Выбрать язык
Книги Ветхого Завета
Книги Нового Завета
с русским текстом1Мон азьын чус кариське, шормуӵъёс,
калыкъёс кужымзэс мед выльдозы,
соос матэ мед лыктозы но шуозы: «Судэ ӵош султоме».
2Шундыӝужанысь шонер улӥсь муртэ кин ӝутӥз,
кин сое бӧрсяз мыныны ӧтиз,
кин со киулэ калыкъёсты сётӥз, эксэйёсты тэрытскись кариз?
Соосты меченыз сюйлы-тузонлы пӧрмытӥз,
пукыӵеныз соосты тӧлын пелляса нуллӥськись куро кариз.
3Со улля-бызьытэ соосты,
ас пыдыныз ноку но ветлымтэ сюрес кузя каньылэн мынэ.
4Кин лэсьтӥз, быдэстӥз тае?
Со, Кин кутсконысеныз ик выжыосты ӧте-поттэ;
кутсконысеныз ик Мон – Кузё-Инмар, пумаз но – Мон ик со.
5Шормуӵъёс адӟизы но дэймизы,
музъемлэн пумъёсаз улӥсьёс дыр-р! куалекъязы.
Соос матэ лыктӥзы но огазе кариськизы;6котькудӥз аслаз эшезлы юрттэ, аслаз агай-вынызлы шуэ: «Юнматскы!»7Дуриськись лӧпкытъя корт ӵыжатӥсез, молотэн кортлист ӵошкытъясь сандал вылын дурисьлэсь мылкыдзэ ӝутэ, лякем вурыс сярысь шуэ: «Умой»; юн мед луоз шуыса, кортӵоген юнматъя.
8Нош тон, Израиль ляльчие, Мынам быръем Иакове,
Авраам эшелэн кидысэз, –
9Мон тонэ музъем пумысь басьтӥ,
музъемлэн пумысьтыз тонэ ӧти но шуи:
«Тон – Мынам ляльчие, Мон тонэ бырйи, бордысьтым уг палэнты».
10Эн кышка, Мон – тонэн огазьын, эн кепыра, Мон – тынад Инмаред;
Мон тонэ юнмато, юртто тыныд,
Ас шонерлыкелэн бур киыныз тонэ кутыса возё.
11Тани, возьытэ вуозы, ултӥян улэ сюрыса кылёзы ваньмыз
тыныд вожпотэмъёс, –
ӧвӧлтэм макелы пӧрмозы, кулозы-бырозы
тонэн вожвылъяськыса улӥсьёс.
12Тыныд пумит тушмонъяськыса улӥсьёсты утчалод, но уд шедьты;
тонэн нюръяськыса улӥсьёс ӧвӧлтэм макелы пӧрмозы,
чылкак ышозы-бырозы.
13Мон уго тынад Инмаред Кузё-Инмар;
тонэ бур китӥд кутыса возисько но тыныд шуисько:
«Эн кышка, Мон тыныд юрттӥськисько».
14Эн кышка, сюй нумыр, Иаков, ӧжыт калыко Израиль, –
Мон тыныд юрттӥськисько, –
шуэ Кузё-Инмар, тынад Мозмытӥсед, Израильлэн Дун-Сьӧлыктэмез.
15Тани Мон тонэ лэчыт, выль, пинё кутсаськон кари;
тон кутсалод но гурезьёсты пыргытод,
мувыръёсты тӧлбер выллем карод.
16Тон соосты тӧлод но тӧл соосты нуоз, тӧлпери соосты пазьгоз;
нош тон Кузё-Инмар бордын шумпотыса улод,
Израильлэн Дун-Сьӧлыктэменыз ушъяськыса улод.
17Начаръёс, кураськисьёс ву утчало, нош со ӧвӧл;
сюзы куасьмыса, кылзы куасьме;
Мон, Кузё-Инмар, соосты кыло,
Мон, Израильлэн Инмарез, соосты огназы уг кельты.
18Гурезьёсысь шуръёсты бызьыто, нёжалъёсысь ошмесъёсты потто;
луоё кырез тылы пӧрмыто, кӧс музъемез ву сётӥсь каро.
19Луоё кыре кедырпу, сӥттимпу, миртапу, вӧйпу мертто;
кыр азе кипариспу, яворпу, букпу огазе мертто,
20мед адӟозы, мед тодозы, учкыса мед валалозы,
Кузё-Инмарлэн киыз тае лэсьтӥз,
Израильлэн Дун-Сьӧлыктэмез тае кылдытӥз шуыса.
21Асьтэлэсь уждэс возьматэ, – шуэ Кузё-Инмар.
Шонер луэмдэс юнматыны тырше, – шуэ Иаковлэн Эксэез.
22Соос мед возьматозы но милемлы мед вералозы
азьпалан мар луонэз;
солэн луонэзлэсь быдэсмемзэ азьло мед ивортозы,
соку ми асьме визьмын валаны тыршомы,
тодомы, маин со йылпумъяськиз,
яке азьпалан луоноез сярысь азьвыл ик мед тодытозы.
23Вералэ, мар луоз азьпалан, соку ми тодомы, тӥ инмаръёс шуыса,
яке лэсьтэлэ маке но ӟечсэ я уродзэ,
озьы ми мед паймомы но тӥледын валче мед адӟомы.
24Нош тӥ – ӧвӧлтэмлэсь ӧвӧлтэмъёс гинэ,
тӥляд ужъёсты но номырлы ярасьтэм;
юрӟымлык – кин тӥледыз аслыз быръе.
25Мон сое уйпалась ӝутӥ, – со лыктоз;
шундыӝужанысь Монэ ӧтёз,
напраез кадь кузёяськисьёсты лёгалоз,
горшок лэсьтӥсьлэн горд сюез нелькемез кадь соосты нелькоз.
26Кин та сярысь нырысь ик ивортӥз, солэсь трослы азьло
ми мед тодысалмы но вераны мед быгатысалмы: «Зэм»?
Но нокин озьы ӧз шуы, нокин но ӧз иворты,
тӥлесьтыд кылдэс нокин но ӧз кылы.
27Мон нырысез, кин Сӥонлы тазьы шуиз: «Тани со!»
Иерусалимлы ӟеч ивор верась сётӥ.
28Озьы, Мон учки, но нокин но ӧй вал,
соос пӧлысь визь-кенеш сётӥсь ӧз сюры,
кудъёсызлэсь Мон юаны мед быгатысал,
нош соос Мыным ответ мед сётысалзы.
29Ваньзы соос – ӧвӧлтэмлэсь ӧвӧлъёс,
номырлы кулэтэм-ярантэм соослэн ужъёссы;
соослэн вӧлыса лэсьтэм сульдэръёссы – буш омыр со,
тырттэм арбери.
Глава 41