Выбрать язык
Книги Ветхого Завета
Книги Нового Завета
с русским текстом1Нылмурт, Вавилонлэн нылыз, васькыса сюй вылэ пуксьы,
музъем вылын пук, эксэй пуконэд ӧвӧл ни, халдейёслэн нылзы,
азьланьын тонэ ненег, чебер шуыса уз ни нималэ.
2Кикӧдэ кутыса, пызьдэ из; шобреттэ басьты, дӥсь сӧзыдэ ӝут,
пыдесъёстэ кыре поттыса, шур вамен выж;
3гольыкед кыре потоз, возьдаськоно интыед ик адӟиськоз.
Пунэмзэ берыкто, нокинэ но уг жаля.
4Мозмытӥсьмылэн нимыз Саваоф Кузё-Инмар,
Израильлэн Дун-Сьӧлыктэмез.
5Шып кариськыса пук, пеймыт азе мын, халдейёслэн нылзы,
уго азьланяз тонэ, эксэйлыкъёслэн кузё-кышнозы шуыса,
уз ни нималэ.
6Ас калыке вылэ Мон вожме поттӥ,
Аслэсьтым люкетме ултӥяны тынад киулад сётӥ;
нош тон соосты ӧд жаля, –
пересь мурт вылэ укыр секыт зӥбеттэ ошид.
7Тон шуылӥд: «Пумтэм вапумъёс ӵоже кузё луо»,
нош визьмад ӧд поны, ӧд малпалля берло мар луон сярысь.
8Нош али тае кылзы, эркиям мурт, сюлмаськонъёстэк улӥсь,
ас сюлэмаз тазьы шуись: «Мон кадез, мукетыз мыным укшасез ӧвӧл:
палкышно кадь уг пукы, нылпиосы уз ыше-быре».
9Но шӧдтэк шорысь, одӥгаз нуналэ, тон доры лыктоз
соиз но, таиз но – нылпиостэк кылён но, палкышно луон но;
пачыл мертэтэн соос тон доры лыктозы,
трос пумо тунаськон-пелляськонъёсыд шоры,
пӧртмаськонъёсыдлэн туж бадӟым кужымзы шоры учкыса уз улэ.
10Уго тон, урод ужъёс лэсьтыны быгатонэд вылэ оскиськыса,
шуылӥд: «Нокин но монэ уг адӟы».
Визьлыкед, тодонлыкед тонэ сюрес вылысь кожытӥзы,
но тон ас сюлмад шуылӥд:
«Мон кадез, мыным укшасез нокин но ӧвӧл».
11Тон вылэ шугадӟон вуоз, тон уд тоды, кытысь со потоз;
секыт адӟон тон вылэ урдскоз, сое тон палэнтыны уд быгаты,
малпамтэ шорысь тон доры бырон лыктоз,
кудӥз сярысь тон уд но малпаськы.
12Пинал дырысеныд вырем трос пӧртмаськонъёсыныд,
тунаськон-пелляськонъёсыныд кыль ук:
оло нош – аслыд юрттод, оло нош – сылыны чидалод.
13Аслад трос кенешъёсыныд тон каньсырамын;
мед султозы ук инбамез чакласьёс, кизили тодмасьёс,
выль толэзь дыръя тунасьёс,
вуоно адӟонэдлэсь соос мед утёзы тонэ.
14Тани соос, куро кадесь: тыл соосты сутӥз, –
лулзэс гомась тыллэсь мозмытыны ӧз быгатэ;
эгыр ӧз ни кыльы шунтӥськыны,
тыл но со азьын пукон понна уг ни ӝуа.
15Ӵош ужам-тыршем, егит дырысеныд вузкарыса улэм эшъёсыд
тон понна сыӵеесь луизы.
Котькудӥз кошкиз ас палаз, нокин но тонэ уг утьы.
Глава 47