыса синъёсы ин пала учкыса улӥзы.
Кузё-Инмаре! Ӝикыт мыным; уть монэ!
15Мар шуо на мон? Со мыным шуиз, – Со ик лэсьтӥз но.
Лулылэсь куректон-кайгузэ тодам возьыса, каллен-востэм улыса,
ортчыто вань улоно аръёсме.
16Кузё-Инмаре!
Тазьы адямиос уло, ваньмыз та бордын – мынам духелэн улонэз;
Тон монэ бурмытод, улон нуналъёс мыным кузьмалод.
17Тани мыным ӟеч мед луоз шуыса,
бадӟым куректон-кайгу мыным сётэмын вал,
озьы Тон мынэсьтым лулме бырон гулэсь мозмытӥд,
мынэсьтым вань сьӧлыкъёсме Аслад сюрлыэд сьӧры сэрпалтӥд.
18Дунне пыдэс уго уг данъя Тонэ, кулон уг ушъя Тонэ,
шайгуэ пыремъёс Тынад зэмлыкед вылэ уг оскисько.
19Улэп мурт, улэп мурт гинэ Тонэ данъялоз,
кызьы мон али Тонэ данъясько;
тынэсьтыд зэмлыктэ атай ас нылпиосызлы ивортоз.
20Кузё-Инмаре монэ утёз;
вань улоно нуналъёсмы ӵоже, Кузё-Инмарлэн юртаз
крезь шудыса, Инмарез ушъяса-данъяса уломы».
21Исаия шуиз: «Смоква емышез шори вандылыса мед ваёзы но пыктэм интыез котыр ласянь мед шобыртозы; соку пыктос быроз».22Нош Езекия шуиз: «Кузё-Инмарлэн корказ ветлонэлы мыным кыӵе паймымон тодмет возьматэмын луоз?»
Глава 38