Выбрать язык
Книги Ветхого Завета
Книги Нового Завета
с русским текстом1Кылзэлэ тае, Иаковлэн юртэз, Израильлэн нимыныз нимаськисьёс,
Иудалэн пушкысьтыз потэмъёс,
Кузё-Инмарлэн нимыныз кыл сётӥсьёс но
Израильлэн Инмарезлы оскисьёс –
осконзы зэмлыко ке но ӧвӧл, осконзы шонерлыко ке но ӧвӧл.
2Уго соос, асьсэды святой городысь потэмын-будэмын шуыса
лыдъяло,
Израиль Инмар бордысь юрттэт утчало;
Солэн нимыз – Саваоф Кузё-Инмар.
3Ортчоно ужъёс сярысь Мон азьвыл ивортылӥ;
Мон соос сярысь вералляй,
соос сярысь ивортылӥ но соосты туж ӝог лэсьтылӥ, –
ваньмыз быдэсмылӥз.
4Мон тодӥсько вал, тон куасаськисьтэм шуыса,
чыртыысьтыд сӧнъёсыд корт кадь юнэсь,
кымесыд ыргон кадь чурыт шуыса.
5Соин ик Мон та сярысь тыныд азьвыл ик ивортылӥ, –
та вуэмлэсь азьло ик тодытылӥ,
тынад тазьы шуэмед медаз лу:
«Сульдэре тае лэсьтӥз, вӧлыса лэсьтэме,
кисьтыса лэсьтэме тае пӧрмытӥз».
6Та ужъёс сярысь тон кылӥд, соосты ваньзэ санэ пон!
Оло нош тае тӥ санэ уд понӥське?!
Нош али Мон тыныд ивортӥсько выльзэ, ватӥськемзэ, –
тон сое ӧд тодылы.
7Со туннэ пӧрмиз, азьвылгес ӧз,
одӥг нуналлы но азьло ӧз, тон ӧд кылы со сярысь,
«тани мон тае тодӥсько вал» шуыса верантэм понна.
8Тон ӧд но кылы, уд но тодӥськы вал та сярысь,
пельыд но тынад азьвыл усьтӥськемын ӧй вал;
Мон тодӥсько вал уго, тон кескич лэсьтод шуыса,
анаедлэн пушкысеныз ик уго тон,
осконлэсь куштӥськись шуыса, нимамын.
9Аслам нимы понна вожпотонме берло дырлы кельтылӥ;
Аслам данэлы луыса тонэ быдтон ужлэсь Асме кутыса вози.
10Тани Мон тонэ ӵыжатӥ, но азвесез кадь ӧй;
курадӟонлэн кӧрыказ пыртыса, тонэ чаклай-эскери.
11Ачим понна, Аслым Ачим понна тае лэсьтӥсько,
уго макем ултӥясалзы Мынэсьтым нимме!
Аслэсьтым данме мукетлы уг сёты.
12Монэ кылзӥськы, Иаков,
Мынам ӧтем Израиле, тон но кылзӥськы:
Мон со ик, Мон нырысетӥез но, Мон берпуметӥез но.
13Мынам киы музъемез кылдытӥз,
Мынам бур киы инъёсты вӧлдӥз;
соосты ӧтё но, соос огазе лыктыса султозы.
14Ваньнады люкаськыса кылзӥське:
соос пӧлысь кин тае азьвыл ик тодыса вераз?
Кузё-Инмар яратӥз сое,
со быдэстоз Солэсь эриксэ Вавилон вылын,
Солэсь кужымзэ халдейёс вылын возьматоз.
15Мон, Мон шуи но сое ӧти;
Мон сое вайи, сюресэз солэн берекето луоз.
16Мон доры лыктыса, кылзэ тае:
Мон кутсконысеныз ик лушкемен ӧй вералля;
со ортчыны кутскон дырысен Мон отын вал;
али но Монэ Инмар Кузё-Инмар но Солэн Духез ыстӥз.
17Тазьы шуэ Кузё-Инмар, тынад Мозмытӥсед,
Израильлэн Дун-Сьӧлыктэмез:
Мон Кузё-Инмар тынад Инмаред, тонэ пайдаё ужлы дышетӥсь,
тонэ мыноно сюрестӥд нуись.
18Э, тон Мынэсьтым курон-косонъёсме санэ ке понысалыд!
Соку тынад каньыллыкед шур кадь пачылмысал,
шонерлыкед зарезь тулкымъёс кадь ӝутскысал.
19Кидысэд тынад луо мында луысал,
макесысьтыд потӥсьёсыз – луо пыры мында;
выжыедлэн нимыз Мон азьысь ӧй ӵушиськысал, ӧй быдтӥськысал.
20Вавилонысь потэ, халдейёс дорысь пегӟе,
шумпотон куараен тае ивортэ,
тодытэ тае, музъемлэн пумозяз та иворез вӧлмытэ, вералэ:
«Кузё-Инмар Аслэсьтыз ляльчизэ Иаковез мозмытӥз».
21Луоё кыръёстӥ соосты Со нуыку, сюзы уг куасьмы:
изысь соослы Со ву поттэ; изгурезез ӵоге но, вуос кисьтӥсько.
22Нош сьӧлыклэсь кышкасьтэмъёслы каньыллык ӧвӧл, –
шуэ Кузё-Инмар.
Глава 48