Выбрать язык
Книги Ветхого Завета
Книги Нового Завета
с русским текстом1Буйгатэ, буйгатэ Мынэсьтым калыкме, – шуэ Инмарды;
2Иерусалимлэн сюлмызлы вералэ, ивортэ солы
нюръяськонэзлэн дырыз быдэсмиз шуыса,
шонертэм ужъёсыз понна ”ӟеч” каремын ни,
уго Кузё-Инмарлэн киысьтыз вань сьӧлыкъёсыз понна
кык полэс вӧсь карон басьтӥз.
3Кыр дуннеын кеськисьлэн куараез:
Кузё-Инмарлы сюрес дасялэ,
асьмелэн Инмармылы кыр интыын шонертэлэ сюресэз.
4Котькыӵе нёжал но пачыл мед луоз,
котькыӵе гурезь но выр мед лапегалозы,
кырыж интыос мед шонералозы,
выро-гопо сюресъёс мед ӵошкыталозы;
5Кузё-Инмарлэн данэз лыктоз но,
[Инмарлэсь утёнзэ] вань адямиос ас синмынызы адӟозы;
Кузё-Инмарлэн ымыз тае вераз уго.
6Куара вера: «Иворты!» Мон шуи: «Мар сярысь мыным ивортоно?»
Котькудӥз лулмугор – со турын-куар,
солэн вань чеберлыкез бусыын будӥсь сяська кадь.
7Со вылэ Кузё-Инмар пельтэ ке, турын куасьме, сяська шуя.
Озьы ик калык но – со турын-куар.
8Турын куасьме, сяська шуя,
нош Инмармылэн кылыз пумтэм вапумъёс ӵоже улоз.
9Ӟеч ивор верась Сӥон, ӝутскы ӝужыт гурезь йылэ!
Ӟеч ивор верась Иерусалим, кужмояты аслэсьтыд куарадэ,
кужмо кар, эн кышка!
Иудалэн городъёсызлы шу: «Тани – тӥляд Инмарды!»
10Тани, Инмар Кузё-Инмар кужымен лыктоз,
суйбыгытэз бордын кужым луоз.
Солэн кузьымез-медэз Ас бордаз,
пунэм берыктонэз но Солэн Ас азяз.
11Пудо возьмась кадь Со Аслэсьтыз уллёзэ возьмалоз;
ыжпиоссэ кияз кутоз но гадь бордаз ӟыгыртыса нуллоз,
нонтӥсь ыжъёссэ валтыса нуллоз.
12Кин кырыменыз вуэз омыръяса быдтӥз, висеныз инъёсты мертаз,
музъемлэсь сюйзэ мертэтэ тэрытӥз, вес вылын гурезьёсты мертаз,
веслэн тэркы вылаз мувыръёсты мертаз?
13Кин Кузё-Инмарлэсь малпанзэ тодӥз,
Солы визь-кенеш сётыса, Сое дышетыса улӥз?
14Кинэн Со кенеше, кин Солы визь-нод понэ,
шонерлыклэн сюрес вылаз Сое султытэ,
тодон-валан Солы сётэ, визьлыклэсь сюрессэ солы возьматэ?
15Тани калыкъёс – ведраысь ву шапык выллемесь,
вес вылысь тузон пыры выллемесь.
Тани, шормуӵъёсты лымы пырыез кадь со ӝутка.
16Курбонэз тылын сутыны Ливанлэн пуэз но уз тырмы,
отын улӥсь пудо-животъёс но тылын сутыса вӧсяно курбонлы уз тырме.
17Вань калыкъёс Со азьын – нокин кадь но ӧвӧл, –
ӧвӧлтэмлэсь вань гинэ, тырттэм макеос кадь лыдъясько Со азьын.
18Озьыен, Инмарез кинлы тӥ укшатоды?
Кыӵе-сыӵе Солы укшась маке тӥ шедьтоды?
19Сульдэрез лэсьтэ-кисьтэ скульптор, зарнивуась сое зарниен шобыртэ но азвесь жильыос бордаз шедьытъя.20Нош кин ке начар таӵе кузьмаськон ужлы, со сисьмисьтэм писпуэз быръе, кибашлы суредасез аслыз утча йыг-йыг сылӥсь сульдэр лэсьтон понна.
21Уд тодӥське шат? Тӥ ӧд кылэ шат?
Кутсконысеныз ик тӥледлы верамын ӧй вал шат?
Музъемез кылдытыны кутскон дырысен ик ӧд валалэ шат?
22Инмар музъем шар йылын,
Со азьын музъем вылын улӥсьёс саранчалы укшало.
Векчи басмаез кадь инъёсты Со вӧлдӥз,
улоно чумез кадь соосты интыяз.
23Кивалтӥсьёсты со номыртэм макелы пӧрмытэ,
музъем выл судьяосты ӧвӧлтэмлы пӧрмытэ.
24Мырдэм гинэ соос мерттэмын, мырдэм гинэ киземын,
мырдэм гинэ модоссы сюе выжы лэзиз,
нош Со шоразы пельтӥз гинэ но,
соос соку ик куасьмизы,
куроез выллем соосты тӧлпери нуыса кошкиз.
25Кинлы тӥ Монэ укшатоды, кинэн Монэ ӵошатоды? –
шуэ Дун-Сьӧлыктэм.
26Инъёслэн вылӥязы, синъёстэс ӝутыса, учкелэ:
кин соосты кылдытӥз?
Кин инлэсь воинъёссэ лыдъяса поттэ?
Соосты ваньзэс Со нимзыя вера;
Инмарлэн быдӟым кужымез, туж бадӟым кужымез,
Со дорын номыр но уг ышы-быры.
27Кызьы бен тон, Иаков, вераськод, Израиль, малпандэ поттӥськод:
«Мынам сюресэ Кузё-Инмарлэсь ватэмын,
мынам уже Инмаре дорын вунэтэмын».
28Тон уд тодӥськы шат? Тон ӧд кылы шат,
Инмар, пумтэм вапумъёслэн Инмарзы Кузё-Инмарзы,
музъемлэсь пумъёссэ кылдытӥсь,
Со уг жадьы, уг катьтэммы шуыса?
Солэн визьмыз эскерыса тодыны луонтэм.
29Жадем муртлы Со кужым сётэ, катьтэммемлы юнлык кузьма.
30Егит пиос но жадё, лябӟо, егит муртъёс но усьыло,
31нош Кузё-Инмарлы оскиськыса улӥсьёс
кужым басьтыса выльдӥськозы:
ӧрӟи музэн бурдъёссэс ӝутозы, бызёзы – уз но жаде,
мынозы – уз но катьтэмме.
Глава 40