Выбрать язык
Книги Ветхого Завета
Книги Нового Завета
с русским текстом1Тани, Мынам быръем ляльчи Пие,
Сое Мон китӥз кутыса возисько,
Со бордын Мынам ӟеч мылкыды улэ.
Со вылэ Мон Аслэсьтым Духме поно,
калыкъёслы Со шонер суд сярысь ивортоз;
2уз кеськы, куаразэ уз будэты, ульчаысен Солэсь куаразэ уз кылэ;
3чигтэм камыш бодыез уз тӥялты, гыбдась етӥнэз уз кысы;
шонер судить кароз.
4Музъем вылын шонерлыкез юнматытозяз
уз лябӟы, кынартэм уз кыльы,
Солэн законэз вылэ шормуӵъёс оскиськыса улозы.
5Инъёсты кылдытӥсь, соосты возъясь,
музъемез но мар со вылын вань – вӧлдӥсь,
со вылын улӥсь калыклы шокан сётӥсь,
со вылтӥ ветлӥсьёслы лул сётӥсь Инмар Кузё-Инмар тазьы шуэ:
6«Мон, Кузё-Инмар, Тонэ шонер лэсьтонэ ӧти,
Тонэ китӥд кутыса возё, утё Тонэ;
Тонэ калыклы сӥзён-косон сётӥсе пукто,
язычникъёслы югдытӥсь каро, –
7синтэмъёслэсь синзэс мед усьтод,
жильыетэ сюремъёсты пытсэтысь мед поттод,
пеймытын пукисьёсты ворсэтысь мед мозмытод.
8Мон – Кузё-Инмар, со – Мынам нимы,
Аслэсьтым данме мукетлы уг сёты,
вӧлыса лэсьтэм сульдэръёсты ушъяны уг лэзьы.
9Тани азьвыл верам быдэсмиз, табере выльзэ Мон иворто;
со быдэсмыны кутскемлэсь азьло Мон тӥледлы со сярысь иворто».
10Кузё-Инмарлы выль кырӟан кырӟалэ,
музъемлэн пумъёсысеныз Солы ушъян гуръёс чирдэлэ, –
тӥ, зарезь вылтӥ ветлӥсьёс, зарезь вуын уясьёс,
шормуӵъёс но отын улӥсьёс.
11Луоё кыр но отысь городъёс, Кидар выжылэн улоно гуртъёсыз,
шумпотон куарадэс поттэ;
изгурезьёсын улӥсьёс мед шумпотозы-шулдыръяськозы,
гурезьёс йылысен шумпотыса мед кесяськозы.
12Кузё-Инмарез мед данъялозы, шормуӵъёсын Сое мед ушъялозы.
13Батыр музэн Кузё-Инмар ӝутскоз, ожысь батыр кадь вожзэ поттоз;
черектӥськыса оже султон куара сётоз,
тушмонъёсыз азьын Аслэсьтыз кужымзэ возьматоз.
14Кема Мон шып улӥ, чидай, возиськи, нош табере,
нуны вайись мурт кадь, чир черекъяло, секытэн шокаса ӝушто;
15гурезьёсты, мувыръёсты тырттэм кельто,
вань турын-куарзэ отысь куасьто;
шуръёсты шормуӵъёслы пӧрмыто, тыосты куасьто.
16Синтэмъёсты сюрес кузя нуо, кудзэ соос уг тодо,
тодмотэм сюресъёс кузя соосты нуо;
соос азьысь пеймытэз югыт каро, кырыж сюресъёсты шонерто:
тӥни, мар Мон соослы каро, уг кушты соосты.
17Соку берлань чигналозы сульдэръёслы оскиськыса улӥсьёс;
вӧлыса лэсьтэмъёссылы «тӥ – милям инмаръёсмы» шуисьёс –
туж-туж возьытэ вуозы.
18Пельтэмъёс, кылзӥське, синтэмъёс, учкелэ, мед адӟоды.
19Кин Мынам ляльчие кадь синтэм,
кин Мынам ыстэм ивортӥсе кадь пельтэм?
Яратоно муртэ кадь кин адӟисьтэм,
Кузё-Инмарлэн ляльчиез кадь кин синтэм?
20Тон троссэ адӟид, но ӧд синйылты;
пельёсыд усьтэмын вал, но ӧд кылы.
21Шонерлыксэ возьматон понна Кузё-Инмарлы кулэ вал
законзэ вылӥе ӝутыны, данэ поттыны.
22Но та таркам, талам калык –
ваньзы соос музъем улъёсын думылыса возисько,
пытсэт пушкы ватэмын;
шедьтослы соос пӧрмизы, нош мозмытӥсьсы ӧвӧл,
таламын-качамын соос, нош нокин но уг шуы: «Берен сёт!»
23Тӥ пӧлысь кин тае кылыны пельзэ сак кариз, валаны тыршиз,
азьланяз улон понна тае санэ понӥз?
24Кин Иаковез таркаськон киулэ сётӥз,
Израилез таласьёс киулэ кельтӥз?
Кузё-Инмар ӧвӧл-а, Кинлы пумит асьмеос сьӧлыкаса улӥмы?
Кузё-Инмарлэн сюресъёсыз кузя соослэн ветлэмзы ӧз поты,
Солэсь законзэ санэ ӧз понэ.
25Вожпотонэзлэсь йыркурзэ, ожмаськонлэсь леклыксэ
соос вылэ Со кисьтӥз;
котыр ласянь соосты ӝуась тылын ожмаськон котыртӥз,
нош соос тае ӧз шӧдылэ;
соос дорын тыл ӝуаз,
нош соос сюлмынызы тае валаны ӧз тырше.
Глава 42