Выбрать язык
Книги Ветхого Завета
Книги Нового Завета
с русским текстом1Кылзэлэ Монэ, шонерлык пала мынӥсьёс,
Кузё-Инмарез утчасьёс!
Изгурезь шоры учкелэ, кытысь тӥ кораса поттэмын но
гулэн мурдалаез шоры учкелэ, кытысь тӥ ӝутыса поттэмын.
2Учкелэ Авраам атайды шоры,
учкелэ тӥледыз вордӥськытӥсь Сарра шоры;
уго Мон Авраамез огназэ ӧти но,
бакель карыса, солэсь выжызэ йылэтӥ.
3Озьы, Кузё-Инмар Сӥонлы каньыллык сётоз,
вань куашкатэм юрт бервылъёссэ юнматоз,
солэсь луоё кыръёссэ райлы укшась интылы пӧрмытоз,
кыр музъемзэ Кузё-Инмарлэн садэзлы укшась музъем кароз;
отын шумпотыса, шулдыръяськыса,
кылын, кырӟанэн данъяса улон луоз.
4Кылзы Монэ, калыке,
выжые Мынам, пельдэс Мон пала мыкыртэ!
Уго Мон бордысь закон потоз,
судме калыкъёсты югдытон понна сёто.
5Шонерлыке матын улэ;
утёнэ ӝутске ини, суйбыгытэ калыкъёсты судить кароз;
шормуӵъёс Мыным оскиськыса улозы, суйбыгытэлы оскиськозы.
6Инбам пала синъёстэс ӝутэлэ,
улӥе, музъем шоры но, учкелэ:
уго инъёс ӵын кадь ышозы-бырозы,
музъем но дӥськут кадь сурыкмоз,
улӥсьёсыз кулыса бырозы.
Нош Мынам утёнэ пумтэм дауръёс улоз,
шонерлыке но уз бырылы.
7Кылзэлэ Монэ, шонерлыкез тодӥсьёс,
кылзы, сюлмаз Мынэсьтым законме возись калык!
Адямиослэн сантэманзылэсь эн кышкалэ,
урод кылъёсын куаретэмзылэсь эн куалектылэ.
8Уго, дӥськутэз кадь соосты кей сиёз,
ыжгонэз кадь соосты нумыр сиёз;
нош Мынам шонерлыке пумтэм вапумъёс улоз,
утёнэ но выжыысь выжыосы возиськоз.
9Султы, султы, кужымлыкен шобырскы, Кузё-Инмарлэн суйбыгытэз!
Вашкала нуналъёсы кадь, вашкала выжыос улон дыръя кадь султы!
Тон ӧд погырты-а Раавез*а, ӧд виы-а крокодилэз?
10Тон ӧд куасьты-а зарезез, туж бадӟым пыдэстэм гулэсь вузэ,
зарезьлэсь пыдэссэ сюреслы ӧд пӧрмыты-а,
пленысь мозмытэмъёс отӥ мед ортчозы шуыса?
11Кузё-Инмарлэн мозмытэмъёсыз бертозы но
Сӥонэ кырӟаса мынозы,
пумтэм вапумъёслы сётэм шумпотон соослэн йыр йылазы улоз;
соос шумпотон, шулдыръяськон пӧлын улозы;
куректыса, лулӟылыса улон соос дорысь быроз.
12Мон, Мон Ачим – тӥляд Буйгатӥсьты.
Кин тон сыӵе – кулоно адямилэсь курдась,
турын-куар кадь куасьмись адями пилэсь кышкась?
13Тон вунэтӥськод аслэсьтыд Кылдытӥсьтэ Кузё-Инмарез –
инъёсты возъясез, музъемез кылдытӥсез;
ёртыса-ӝикатыса возиседлэн йыркурезлэсь ялан,
нуналлы быдэ кышкаса улӥськод, –
со али ик тонэ быдтоз шуыса малпаськод?
Нош ёртыса-ӝикатыса возиседлэн йыркурез вань на-а кытын ке?
14Ӝоген пленэ сюрем мурт мозмытэмын луоз,
гуын уз кулы, няньлы ёрмыса уз улы.
15Мон – Кузё-Инмар, тынад Инмаред, зарезез бугыръясь, озьы,
солэн тулкымъёсыз ик вузо:
Саваоф Кузё-Инмар – Солэн нимыз.
16Аслэсьтым кылъёсме тынад ымад Мон поно,
киылэн вужереныз тонэ шобырто, – инъёсты интыяны,
музъемез юнматыны но Сӥонлы «Тон Мынам калыке» шуыны.
17Сайка, сайка, султы, Иерусалим,
Кузё-Инмарлэн киысьтыз Солэсь вожпотон чашазэ юид,
кудӟытӥсь чашаез пыдэсозяз тон юид, кӧсатӥд сое.
18Солэн вордэм пиосыз пӧлысь одӥгзы но сое нуыны ӧз быгатэ,
будэтэм пиосыз пӧлысь одӥгез но сое, китӥз кутыса,
возьыны ӧз быгаты.
19Тон доры кык шугадӟонъёс вуизы, кин тонэ жалялоз?
Туркан-таркан но быдтон-виылон, сютэм ар но тӥр-пурт:
кызьы Мон тонэ буйгато?
20Пиосыд катьтэммизы,
сьӧлтэтэ шедем кыркеч музэн вань ульча сэрегъёсын кыллё,
Кузё-Инмарлэн вожпотонэныз тыр луыса,
Инмаредлэсь кышкаса-куалекъяса уло.
21Озьыен, кылзы тае, вина юытэк кудӟись, курадӟись.
22Тазьы шуэ Кузё-Инмаред, тынад Инмаред Кузё-Инмар,
Ас калыкез понна пунэмзэ берыктӥсь:
тани, тынад киысьтыд Мон кудӟытӥсь чашаез басьтӥсько,
вожпотонэлэн чашаысьтыз маялзэ поттӥсько:
тон сое ноку но уд ни юы,
23тонэ курадӟытӥсьёслэн киязы сое сёто; соос тыныд шуылӥзы:
«Ымныр вылад усь, тон вылтӥ ми ортчыны мед быгатомы».
Тон аслэсьтыд сюрлыдэ музъем выллем, ульча выллем
мынӥсь-ветлӥсьёс понна карылӥд.
*а 51:9 Раавез – татын: Египетэз
Глава 51