Выбрать язык
Книги Ветхого Завета
Книги Нового Завета
с русским текстом1Нош али кылзы, Иаков ляльчие, Мынам быръем Израиле.
2Тазьы шуэ Кузё-Инмар – тонэ кылдытӥсь, тонэ пӧрмытӥсь,
анай пушкысен ик тыныд юрттӥськись:
эн кышка, Мынам Иаков ляльчие, яратыса быръем [Израиле];
3уго Мон вуме сюэз куасьмись вылэ кисьто,
шур вуме пашмем музъем вылэ ӧръяло;
Аслэсьтым Духме выжыед вылэ кисьто,
нылпиосыдлэсь нылпиоссэс бакель каро.
4Ву ӧр дурысь бадьпуос кадь турын пӧлын будозы.
5Одӥгез шуоз: «Мон – Кузё-Инмарлэн»,
мукетыз нимаськоз Иаковлэн нимыныз;
нош кудӥз-огез ас киыныз гожтоз: «Мон – Кузё-Инмарлэн»,
со Израильлэсь нимзэ аслыз басьтоз.
6Тазьы шуэ Кузё-Инмар, Израильлэн Эксэез,
солэн Мозмытӥсез, Саваоф Кузё-Инмар:
Мон – нырысетӥез, Мон ик – берпуметӥез но;
Мон сяна, мукет Инмар ӧвӧл,
7кин – Мон кадез вань? Со мед вералоз, мед ивортоз но,
вашкала калыкез интыям дырысен кутскыса,
ваньзэ радызъя Мыным мед возьматоз
яке мед ивортоз али лыктӥсез сярысь, азьпалан мар луон сярысь.
8Эн кышкалэ, эн куалектӥське: кемалась дырысен ик ӧй-а иворты,
азьпалзэ тодыса ӧй-а вера Мон тыныд?
Тӥ – Мынам адӟисьёсы. Мон сяна, мукет Инмар вань на-а?
Ӧвӧл. Нокыӵе но мукет юнматскон интыез уг тодӥськы.
9Сульдэръёсты лэсьтӥсьёс – ваньзы номырлы ярасьтэмъёс, тужгес мылкыдлы кельшисьёсыз но нокыӵе пайда уг ваё, сое соос асьсэос асьсэлы адӟисьёс луо. Соос уг адӟо, уг но валало, соин ик сантэмамын луозы.10Кин лэсьтӥз ”инмарез”, нокыӵе но пайда вайисьтэм сульдэрез дуриз?11Та ужен вырисьёс ваньзы возьытэ вуттэмын луозы, уго сульдэр лэсьтӥсьёс асьсэос но адямиос пӧлысь ик потэмын; ваньзы соос огазе люкаськыса мед султозы; соку соос кышкатскозы, ваньзы возьытэ вуттэмын луозы.
12Дуриськись кортлэсь тӥр лэсьтэ, эгырен ужа, молотэн тупатъя сое, кужмо киыныз со бордын со сиемез потыса каньсыратозяз, ву юытэк катьтэммытозяз ужа.
13Лэсьтӥськись, [писпуэз бырйыса], со вылтӥ гож кыске, йылсо арбериен со вылтӥ тодмет лэсьтэ, собере ожонэн тупатъя, вӧлэ но солэсь чебер адямилы укшась тус пӧрмытэ сое корка пушкы пуктон понна.14Кедырпуосты кора, нюлэскын писпуос пӧлысь пужымез но тыпыез аслыз быръе, ясеньпу мерттэ, нош зор ву сое будэтэ.15Адямилы та эстӥськонлы мынэ, оглюкетсэ со шунтӥськонлы кутэ, тыл понэ но нянь пыже. Со бордысь ик инмарзэ лэсьтэ, солы йыбыртъя, сульдэр лэсьтэ но со азе уськытске.16Пулэсь оглюкетсэ тыл пӧлын сутэ, мукетыныз сиыны сӥль пӧзьтэ, тыл вылын сиёнзэ пыже но кӧтыз тырытозь сие; шунтӥське но шуэ: «Умой, мон шунай; шунытэз шӧдӥ».17Нош солэн кылем люкетысьтыз ик ”инмар” лэсьтэ, аслыз идол-сульдэр лэсьтэ, солы йыбыртъя, со азьын пыдесъяське, вӧсяське солы но шуэ: «Уть монэ, тон уго мынам инмаре».
18Уг тодо, уг валало соос: синзэс Со ворсаз – медаз адӟе, сюлэмзэс чурытомытӥз – медаз валалэ шуыса.19Аслаз сюлмаз тае со уз пырты, ӧвӧл солэн сомында тодонэз но, валанэз но тазьы шуыны: «Солэсь ӝынызэ мон тылын сутӥ, эгыр вылаз нянь пыжи, сӥльзэ тыл вылын пырсатӥ но сии – кылем люкетысьтыз юрӟым маке лэсьто-а?! Пу бакланлы йыбыртъяло-а?!»
20Со тузон сьӧрын уйылӥське; ӧрекчаськон улэ сюрем сюлэм сое йыромытӥз, табере со лулзэ уг ни быгаты мозмытыны но шуыны: «Бур ки улам ӧрекчаськонэз ӧвӧл-а?»
21Тае тодад возь, Иаков, Израиль, уго тон – Мынам ляльчие;
Мон тонэ кылдытӥ: Мынам ляльчие – тон Израиль, Монэ эн вунэты.
22Тынэсьтыд законлы пумит улэмдэ бусэз-ӵынкытэз кадь ӵошкато,
сьӧлыкъёстэ но пилемез кадь сылмыто;
Мыным вазиськы, Мон тонэ мозмыто.
23Шумпотэ-шулдыръяське, инъёс,
тае Кузё-Инмар лэсьтӥз ук.
Бадӟым куараен вазиськелэ, музъемлэн мурдалаосыз;
шумпотыса куашетэ, гурезьёс, нюлэс но отысь вань писпуос;
Иаковез мозмытӥсь Кузё-Инмар Израильын данэ потоз.
24Тазьы шуэ Кузё-Инмар, тонэ сьӧлыклэсь мозмытӥсь,
анаедлэсь пушкысеныз ик тонэ кылдытӥсь:
Мон – ваньзэ кылдытӥсь Кузё-Инмар,
огнам инъёсты возъяй, Ас кужыменым музъемез вӧлдӥ;
25ӧрекчи пророкъёслэсь паймымон тодметъёссэс
номырлы ярантэмесь карисько,
паймымон ужъёс лэсьтӥсьёслэсь визьтэмъяськонзэс
шарае поттӥсько,
визьлыкоосты берлань уллясько,
соослэсь тодонъёссэс серекъянлы пӧрмытӥсько,
26Ас ляльчиелэсь кылзэ юнматӥсько,
Ас ыстэм муртъёсылэсь веранзэс уж вылын быдэстӥсько;
Иерусалимлы шуисько: «Тон пушкын улӥсьёс луозы»;
Иудалэн городъёсызлы верасько: «Тӥ пуктэмын луоды»,
солэсь куашкатэм юртъёссэ Мон выльдо-тупато,
27пыдэстэм дуннелы шуисько: «Куасьмы!»,
шуръёстэ но Мон куасьто;
28Кир сярысь шуисько: Мынам возьмаськисе,
со Мынэсьтым вань эрикме быдэстоз но
Иерусалимлы шуоз: «Тон пуктэмын луод!»
Храмлы но шуоз: «Тон пуктэмын луод».
Глава 44