Выбрать язык
Книги Ветхого Завета
Книги Нового Завета
с русским текстом1Кирлы – вӧйын зырӟыса пуктэмезлы – тазьы шуэ Кузё-Инмар:
калыкъёсты ас киулад мед басьтод шуыса,
Мон тонэ бур китӥд кутыса возисько,
тон понна ӧсъёс мед усьтӥськозы,
капкаос медаз ворсаськелэ шуыса,
эксэйёслэн кускысьтызы езэс басьто;
2Мон тынад азьтӥд мыно но гурезьёсты ӵошкато,
ыргон ӧсъёсты куашкато, корт ворсэтъёсты тӥяло.
3Пеймыт азьын возиськись узырлыкъёсты,
ватэм байлыкез тыныд сёто –
тон мед тодод, Мон тонэ нимыныд нимась Кузё-Инмар,
Израильлэн Инмарез, луисько шуыса.
4Иаков ляльчие понна, Аслам быръеме Израиль понна
Мон тонэ нимыныд ӧти,
тонэ санэ понӥ, – тон Монэ ӧд ке но тоды.
5Мон – Кузё-Инмар, мукет Кузё-Инмар ӧвӧл.
Мон сяна, мукет Инмар ӧвӧл.
Мон тонэ кустӥд думи, тон Монэ ӧд ке но тоды,
6шундыӝужанысен шундыпуксёнозь мед тодозы,
Мон сяна, мукет Инмар ӧвӧл шуыса.
Мон – Кузё-Инмар, мукет Кузё-Инмар ӧвӧл.
7Мон югытэз кылдытӥсько, пеймытэз но пӧрмытӥсько;
каньыллык сётӥсько, шугадӟонъёс но поттӥсько.
Ваньзэ тае Мон, Кузё-Инмар, лэсьтӥсько.
8Инбамъёс, вылӥысен кисьтэ,
пилемъёс но шонерлык мед виятозы;
музъем мед усьтӥськоз но утиськон мед ваёз,
шонер улон мед ӝужалоз.
Мон, Кузё-Инмар, тае лэсьтӥсько.
9Куректон-кайгу со муртлы, кин ас Кылдытӥсеныз ченгеше,
музъем вылысь сӧриськем горшоклэн чалепез пӧлысь чалеп!
Горд сюй лэсьтӥсьлы шуоз-а: «Мар тон кариськод?»
Тынад ужед тон сярысь шуоз-а: «Солэн киыз ӧвӧл»?
10Куректон-кайгу атаезлы тазьы шуись муртлы:
«Малы тон монэ югыт дунне вылэ вордскытӥд», анаезлы но:
«Малы тон монэ вордскытӥд?»
11Тазьы шуэ Кузё-Инмар,
Израильлэн Дун-Сьӧлыктэмез но солэн Кылдытӥсез:
Тӥ Монэ юаськоды нылпиосылэн азьпалзы сярысь,
Мынам ужъёсам валэкъяськись луэмды потэ шат?
12Мон музъемез, адямиез кылдытӥ.
Мынам киосы инъёсты возъязы,
соослэн вань ожгарчиоссылы закон сётӥ.
13Мон сое шонер лэсьтон понна поттӥ,
солэсь вань сюресъёссэ ӵошкыт каро.
Со Мынэсьтым городме пуктоз,
пленэ сюремъёсме дун тырытытэк,
кузьымъёс октытэк, лэзёз, – шуэ Саваоф Кузё-Инмар.
14Тазьы шуэ Кузё-Инмар: египет калыклэн ужъёсыз,
Эфиопияын улӥсьёслэн вузкаронзы,
савейёс но – ӝужыт мугоро калык,
тон доры выжозы но соос тынад луозы;
соос тон сьӧры мынозы,
жильыяськемен лыктозы но тон азе уськытскозы,
сюлворыса тыныд шуозы:
«Тон бордын гинэ Инмар, мукетыз Инмар ӧвӧл.
15Зэм ик, Тон – ватӥськем-лушкем Инмар,
Израильлэн Инмарез, Утись».
16Ваньзы соос возьытэ вуттэмын, сантэмамын луозы;
соос огазьын возьытэ вуыса мынозы
ваньзы сульдэр-идол лэсьтӥсьёс но.
17Нош Израилез Кузё-Инмар пумтэм вапумъёс ӵоже утьыса возёз.
Пумтэм вапумъёс ӵожелы тӥ возьытэ вуттэмын, сантэмамын уд луэ.
18Уго тазьы шуэ инъёсты кылдытӥсь,
музъемез кылдытӥсь, сое пӧрмытӥсь Инмар Кузё-Инмар,
Кин юнматӥз сое, юнме ӧз лэсьты,
улон понна сое кылдытӥз:
«Мон – Кузё-Инмар, мукет Кузё-Инмар ӧвӧл».
19Мон лушкемен ӧй вералля, музъемлэн пеймыт азяз но ӧй ивортылы;
Иаковлэн выжыезлы Мон ӧй шуы: «Юнме Монэ утчаськоды».
Мон – Кузё-Инмар, шонерлык верась, зэмлыкез усьтӥсь.
20Люкаське, лыктэ, матэ кариське, ваньды,
калыкъёс пӧлысь улэп кылемъёс.
Сульдэрзэс бордазы нуллыса утисьтэм инмарлы вӧсяськисьёс
тупыттэм муртъёс луо.
21Куспады кенешем берады тазьы шуэ:
«Кин вашкала вапумъёсысен тае ивортӥз, азьвыл ик тае вераз?»
Мон, Кузё-Инмар, ӧй-а? Мон сяна, мукет Инмар ӧвӧл, –
шонер лэсьтӥсез, утисез, Мон сяна ӧвӧл.
22Музъемлэн вань пумъёсыз, Мон пала кариське, утемын луоды.
Мон – Инмар, Мон сяна, мукетыз Инмар ӧвӧл.
23Асэным кыл сётӥсько: Мынам ымысьтым шонерлык потэ,
кылы вошъяськисьтэм, юн.
Мон азе котькудӥз адями пыдесъяськыса йыбырттоз,
оскиськымон луыны Мынам нимыным вань адямиос кыл сётозы.
24Мон сярысь шуозы:
«Кузё-Инмар дорын гинэ шонерлык но кужым».
Со доры лыктозы но Соин тушмонъяськыса улӥсьёс
ваньзы возьытэ вуозы.
25Кузё-Инмар шонере поттоз но дано кароз вань Израиль выжыез.
Глава 45