Выбрать язык
Книги Ветхого Завета
Книги Нового Завета
с русским текстом1Нош табере, Иаков, тонэ кылдытӥсь, Израиль, тонэ интыясь
Кузё-Инмар тазьы шуэ:
Эн кышка, Мон тонэ мозмытӥ, аслад нимыныд тонэ ӧти;
тон – Мынам.
2Вуос вамен-а выжод – Мон тонэн,
шуръёс вамен-а потод – соос тонэ уз выйытэ;
тыл пыр-а мынод – уд сутӥськы, гомась тыл но тонэ уз ӵушка.
3Уго Мон – Кузё-Инмар тынад Инмаред,
Израильлэн Дун-Сьӧлыктэмез, тынад Утисед;
тон понна Египетэз йырдон карыса сётӥ,
Эфиопияен Савеяез но тон понна сётӥ.
4Мынам син азям тон дуно, мусо, Мон тонэ яратӥ,
соин ик тон понна мукет калыкъёсты,
мукет адямиосты тынад лулыд понна сёто.
5Эн кышка, Мон тонэн огазьын;
тынэсьтыд выжыдэ шундыӝужанысь ваё,
шундыпуксёнысь но тонэ люкало.
6Уйпаллы шуо: «Вай, сёт», лымшорлы но: «Ӝегатыса эн возьы;
Мынэсьтым пиосме кыдёкысь шаеръёсысь вай,
нылъёсме музъем пумъёсысь вутты,
7кинъёс Мынам нимыным нимасько,
кинъёсты Аслам данэ понна кылдытӥ, пӧрмытӥ, лэсьты –
ваньзэс татчы вутты».
8Синмыз ке но вань, адӟисьтэм калыкез валтыса вай,
пельыз ке но вань, кылӥсьтэм калыкез поттыса вай.
9Вань калыкъёс огазе мед люкаськозы,
вань выжыос огазе мед герӟаськозы.
Соос пушкын кин та сярысь азьпалзэ тодытыса вераз?
Кутсконысеныз ик мар вал – мед ивортозы;
асьсэ пӧлысь адӟисьёсты мед ваёзы но шонере мед потозы,
кылыса тазьы шуыны мед луоз: «Шонер!»
10Кузё-Инмар шуэ:
«Тӥ но, Мынам быръем ляльчие но Мынам адӟисьёсы луиськоды,
тӥ Монэ мед тододы, Мыным мед оскоды,
мед валалоды, та – со Мон шуыса:
Мынэсьтым азьвыл но, Мон бере но Инмар ӧй вал, уз но луы.
11Мон, Мон – Кузё-Инмар, Мон сяна, мукет Утись ӧвӧл.
12Мон азьланьзэ тодытыса верай, ути, ивортӥ;
нош мукет Утисьты тӥляд ӧвӧл, Мон – Инмар,
тӥ сое асьтэос адӟисьёс луиськоды, – шуэ Кузё-Инмар. –
13Вапумъёслэн кутсконысенызы ик Мон – Со ик,
Мынам киылэсь утьыны нокин но уг быгаты;
Мон лэсьтӥ ке, кин сое палэнтыны быгатоз?»
14Тазьы шуэ Кузё-Инмар, тӥляд Мозмытӥсьты,
Израильлэн Дун-Сьӧлыктэмез:
«Тӥ понна Мон Вавилонэ ожмаськисьёсты ыстӥ но
тунгонъёсты-калэтъёсты куашкатӥ,
корабльёсын данъяськись халдейёсты но сэрпалтӥ.
15Мон – Кузё-Инмар, тӥляд Дун-Сьӧлыктэмды,
Израильлэн Кылдытӥсез, тӥляд Эксэйды».
16Тазьы шуэ Кузё-Инмар,
зарезь вамен, бадӟым вуос пыр сюрес усьтӥсь,
17ожмаськон уробоосты, валъёсты, ожгарчиосты, войскоез поттӥсь;
ваньзы огазе выдӥзы но ӧз ни султэ; сюсьтыл кадь кысӥзы.
18Нош тӥ азьвылзэ тодады уд вайиське,
вашкалаез сярысь уд малпаськиське.
19Тани Мон выльзэ лэсьтӥсько, ӝоген со лыктоз;
оло, тае но тодэмды тӥляд уг поты шат?
Кыр дуннеетӥ сюрес кыско, шуръёсты луоё кыртӥ ӧръяло.
20Луд пӧйшуръёс Монэ данъялозы, – шакалъёс но, страусъёс но,
малы ке шуоно луоё кырын Мон ву сёто,
кӧс кыртӥ шуръёсты ӧръяло
Аслэсьтым быръем калыкме сектан понна.
21Та калыкез Мон Аслым шуыса кылдытӥ,
со Мынэсьтым данлыкме тодытыса улоз.
22Нош тон, Иаков, Мыным ӧд вазиськылы;
тон, Израиль, Мон понна ужаны ӧд тыршы.
23Ыжпиостэ Мыным виро сётыны ӧд вайылы,
курбонъёс сётыса, монэ сӥлы ӧд карылы.
Салам нянь нуллыны косыса, Мон тонэ ӧй ёртылы,
фимиам вайыны курыса но, тонэ ӧй курадӟыты.
24Азвесен тон Мыным ческыт зын поттӥсь боды ӧд басьтылы,
курбонъёсыдлэн кӧй-вӧйынызы но тон Монэ тыр ӧд карылы;
сьӧлыкъёсыныд, законлы пумит улэмъёсыныд тон Монэ ёртылӥд.
25Мон, Мон Ачим,
Ачим понна тынэсьтыд йыружъёстэ ӵошкатылӥсько,
сьӧлыкъёстэ но тодэ уг вайы.
26Мынам тодам вайыты, судэ пыром;
шонере потон вылысь вера тон.
27Вашкала пересь атайёсыд сьӧлыказы,
дурбасьтӥсьёсыд Мон дорысь палэнскизы.
28Со понна вӧсяськон интыын сылӥсьёсты
священник луонлэсь мозмытӥ,
Иаковез курадӟон улэ кельтӥ,
Израилез тышкаськон-куаретон улэ сётӥ.
Глава 43