Выбрать язык
Книги Ветхого Завета
Книги Нового Завета
с русским текстом1Кылзэ Монэ, шормуӵъёс, сак кылзӥське, кыдёкысь калыкъёс:
Кузё-Инмар Монэ вордскемелэсь азьвыл ик ӧтиз,
анаелэн пушкысеныз ик Мынэсьтым нимме вераз;
2ымме лэчыт меч кадь кариз;
Аслаз киызлэн вужереныз Монэ шобыртӥз,
мертчиськись пукыӵ ньӧл кадь Монэ кариз;
ньӧл возён сепысаз Монэ возиз.
3Со Мыным шуиз:
«Израиль, тон Мынам ляльчие, –
Тон бордын Мон данэ пото».
4Нош Мон шуи:
«Юнме Мон тырши, номыр понна, токма гинэ кужымме быдтӥ.
Мынам судьяе – Кузё-Инмар, кузьым-мед сётӥсе но – Инмаре».
5Туннэ Кузё-Инмар вера, –
кӧтпушкысен ик Монэ Аслыз ляльчи кариз, –
Ас палаз Иаковез берыктон понна,
Израилез Ас палаз дасян понна;
Кузё-Инмарлэн син азяз Мон сӥё-дано каремын,
Инмаре – Кужыме Мынам.
6Со шуиз: «Иаков выжыосты ӝутыны но
Израильлэсь кылем люкетсэ берен вайыны
Мыным ляльчи луэмед уг тырмы,
Мон Тонэ вань калыкъёсты югдытӥсь каро –
музъемлэн пумысеныз пумозяз утёнэ мед вӧлмоз».
7Тазьы шуэ Кузё-Инмар Израилез Мозмытӥсь,
Солэн Дун-Сьӧлыктэмез,
ваньмыныз синазькыль каремлы, сантэмамлы,
кузёйыръёслэн ляльчизылы: «Эксэйёс адӟозы но султозы;
кивалтӥсьёс шонерлыко Кузё-Инмар понна,
Тонэ бырйись Израильлэн Дун-Сьӧлыктэмез понна йыбырттозы».
8Тазьы шуэ Кузё-Инмар: «Ӟеч вапуме Мон Тонэ кылӥ,
утиськон нуналэ Мон Тыныд юрттӥськы;
Мон Тонэ утьыса возё, калык понна Тонэ сӥзён-косон каро,
музъемез мед выльдод,
тырттэм кельтэм люкетъёсты люкет басьтоноослы
мед берыктод шуыса.
9Пытсэтын пукисьёслы мед шуод: ”Потэлэ”;
пеймыт азьын пукисьёслы шуыны: ”Возьматске”.
Сюресъёс дурын соос возьмалозы,
вань вырйылъёсын соослэн пудо возьман интыоссы;
10сютэм, сю куасьмыса улонэз уз адӟе,
ӵушкась пӧсь но шунды соосты уз быдты;
уго Гажась-Жалясь соосты валтыса нуоз, ошмесъёс дуре ваёз.
11Вань гурезьёсме сюрес каро, сюресъёсы ӝутэмын луозы.
12Тани, одӥгъёсыз кыдёкысь лыктозы;
одӥгъёсыз вуозы уйпалась, зарезь дурысь,
мукетъёсыз Сӥним музъемысь лыктозы».
13Инъёс, шумпотэлэ, музъем, шулдыръяськы,
гурезьёс, шумпотыса черектӥське;
уго Кузё-Инмар калыксэ буйгатӥз, курадӟисьёссэ жаляз.
14Нош Сӥон шуылӥз:
«Кузё-Инмар монэ кельтӥз, Инмаре монэ вунэтӥз!»
15Вунэтоз-а кышномурт вож нунызэ,
уз жаля-а ас пушкысьтыз вордскем пизэ?
Со вунэтоно ке но луысал, нош Мон тонэ уг вунэты.
16Тани, Мон тонэ кимыш вылам гожъяй;
тынад борддоръёсыд котьку но Мынам син азям уло.
17Пиосыд тон доры дыртозы, нош талась-таркасьёс,
тырттэм кельтӥсьёс тон дорысь кошкозы.
18Синъёстэ ӝутыса, котырак учкы, – ваньзы соос,
огазе люкаськыса, тон доры лыкто.
Улӥсько Мон! – шуэ Кузё-Инмар, –
дӥськутэн кадь соосын тон дӥсяськод,
ичимень кадь тон чеберъяськод.
19Уго тынад куашкам юрт бервылъёсыд,
луоё кыръёсыд, туркам-таркам музъемед –
улӥсьёс понна укыр ӝикыт луоз,
соку тонэ ньылыны малпасьёс тон дорысь палэнскозы.
20Азьвылъёсыз ышылэм бере вордскем нылпиосыд
бадӟым куараен вералозы:
«Ёркыт мынам интые; улыны быгатымон инты сёт мыным».
21Ас сюлмад тон шуод: «Кин мыным соосты вордскытӥз?
Мон нылпитэм, нылпи вайисьтэм вал,
пленэ нуэмын но палэнтэмын;
кин бен соосты быдэ вуттӥз? –
Тани, мон огнам кыльылӥ; кытын бен соос вал?»
22Тазьы шуэ Инмар Кузё-Инмар:
тани, Мон Аслэсьтым киме ӝуто калыкъёс пала,
калык выжыос пала потто знамяме, –
тынэсьтыд пиостэ ки йылазы ваёзы,
нылъёстэ пельпум вылазы вуттозы.
23Эксэйёс тынад сюдӥсьёсыд луозы,
эксэй кышнооссы – тынад нонтӥсьёсыд;
ымнырынызы музъем бордозь тон азьын йыбыртъялозы,
пыдысьтыд тузондэ нюлозы,
соку тон тодод, Мон – Кузё-Инмар,
Мыным оскиськыса улӥсьёс возьытэ уз вуэ шуыса.
24Кужмолэн киулысьтыз шедьтэм-поттэм ваньбур
таламын луыны быгатоз-а,
вормисьлэн киулысьтыз пленэ шедемъёс
таламын луыны быгатозы-а?
25Бен! Тазьы шуэ Кузё-Инмар:
кужмоос киулэ пленэ шедемъёс таламын луозы,
сьӧсь муртлэн шедьтэм-поттэм ваньбурез мозмытэмын луоз,
малы ке шуоно Мон нюръясько тынад тушмонъёсыныд,
тынэсьтыд пиостэ Мон утё;
26ӝикатыса возисьёстэ асьсэлэн мугоренызы сюдо,
асьсэ вирын соос люктамын луозы выль винаен музэн;
котькудӥз адями тодоз, Мон – Кузё-Инмар,
тынад Утисед, Мозмытӥсед,
Иаковлэн Кужмоез луисько шуыса.
Глава 49